ភ្នំពេញ ៖ ក្រុមហ៊ុនផលិតទឹកពិសាឈានមុខគេ វីតាល់កាលពីថ្ងៃទី២០ ខែសីហា ឆ្នាំ២០១៨ បានធ្វើការបើកសម្ពោធការដាក់បង្ហាញផលិតផលវីតាល់ ១.៥លីត្រ ដែលមានរូបរាងសំបកកេសថ្មីជូនដល់សាធារណជនជាពិសេសមាតាបិតាសម្រាប់ការឆុងម្សៅទឹកដោះគោ និងបបរសម្រាប់ទារក និងកុមារតូចៗនៅភោជនីយដ្ឋាន ទន្លេបាសាក់ II ។
សំបកកេសថ្មី បែបបរិស្ថាន និងការរចនាឡើងថ្មីដែលជាទីចាប់អារម្មណ៍ដល់មាតាបិតា ដែលកំពុងមាន និងរៀបមានបុត្រធីតាតូចៗ។ រូបរាងនៃកេសវីតាល់ថ្មី ១.៥លីត្រនេះបានបង្ហាញខ្លួន ស្តែងចេញពីការចាប់បញ្ចូលគ្នារវាងបច្ចេកវិទ្យាទំនើបចុងក្រោយបំផុតលើការរចនាសំបកកេសថ្មីដែលមានរចនាប័ទ្មប្លែកសម្រាប់មាតាបិតាទារក ថែមទាំងគិតគូរដល់បរិស្ថាន ដែលមិនធ្លាប់មានពីមុនមកនៅក្នុងវិស័យផលិតទឹកពិសានៅក្នុងប្រទេសកម្ពុជា។
ក្នុងរយៈពេល ៨ឆ្នាំនៃវត្តមានរបស់វីតាល់ក្នុងទីផ្សារកម្ពុជា វីតាល់ទទួលបានភាពជោគជ័យខ្ពស់ទាំងចំនួននៃការលក់ និងការទទួលស្គាល់នូវគុណភាព។ ក្នុងនោះផងដែរ វីតាល់ក៏បានដើរតួយ៉ាងសំខាន់ក្នុងភាពជាអ្នកដឹកនាំនៃវិស័យផលិតទឹកក្នុងប្រទេសកម្ពុជា ដោយសារតែវីតាល់ មានយុទ្ធនាការឈានមុខគេគ្រប់ជំហាន ជាក់ស្តែងដូចជាយុទ្ធនាការដកសម្បកផ្លាស្ទិកលើគម្របដបដើម្បីកាត់បន្ថយផ្លាស្ទិចក្នុងបរិស្ថាន ដែលបច្ចុប្បន្នត្រូវបានអនុវត្តន៍តាមដោយក្រុមហ៊ុនដទៃទូទាំងប្រទេស។ ទន្ទឹមនឹងនេះ ពណ៌និងរចនាបទរបស់វីតាល់ ក៏ត្រូវបានក្រុមហ៊ុនជាច្រើនកំពុងយកគំរូតាមផងដែរ។
លោក ជុន ហៀងថាវសិទ្ធិ ប្រធានផ្នែកទីផ្សារនៃក្រុមហ៊ុនវីតាល់ក៏បានមានប្រសាសន៍ថា វីតាល់ មានមោទនភាពជាមួយនឹងភាពជោគជ័យនិងការរីកចម្រើនខ្លាំងរបស់យើង ប៉ុន្តែនេះគឺជាមោទនភាពដែលមិនជ្រុលនិយម។ មោទនភាពនៃវីតាល់ បានជំរុញទឹកចិត្តយើងក្នុងការប្រកួតប្រជែងបន្ថែមទៀត ដោយប្រកាន់ខ្ជាប់នូវភាពច្នៃប្រឌិត មានវិជ្ជាជីវៈ និងប្រកួតប្រជែងដោយសមភាព។
វីតាល់ តែងតែប្រកាន់ខ្ជាប់នូវចក្ខុវិស័យនិងបេសកកម្មសំខាន់ធំៗចំនួន២គឺ៖ ១. “ការផ្តល់ជូនទឹកពិសាដែលមានគុណភាពខ្ពស់ដល់មនុស្សជាតិនិងសង្គម” ២. “ការក្លាយជាក្រុមហ៊ុនជាតិដែលទទួលបានការកោតសរសើរជាងគេក្នុងវិស័យឧស្សាហកម្មទឹកពិសា”។ ហេតុដូច្នេះហើយ ដើម្បីឲ្យវីតាល់នៅបន្តរក្សាតំណែងកំពូលនៅស្ថិតស្ថេរ វីតាល់បាននឹងកំពុងតែដើរស្របទៅនឹងការវិត្តន៍របស់ពិភពលោកដែលប្រព្រឹត្តទៅមុខជារៀងរាល់ថ្ងៃ និងលឿនបំផុត ទាំងបច្ចេកវិទ្យា រចនាបទ និងគំនិតច្នៃប្រឌិត។
ជាងនេះទៅទៀត លោកប្រធាន ក៏បានបង្ហាញពីលក្ខណៈពិសេសនៃរូបរាងកេសថ្មីសម្រាប់ចំណុះ ១.៥លីត្រ របស់វីតាល់ ដែលមានដូចជា៖ កេសថ្មីមានរចនានូវរូបតុក្កតា ២តួអង្គ ដែលស្ដែងប្រាប់ថា សូម្បីទារកទាំងពីរភេទមិនថាអាយុប៉ុន្មាននោះទេ ក៏អាចប្រើប្រាស់បានទាំងការទទួលទាន ឆុងម្សៅទឹកដោះគោ និងបបរឆាប់លឿនរហ័សជាងប្រភេទទឹកដទៃ និងការរក្សានូវផ្ទៃសំបកកេសទាំងមូលមានពណ៌ភ្លឺស្រស់ថ្លា ពាណិជ្ជសញ្ញាផុសអណ្ដែត ដោយក្នុងនោះកេសនីមួយៗមានផ្ទុកវីតាល់ ១.៥លីត្រ ត្រឹមតែ៦ដបប៉ុណ្ណោះ ជាមួយនឹងរន្ធចោះនៅផ្ទៃសងខាងនៃកេស ដើម្បីជួយសម្រួលដល់ការកាន់យួរ ដែលជាបច្ចេកវិទ្យាផលិតចុងក្រោយបំផុត និងដំបូងបំផុតនៅប្រទេសកម្ពុជា។
លោកក៏បានសង្កត់ធ្ងន់ថា ការវិវត្តខ្លួនរបស់វីតាល់ ក៏នៅតែរក្សាគុណភាពក្នុងលំដាប់ខ្ពស់ដដែល និងថែមទាំងគិតគូរខ្វាយខ្វល់ដល់បរិស្ថាន ដោយសម្បកកេសយើងគឺធ្វើឡើងជាប្រភេទក្រដាសដែលឆាប់ងាយរលាយទៅវិញជាមួយនឹងបរិស្ថាន។ វីតាល់មិនត្រឹមតែផលិតឡើងតាមស្តង់ដាជាតិប៉ុណ្ណោះទេ តែយើងអនុវត្តតាមស្តង់ដាអន្តរជាតិ និងជាពិសេសស្របតាមស្ដង់ដាអាមេរិច ដោយទឹករបស់យើងត្រូវបានឆ្លងកាត់នូវប្រព័ន្ធចម្រោះទាំង ១២ និងប្រព័ន្ធចម្រោះទីតាញ៉ូមដែលធានាបាននូវសុវត្ថិភាព និងគុណភាពសម្រាប់ទារកតូចៗក្នុងការឆុងម្សៅទឹកដោះគោ និងបបរ ដែលអតិថិជនជាមាតាបិតាគ្រប់រូបអាចទុកចិត្តបាន ១០០%។
អ្វីដែលអស្ចារ្យ ទៀតនោះ វីតាល់គឺក្រុមហ៊ុនទឹកពិសាដែលទទួលស្គាល់ដោយអង្គការស្តង់ដាអន្តរជាតិ (ISO) និងស្តង់ដាជាតិ(CS) ដែលទទួលបានវិញ្ញាបនបត្ររួមមាន ISO9001:2015 បញ្ជាក់ពីប្រព័ន្ធគ្រប់គ្រងគុណភាព ISO202000:2005 ប្រព័ន្ធគ្រប់គ្រងសុវិត្ថភាពម្ហូបអាហារ និងISO14001:2015 ប្រព័ន្ធគ្រប់គ្រងបរិស្ថាន។ បន្ថែមពីលើនេះ វីតាល់ត្រូវបានផលិតឡើងដោយឧត្តមគតិជាតិ មនសិកា និងធ្វើដើម្បីសង្គមនិងប្រជាជាតិទាំងមូល យើងសូមធានានូវអ្វីដែលយើងបានធ្វើ។
លោកស្រី ជឹង សុគន្ធាវី នាយិកាគ្រប់គ្រង និងតំណាងក្រុមប្រឹក្សាភិបាលនៃក្រុមហ៊ុនវីតាល់ បានធ្វើការថ្លែងអំណរគុណយ៉ាងជ្រាលជ្រៅដល់អតិជន ជាពិសេសម្ចាស់ដេប៉ូភេសជ្ជៈទាំងឡាយ ដែលជារឿយៗបានខិតខំប្រឹងប្រែងគាំទ្រចែកចាយវីតាល់ ទៅកាន់ទីផ្សារកម្ពុជាបានយ៉ាងជោគជ័យ ធ្វើឲ្យសន្ទុះនៃកំណើនចរាចរណ៍វីតាល់លើទីផ្សារមានដំណើរឈានមុខគេ។
វីតាល់នឹងមិននៅស្ងៀមនោះទេ ព្រោះវីតាល់មានទស្សនវិស័យប្រែក្លាយខ្លួនជាក្រុមហ៊ុនជាតិឈានមុខល្អដាច់គេ លើវិស័យផលិតទឹកពិសា ទាំងទីផ្សារក្នុងស្រុក ព្រមទាំងក្រៅស្រុកផងដែរ។ វីតាល់ប្ដេជ្ញាថានឹងបន្តខិតខំប្រឹងប្រែងបង្កើតកម្មវិធីថ្មីៗនិង ល្អៗជាច្រើនទៀតដើម្បីបម្រើប្រជាជនកម្ពុជាឲ្យបានល្អបំផុត ហើយក៏ជាការតបស្នងទៅនឹងជំនឿចិត្តដែលប្រជាជនកម្ពុជាមានមកលើវីតាល់ «វីតាល់មោទនភាព ផលិតផលជាតិ»៕
Source: Kampuchea Thmey Daily
0 Comments