ភ្នំពេញ ៖ នៅក្នុងយុទ្ធនាការចុះជួបជាមួយកម្មករនិយោជិតនៅជុំទី២ ដែលបានចាប់ផ្តើមនាព្រឹកថ្ងៃទី២ ខែសីហានេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានស្នើឲ្យមន្ត្រីពាក់ព័ន្ធបន្តអនុវត្តន៍ឲ្យបានសកម្មថែមទៀតនូវអនុសាសន៍ ១០ចំណុច ដែលបានដាក់ចេញការពីមុនពេលបោះឆ្នោត ក្នុងគោលដៅជំរុញការយកចិត្តទុកដាក់ចំពោះកម្មករ និងការអភិវឌ្ឍបន្តនូវគោលនយោបាយអភិវឌ្ឍន៍ឧស្សាហកម្ម២០១៥-២០២៥។
បន្ទាប់ពីអាក់ខានជួបជាមួយកម្មករចាប់ពីមុនយុទ្ធការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ កាលពីថ្ងៃទី៥ ខែកក្កដា នៅព្រឹកថ្ងៃទី២ ខែសីហានេះ ប្រមុខរាជ រដ្ឋាភិបាលកម្ពុជាបានបន្តជួបជាមួយកម្មករជាថ្មីទៀត ដោយសម្តេចចាត់ទុកថានេះជាជុំទី២។ នៅព្រឹកថ្ងៃទី២ សីហានេះ មានកម្មករ និយោជិតប្រមាណជាង១ម៉ឺន បានជួបសំណេះសំណាលជាមួយសម្តេចតេជោ ហ៊ុន សែន នៅក្នុងខណ្ឌមានជ័យ ដែលបានធ្វើឡើងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
សម្ដេចតេជោ ហ៊ុន សែន បានមានប្រសាសន៍ថា ថ្ងៃនេះយើងចាប់ផ្តើមជុំទី២នៃការជួបសំណេះសំណាលជាមួយកម្មករ ។ ជុំទី១ បានបញ្ចប់នៅមុនយុទ្ធនាការបោះឆ្នោត ដែលយើងគិតទៅគឺមានរយៈពេលជិត១ឆ្នាំ ហើយ ដែលក្នុងនោះបើគិតពីចំនួនកម្មករគឺមានប្រមាណ ៧០ ម៉ឺននាក់។
សម្តេចបានសម្តែងនូវសេចក្តីរីករាយ ដែលបានបន្តនូវអ្វីដែលបានសន្យាជាមួយក្មួយៗ ថានៅពេលដែលគណបក្សប្រជាជនកម្ពុជាឈ្នះឆ្នោត សម្តេចនឹងបន្តជួបជាមួយនិងកម្មករបន្តទៀតទៅតាមកម្មវិធីដែលបានគ្រោងទុក។ សម្តេចបានបន្តថា ឥឡូវនេះយើងបានដឹងហើយថា អនាគតនៃនាយករដ្ឋមន្ត្រីនៅតែដដែលសម្រាប់នីតិកាលទី៦ គឺនៅតែជា ហ៊ុន សែន ដដែលទេ។ សម្តេចបន្តថា សម្តេចបានសន្យាថានឹងធ្វើជានាយករដ្ឋមន្ត្រីរយៈពេលយ៉ាងតិច១០ឆ្នាំទៀត ហើយឆ្នាំ២០២៣ យើងនឹងធ្វើការបោះឆ្នោតជាថ្មីម្ដងទៀត។
នៅក្នុងឱកាសនោះ សម្តេចតេជោ ហ៊ុន សែន បានសុំឲ្យបន្តការងារដែលបានដាក់ចេញរួចមកហើយ ហើយដែលកំពុងអនុវត្តន៍មុននេះ ដែលក្នុងនោះរួមមាន ៖ ទី១-នៅឆ្នាំនេះ ប្រាក់ខែអប្បបរមាអ្នកណាឲ្យ១៧០ ផ្លូវច្បាប់ឲ្យក្រោម១៧០ ខុសច្បាប់ តែបើឲ្យលើស១៧០ ត្រូវច្បាប់។
ចនេះ បញ្ហាដែលថ្មីគឺជំរុញការបើកប្រាក់ខែពីរអាទិត្យម្តង ដែលបញ្ហានេះ រោងចក្រមួយចំនួនបានអនុវត្តរួចហើយ។ ចំណែកមន្ត្រីរាជការកងកម្លាំងប្រដាប់អាវុធនឹងបើកប្រាក់ខែ មួយខែពីរដងចាប់ពីខែមករាឆ្នាំ២០១៩ ទៅ។ ការធ្វើបែបនេះគឺក្នុងគោលបំណងជួយសម្រួលដល់ជីវភាពរស់នៅរបស់បងប្អូន និងបញ្ចៀសពីការចងការប្រាក់ផងដែរ។
ទី២-បន្តពិនិត្យឲ្យបានដិតដល់ ការពិនិត្យនិងព្យាបាលជំងឺជូនកម្មករ-កម្មការនីដោយមិនគិតថ្លៃ។ ត្រូវបន្តការខិតខំបន្តទៀតមិនត្រូវធ្វើតែក្នុងពេលបោះឆ្នោតនោះទេ គឺធ្វើរហូតដែលលុះត្រាតែសម្តេចលែងធ្វើជានាយករដ្ឋមន្ត្រី។
ទី៣-ត្រូវតាមដានពិនិត្យមើលការអនុវត្តចំពោះកម្មការិនីដែលមានផ្ទៃពោះនិងឆ្លងទន្លេត្រូវទទួលបានប្រាក់ខែ១២០% ជាមួយនឹងការសម្រាក ៣ខែ ដោយមានប្រាក់ខែ។
ទី៤-ត្រូវតាមដានមើលការបើកសាច់ប្រាក់ជូនកម្មការិនីដែលឆ្លងទន្លេ ដែលមកដល់ពេលនេះមានកម្មការិនីឆ្លងទន្លេប្រមាណជាង ៣៣.០០០ នាក់ហើយ។ ឆ្នាំនេះ គ្រោងទុកក្នុងថវិកាជាតិ ១០លានដុល្លារ តែមកដល់ពេលនេះ យើងចាយទើបតែអស់ប្រមាណ ៣លានដុល្លារប៉ុណ្ណោះ។
ទី៥-ត្រូវខិតខំពិនិត្យមើលការបង់ធានារ៉ាប់រងសម្រាប់សុខភាពចំពោះកម្មករ និយោជិត។
ទី៦-ត្រូវត្រួតពិនិត្យជាប្រចាំនូវការអនុវត្តថ្លៃឈ្នួលទឹក-ភ្លើង និងឈ្នួលផ្ទះ។ ថ្លៃភ្លើងបានចុះថែមទៀត ហើយនិងត្រូវចុះថែមទៀតនៅក្នុងឆ្នាំ២០១៩។ ឆ្នាំ២០២០ នៅគ្រប់ឃុំទាំងអស់ទូទាំងប្រទេសត្រូវតែមានបណ្ដាញអគ្គីសនីរដ្ឋទៅដល់ ដោយឲ្យតម្លៃភ្លើងនិងបន្តចុះថោកថែមទៀត។
ទី៧-ខិតខំធ្វើឲ្យកម្មករ-កម្មការនីនិងនិយោជិតទទួលបានប្រាក់សោធននិវត្តន៍នៅពេលចាស់ ដែលនឹងចាប់ផ្ដើមនៅក្នុងឆ្នាំ២០១៩ នេះ។ ដូចនេះ ក្មួយៗត្រូវរក្សាទុកនូវសៀវភៅការងាររបស់ខ្លួន រយៈពេល១០ ឆ្នាំមួយថ្ងៃ។
ទី៨-ត្រូវខិតខំដោះស្រាយចំពោះករណីម្ចាស់រោងចក្ររត់ចោលកម្មករ ដែលរហូតមកដល់ពេលនេះរដ្ឋាភិបាលចំណាយ ២២ លានដុល្លាររួចមកហើយ។ ប្រាក់អតីតភាពការងារត្រូវបើកខាងកម្មករក្នុងរយៈពេល១ខែម្ដង ដើម្បីជៀសវាងថៅកែរត់ចោលកម្មករ។
ទី៩-ការយកចិត្តទុកដាក់ទៅលើសុវត្ថិភាពក្នុងការដឹកជញ្ជូនកម្មករ។ នេះជារឿងមួយថ្មីនៅក្នុងចំណោមរឿងដែលយើងត្រូវយកចិត្តទុកដាក់។
ទី១០-ត្រូវបន្តដោះស្រាយពលករដែលកំពុងធ្វើការនៅក្រៅប្រទេស ហើយយើងបានបញ្ចប់រួចរាល់ហើយចំពោះបងប្អូនកម្មករនៅក្នុងប្រទេសថៃ។ សូមបងប្អូនកុំយល់ច្រឡំ ,ការយល់ច្រឡំទីមួយបងប្អូនគិតថា បងប្អូនធ្វើចំណាកស្រុកជារឿងមិនត្រឹមត្រូវ មិនមែនតែកម្ពុជាទេ ប្រទេសថៃខ្លួនឯងក៏មានអ្នកធ្វើចំណាកស្រុក ដែលសព្វថ្ងៃនេះថៃមានពលករច្រើនណាស់នៅកូរ៉េ នៅកោះតៃវ៉ាន់ នៅមជ្ឈិមបូព៌ា។ គេបានបញ្ជូនពលកររបស់គេទៅយកប្រាក់ខែដែលមានកម្រិតខ្ពស់ តែគេបានបញ្ចូលត្រឡប់ទៅវិញនូវពលករដែលមានកម្រិតទាបពីកម្ពុជា។
សម្តេចតេជោនាយករដ្ឋមន្ត្រីបានបន្តថា រាជរដ្ឋាភិបាលកម្ពុជាបានខិតខំខ្លាំងណាស់ដើម្បីឲ្យប្រទេសថៃផ្ដល់នូវភាពស្របច្បាប់ចំពោះក្មួយៗ ហើយរាជរដ្ឋាភិបាលក៏កំពុងចរចារកទីផ្សារការងារបន្ថែមទៀតសម្រាប់ពលរដ្ឋ។ ដូចជាទីផ្សារការងារនៅជប៉ុន នៅកូរ៉េខាងត្បូង និង នៅមជ្ឈិមបូព៌ា ដើម្បីឲ្យពលកររបស់យើងទទួលបាននូវប្រាក់ខែខ្ពស់។
សូមបញ្ជាក់ថា សម្តេចតេជោ ហ៊ុន សែន បានចាប់ផ្តើមចុះបើកវេទិកាសំណេះសំណាលជាមួយកម្មករ កម្មការិនីមកពីតាមរោងចក្រ សហគ្រាស និងគ្រឹះស្ថាននានាតាំងពីថ្ងៃអាទិត្យ ខែសីហា ឆ្នាំ២០១៧មកម្ល៉េះ។ មកដល់ពេលពេលបច្ចុប្បន្ន សម្តេចតេជោ ហ៊ុន សែន បានអញ្ជើញចុះជួបសំណេះសំណាលជាមួយកម្មករ កម្មការិនីសរុប ៥១លើក ដោយមានកម្មករ កម្មការិនីចូលរួមសរុប ៧០០.២០២នាក់៕
Source: Kampuchea Thmey Daily
0 Comments