ភ្នំពេញ ៖ ដើម្បីកាត់បន្ថយនូវអត្រាមរណៈរបស់ម្តាយ និងទារកនោះ សមាគមគ្រូពេទ្យកម្ពុជាកាលពីព្រឹកថ្ងៃទី១៨ ខែសីហា ឆ្នាំ២០១៨នេះ បានបើកសន្និសីទលើកទី២ ក្រោមប្រធានបទ(ភាពចុះខ្សោយរបស់ទារកជុំវិញកំណើត) ដែលពិធីនោះ បានធ្វើឡើងនៅសណ្ឋាគារSofitel ដែលមានការចូលរួមពីគ្រូពេទ្យគ្រប់ជំនាញ ពិសេសគ្រូពេទ្យផ្នែកម្តាយ និងទារកជាង២០០នាក់ មកពីមន្ទីរពេទ្យជាតិគ្រប់ខេត្តក្រុង ក្រោមអធិបតីភាពលោកធា គ្រុយ រដ្ឋលេខាធិការក្រសួងសុខាភិបាល និងជាប្រធានគណៈគ្រូពេទ្យជាតិកម្ពុជា និងលោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត។
លោកស្រី សាស្ត្រាចារ្យ វេជ្ជបណ្ឌិត អ៊ឹម សិទ្ធិការ្យ ជាប្រធានសមាគមន៍គ្រូពេទ្យទារកកម្ពុជា និងជាប្រធានផ្នែកប្រពោធនកម្មទារកនៃមន្ទីរពេទ្យកាល់ម៉ែតមានប្រសាសន៍ថា ទិវាសន្និសីទក្រោមប្រធានបទ(ភាពចុះខ្សោយរបស់ទារកជុំវិញកំណើត)ជាប្រធានបទដ៏សំខាន់បំផុតព្រោះភាពចុះខ្សោយរបស់ទារកក្នុងពេលកើតជាមូលហេតុទី២នៃកាស្លាប់របស់ទារកនៅប្រទេសកម្ពុជាបន្ទាប់ពីទារកចាប់កំណើតមកមិនគ្រប់ខែ។
លោកស្រី សាស្ត្រាចារ្យ វេជ្ជបណ្ឌិតបានបន្តទៀតថា សន្និសីទនេះ មានគោលបំណងផ្សព្វផ្សាយចំណេះដឹងបន្ថែមលើបញ្ហាប្រឈម និងភាពខ្សោយរបស់ទារក ដែលទី១បញ្ហាប្រឈមរបស់ម្តាយនិងរបស់ទារក ទី២ការតាមដានឲ្យបានល្អមុនពេលសម្រាល និងពេលកំពុងសម្រាល ទី៣ការប្រាស្រ័យទាក់ទងគ្នាបានល្អរវាងគ្រូពេទ្យ ម្តាយ និងទារកដើម្បីធ្វើការសង្គ្រោះឲ្យបានទាន់ពេលវេលា។
ដោយយោងតាមរយៈការបង្ហាញរបស់វាគ្មិនជាតិ និងអន្តរជាតិពីការព្យាបាលពិសេសចំពោះទារកដែលកើតមកខ្សោយនឹងផ្តល់នូវចំណេះដឹងនិងបទពិសោធន៍ថ្មីៗបំផុតដល់គ្រូពេទ្យជំនាញទាំងអស់ដើម្បីយកទៅអនុវត្តតាមបណ្ដាមន្ទីរពេទ្យរបស់ខ្លួនដើម្បីចូលរួមក្នុងការកាត់បន្ថយមរណភាពទារកនៅព្រះរាជាណាចក្រកម្ពុជាយើងនេះ។
ជាមួយគ្នានោះដែរ លោកធា គ្រុយ រដ្ឋលេខាធិការក្រសួងសុខាភិបាលនិងជាប្រធានគណៈគ្រូពេទ្យជាតិកម្ពុជាបានមានប្រសាសន៍ថា ឱកាសដ៏វិសេសវិសាលនេះពិតជាមានសារៈសំខាន់ថ្លៃថ្លាបញ្ជាក់អំពីសាមគ្គីភាពល្អពីជំនាញនីមួយៗជាពិសេសជំនាញម្តាយនិងទារកដូចជាការធ្វើបទបង្ហាញជាច្រើនព្រមទាំងការពិភាក្សាដកស្រង់យកបទពិសោធន៍ពីគ្នាទៅវិញទៅមកដើម្បីដំណើរការឲ្យជឿនលឿនតាមបច្ចេកទេសវេជ្ជសាស្ត្រក្នុងការកាត់បន្ថយមរណៈរបស់ម្តាយនិងទារក។
លោករដ្ឋលេខាធិការក្រសួងសុខាភិបាលក៏បានកោតសរសើរចំពោះគណៈកម្មការរៀបចំកម្មវិធីនិងសមាគមគ្រូពេទ្យទារកផ្ទាល់ដែលតែងតែរួបរួមគ្នារៀបចំឲ្យមានកម្មវិធីនេះជារៀងរាល់ឆ្នាំដើម្បីផ្លាសប្តូរនូវបទពិសោធន៍ថ្មីៗ និងជឿនលឿនដែលអាចជួយឲ្យវិស័យសុខមាលភាពដល់ទារកនិងមាតាកាន់តែប្រសើរឡើងពីមួយឆ្នាំទៅមួយឆ្នាំ៕
Source: Kampuchea Thmey Daily
0 Comments