ព្រះមហាក្សត្រីយានី Sirikit ព្រះជន្ម៨៦វស្សារបស់ប្រទេសថៃកំពុងព្យាបាលជំងឺគ្រុនផ្តាសាយធំនៅមន្ទីរពេទ្យក្រុងបាងកក។ នេះបើតាមការលើកឡើងរបស់ព្រះបរមរាជវាំងនៅក្នុងសេចក្តីថ្លែងការណ៍មួយនៅថ្ងៃចន្ទដែលជាសេចក្តីថ្លែងការណ៍ដ៏កម្រអំពីព្រះរាជសុខភាពរបស់ទ្រង់។
ព្រះមហាក្សត្រីយានី Sirikit ដែលគង់នៅជាមួយអតីតព្រះមហាក្សត្រ Bhumibol Adulyadej ដែលបានសោយទិវង្គតក្នុងឆ្នាំ២០១៦បន្ទាប់ពីគ្រងរាជរយៈពេលប្រាំពីរទសវត្សរ៍គឺជាព្រះមាតារបស់ស្ដេចបច្ចុប្បន្ន Maha Vajiralongkorn ដែលមានព្រះជន្ម៦៦វស្សា។
ព្រះមហាក្សត្រីយានីអង្គនេះកម្រត្រូវបានគេឃើញជាសាធារណៈណាស់ក្នុងរយៈពេលប៉ុន្មានឆ្នាំថ្មីៗនេះប៉ុន្តែកាលពីសប្តាហ៍មុនព្រះបរមរាជវាំងបានចេញផ្សាយរូបភាពរបស់ព្រះមហាក្សត្រីយានី Sirikit ដើម្បីប្រារព្ធពិធីបុណ្យចម្រើព្រះជន្ម៨៦វស្សារបស់ទ្រង់នៅថ្ងៃទី១២ខែសីហា។
ព្រះបរមរាជវាំងបានរាយការណ៍ថា ព្រះមហាក្សត្រីយានី Sirikit ត្រូវបានបញ្ជូនទៅមន្ទីរពេទ្យ Chulalongkorn ក្នុងទីក្រុងបាងកកកាលពីថ្ងៃអាទិត្យបន្ទាប់ពីមានអាការៈគ្រុនក្ដៅនិងក្អក។
សេចក្តីថ្លែងការណ៍បានបន្ថែមថា ស្ថានភាពរបស់ព្រះមហាក្សត្រីយានីបានល្អប្រសើរឡើងប៉ុន្តែព្រះនាងនឹងគង់នៅមន្ទីរពេទ្យក្រោមការពិនិត្យតាមដាន៕
Source: Kampuchea Thmey Daily
0 Comments