ក្រុមណាហ្គាវើល បានយកឈ្នះលើក្រុមបឹងកេត ដោយលទ្ធផល ២ទល់០ លើទីលានកីឡដ្ឋានកងយោធពលខេមរភូមិន្ទ (ស្តាតចាស់) ក្នុងប្រកួតជើងទី១វគ្គ៨ក្រុមចុងក្រោយ នៃពានរង្វាន់សម្តេចតេជោ ហ៊ុន សែន ឆ្នាំ២០១៨ (Hun Sen Cup 2018) ខណៈគ្រូបង្វឹកក្រុមទាំង២បានលើកឡើងផ្សេងៗគ្នាក្រោយចប់ការប្រកួត។
លោក មាស ចាន់ណា ដែលជាគ្រូបង្វឹកក្រុមណាហ្គាវើល បានលើកឡើងថា «ទាក់ទងនឹងការប្រកួតនេះ ដំបូងទាក់ទងនឹងទីលាន។ យើងមិនរំពឹងទុកបែបនេះទេ។ ពីដំបូងកាលពីមុនទាន់ភ្លៀងយើងរំពឹងថា អាចលេងបានល្អជាងនេះ ប៉ុន្តែបន្ទាប់ពីភ្លៀងហើយយើងពិបាកមែនទែន។ ពិសេសពេលយើងលេង១០នាទីដំបូងមុនពេលផ្អាក ដោយសារវាមានទឹកដក់អញ្ចឹង យុទ្ធសាស្ត្រយើងត្រៀមទុកត្រូវផ្លាស់ប្ដូរវិញ។ ការរៀបចំការលេងខាងក្រោមត្រូវប្ដូរទៅលេងនៅខាងលើ អញ្ចឹងវាពិបាកមែនទែនសម្រាប់ជ័យជម្នះ២គ្រាប់ហ្នឹង»។
គ្រូបង្វឹកកាន់អាជ្ញាប័ណ្ណ AFC A License រូបនេះបន្តថា «យើងទទួលបានផលចំណេញមែនទែន សម្រាប់២គ្រាប់នេះ បើមួយគ្រាប់យើងបារម្ភខ្លាំង ២គ្រាប់ក៏យើងបារម្ភដែរ ប៉ុន្តែយើងចំណេញត្រង់ថា បានដាក់សម្ពាធលើគូប្រកួតហើយស្រេច។ ២គ្រាប់នេះធ្វើឲ្យគូប្រកួតមានសម្ពាធ ធ្វើឲ្យយើងកាន់តែមានទំនុកចិត្ត មានអារម្មណ៍លេងកាន់តែល្អជាងមុន»។
លោក មាស ចាន់ណា បញ្ជាក់ទៀតថា «ជាធម្មតាទេ! កាលណាយើងនាំមុខមួយគ្រាប់ គូប្រកួតប្រឹងវាយបកយកគ្រាប់វិញ ព្យាយាមរកឱកាសវាយបកវិញ គោលការណ៍គឺវាអញ្ចឹង។ ធម្មតាក្រុមមួយពេលចាញ់មួយគ្រាប់ហើយលេងពន្យារពេលទេ យ៉ាងម៉េចក៏ដោយ បើលេងទៅមុខហើយព្យាយាមរកឱកាស។ កាលណាពួកគេឱកាសតិចជាងពួកយើង ពួកគេព្យាយាមវាយបក»។
ចំណែកលោក ហៅ សុជាតិ គ្រូបង្វឹករបស់ក្រុមបឹងកេត វិញបានលើកឡើងថា «ការប្រកួតនេះពួកយើងបានចាញ់ប៉ុន្តែខ្ញុំពេញចិត្ត ការលេងរបស់ក្រុមដែលប្រើយុវជនច្រើន ហើយឆន្ទៈលេងរបស់គាត់ធ្វើបានល្អ។ យើងចាញ់តែយើងពេញចិត្តការលេងរបស់ក្រុម។ វាពិបាកដែលយើងត្រូវរកពីរគ្រាប់មកវិញប៉ុន្តែយ៉ាងណាក៏ដោយយើងនឹងព្យាយាមលេងឲ្យបានល្អ ពីព្រោះការត្រឡប់មកវិញយើងមាននកីឡាករមួយចំនួនអាចជួយយើងដូចជា ចាន់វឌ្ឍនាកា ស៊ុន សុវណ្ណរិទ្ធីជាដើម។ វឌ្ឍនាកាមានបញ្ហាសុខភាពគាត់មិនអាចលេងបាន»។
គ្រូបង្វឹកខាងលើបន្តថា «បញ្ហាទីលានក៏ជារឿងមួយដែរពីព្រោះពេលយើងហ្វឹកហាត់នៅលើទីលានដែលស្ងួត អត់មានទឹក តែពេលយើងមកប្រកួតហើយយើងពិបាកគ្រប់គ្រង់បាល់ពិសេសបច្ចេកទេសក្នុងការលេង។ យើងមិនអាចនិយាយបានមុនទេ ឬក៏រំពឹងទុកលើការវាយបកយកពីគ្រាប់មកវិញនោះទេពីព្រោះវាមានការលំបាកច្រើនតែចំណុចនេះយើងនឹងរៀបចំឲ្យបានល្អ»។
លោក ហៅ សុជាតិ សម្លឹងឃើញថា «យើងចាញ់ដោយសារយើងប្រើយុវជនច្រើនកីឡាករខ្លះទើបចាប់ផ្ដើមលេងហើយពេលប៉ះជាមួយក្រុមខ្លាំងយើងពិបាកក្នុងការឲ្យគាត់បង្ហាញឲ្យបានល្អ។ ណាហ្គាជាក្រុមខ្លាំងមួយ យើងស្ទើនៅតំបន់បញ្ចប់ទី តំបន់ការពារយើងគ្មានបញ្ហាព្រោះយើងមានកីឡាករល្អច្រើនតែបើនិយាយពីតំបន់ខាងលើយើងប្រើយុវជនច្រើន។ពួកគេនាំមុខយើងនៅវគ្គទីមួយហើយយើងប្រឹងវាយបកដែលធ្វើឲ្យមានចន្លោះច្រើន នេះជាបញ្ហា»។
សូមរំលឹកថា ២គ្រាប់របស់ក្រុមណាហ្គាវើល រកបានដោយខ្សែប្រយុទ្ធ រុន រ៉ានី រកបានគ្រាប់បាល់ទី១នៅនាទី៤៥+២ និងខ្សែប្រយុទ្ធ សារី ម៉ាត់នូរ៉ូទីន នាទី៨៤។ ក្រុមទាំង២នឹងត្រូវប៉ះគ្នានៅជើងទី២ ដែលគ្រោងធ្វើឡើងនៅថ្ងៃពុធ ទី៨ខែសីហា ឆ្នាំ២០១៨ ខាងមុខ ហើយក្រុមឈ្នះទាំង២ជើងនឹងទទួលបានកៅអីឡើងទៅលេងវគ្គពាក់កណ្ដាលផ្តាច់ព្រ័ត្រជាបន្ត៕
Source: Kampuchea Thmey Daily
0 Comments