ភ្នំពេញ ៖ សមាជិកសភានីតិកាលទី ៦ នឹងធ្វើសច្ចាប្រណិធាននៅល្ងាចថ្ងៃទី១៩កញ្ញាខាងមុខក្រោយពីគណៈកម្មាធិការជាតិរៀបចំការបោះ ឆ្នោត (គ.ជ.ប) ប្រកាសលទ្ធផលនិងបែងចែកអាសនៈជាផ្លូវការ ហើយកិច្ចប្រជុំគណៈរដ្ឋមន្ត្រីដំបូងនៃរាជរដ្ឋាភិបាលនីតិកាលទី៦ នឹងប្រជុំនៅព្រឹកថ្ងៃ ទី ២០ ខែកញ្ញា។ នេះបើយោងតាមការបញ្ជាក់របស់សម្ដេចនាយករដ្ឋមន្ត្រី ហ៊ុន សែន ថ្លែងក្នុងពិធីជួបសំណេះសំណាលជាមួយកម្មករនិយោជិតប្រមាណជាង១ ម៉ឺន ក្នុងខណ្ឌមានជ័យ ដែលបានធ្វើឡើងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យនាព្រឹកថ្ងៃទី២ខែសីហានេះ។
សម្តេចតេជោនាយករដ្ឋមន្ត្រីបានបញ្ជាក់ថា តាមការគ្រោងទុករាជរដ្ឋាភិបាលថ្មីនិងបង្កើតឡើងនៅថ្ងៃទី ២០ កញ្ញា ឆ្នាំ ២០១៨ ខាងមុខ។ សម្ដេចតេជោ ហ៊ុន សែន បានធ្វើការពន្យល់ថា ព្រះមហាក្សត្រនឹងចេញព្រះរាជសារមួយកោះប្រជុំសមាជិកតំណាងរាស្ត្រពីគណបក្សដែលឈ្នះចូលរដ្ឋសភានៅព្រឹកថ្ងៃទី ១៩ ខែកញ្ញា បន្ទាប់ពីគណៈកម្មាធិការជាតិរៀបចំការបោះឆ្នោតប្រកាសលទ្ធផល និង ធ្វើការបែងចែកអាសនៈជា ផ្លូវការ។ បន្ទាប់មកនៅល្ងាចថ្ងៃទី ១៩ ខែកញ្ញានឹងមានការស្បថសច្ចាប្រណិធានចូលកាន់តំណែង។ សម្តេចនាយករដ្ឋមន្ត្រី ហ៊ុន សែន បាននៅព្រឹកថ្ងៃទី២០ ខែកញ្ញារាជរដ្ឋាភិបាលថ្មីនឹងត្រូវបានបង្កើតឡើងហើយល្ងាចឡើងត្រូវស្បថចូលកាន់តំណែង។ នៅព្រឹកថ្ងៃទី ២១កិច្ចប្រជុំគណៈ រដ្ឋមន្ត្រីថ្មីនឹងត្រូវធ្វើឡើង។
សម្ដេចតេជោ ហ៊ុន សែន បានបន្តថា ក្រោយពីធីស្បថចូលកាន់តំណែងរួចរាល់ប្រធានរដ្ឋសភានឹងកោះអញ្ជើញក្រុមអ្នកតំណាងរាស្ត្រទាំងអស់មកបើកកិច្ចប្រជុំនៃអាណត្តិថ្មីរបស់ខ្លួនដើម្បីពិភាក្សាការងារនៅថ្ងៃទី ២១ ខែកញ្ញា។
សម្តេចតេជោ ហ៊ុន សែន បានធ្វើការពន្យល់ពីមូលហេតុដែលនាំឲ្យមានការពន្យារពេលរហូតដល់ទៅជាងមួយខែ ក្នុងការបង្កើតរដ្ឋសភាថ្មី ក៏ដូចជារាជរដ្ឋាភិបាលថ្មី ក្រោយពេលលទ្ធផលបោះឆ្នោតត្រូវបានប្រកាសជាផ្លូវការថា ដូចជានៅក្នុងប្រទេសម៉ាឡេស៊ី និងប្រទេសជប៉ុន ក្រោយពេលលទ្ធផលបោះឆ្នោតប្រកាសភ្លាម គឺគេបង្កើតរដ្ឋាភិបាលភ្លាមៗតែម្តង តែសម្រាប់កម្ពុជា ត្រូវទុកពេលឲ្យមានការប្តឹងតវ៉ាពីគណបក្សនយោបាយនានាក៏ដូចជាទុកពេលឲ្យគណៈកម្មាធិការជាតិរៀបចំការបោះឆ្នោតដោះស្រាយបញ្ចប់នូវវិវាទនានាជាមុនសិន។
អីឡូវនេះការបោះឆ្នោតកំពុងតែស្ថិតក្នុងការដោះស្រាយរបស់ គ.ជ.ប បន្ទាប់ពី គ.ជ.ប ដោះស្រាយបញ្ហារួចហើយប្រសិនបើមានបញ្ហាដោះស្រាយមិនបាននឹងត្រូវប្តឹងទៅក្រុមប្រឹក្សាធម្មនុញ្ញ ប្រសិនបើក្រុមប្រឹក្សាធម្មនុញ្ញដោះស្រាយរួចហើយទើបបង្វិលបញ្ហានេះឲ្យ គ.ជ.ប រៀបចំពិនិត្យ និងប្រកាសលទ្ធផលផ្លូវការហើយបែងចែកអាសនៈ និងប្រកាសបេក្ខជនជាប់ឆ្នោតផងដែរ។ សម្រាប់កម្ពុជាត្រូវពន្យាររហូតដល់ខែកញ្ញាព្រោះទុកលទ្ធភាព ឲ្យគណៈកម្មាធិការជាតិរៀបចំការបោះឆ្នោត ដោះស្រាយនូវបញ្ហាលើពាក្យបណ្តឹងមួយចំនួនរបស់គណបក្សនយោបាយ។
ទាក់ទងនឹងការប្រកាសលទ្ធផលផ្លូវការនៃចំនួនអាសនៈក្នុងរដ្ឋសភានីតិកាលទី៦ នឹងធ្វើឡើង២ដំណាក់កាល។ ដំណាក់កាលទី១ គ.ជ.ប នឹងប្រកាសលទ្ធផលបណ្ដោះអាសន្ននៅថ្ងៃទី ១១ ខែសីហា ដើម្បីទទួលពាក្យបណ្ដឹងផ្សេងៗពីគ្រប់គណបក្សទាំងអស់។ រហូតដល់ថ្ងៃទី១៥ ខែសីហា។ ប្រសិនជាមិនមានពាក្យបណ្ដឹងនោះទេការប្រកាសលទ្ធផលផ្លូវការនឹងធ្វើឡើងនៅថ្ងៃទី ១៥ ខែសីហាតែម្ដង។ ប៉ុន្តែបើមានពាក្យបណ្ដឹងមក គ.ជ.ប ដើម្បីដោះស្រាយនោះការប្រកាសលទ្ធផលផ្លូវការនឹងធ្វើឡើងនៅថ្ងៃទី ១០ ខែកញ្ញាវិញ។ បន្ទាប់មកព្រះមហាក្សត្រនិង កោះប្រជុំសភាលើកដំបូងមិនលើសពី ៦០ ថ្ងៃ នេះយោងតាមនីតិវិធីរបស់ដំណើរការបោះឆ្នោត និង ដំណើរការបង្កើតរដ្ឋាភិបាលនៅកម្ពុជា។
យោងតាមរបាយការណ៍របស់គណៈកម្មាធិការជាតិរៀបចំការបោះឆ្នោត បានបញ្ជាក់ថា នៅថ្ងៃទី២៩ ខែកក្កដា ឆ្នាំ២០១៨កន្លងទៅនេះ ប្រជាពលរដ្ឋកម្ពុជាដែលបានចេញទៅបោះឆ្នោតមានប្រមាណ ៦.៩៤៦.១៦៤នាក់ ស្មើនឹងប្រមាណ ៨២,៨៩ភាគរយ ក្នុងចំណោមប្រជាពលរដ្ឋមានឈ្មោះក្នុងបញ្ជីបោះឆ្នោត ៨.៣៨០.២១៧នាក់។ ក្នុងនោះសំឡេងបានការមានចំនួន ៦.៣៤៩.៣៨៩នាក់ ហើយមិនបានការចំនួន ៥៩៦.៧៧៥នាក់។គណបក្សប្រជាជនកម្ពុជាទទួលបានច្រើនជាងគេគឺមានចំនួនរហូតដល់ទៅ ៤.៨៧៥.១៨៩នាក់ស្មើនឹង៧៦,៧៨ភាគរយ។ តាមរយៈសំឡេងឆ្នោតនេះបើគេគណនារកចំនួនអាសនៈតាមរូបមន្តក្នុងច្បាប់ស្តីពីការបោះឆ្នោតជ្រើសតាំងតំណាងរាស្ត្រគឺគណបក្សប្រជាជនកម្ពុជាយកអាសនៈនៅក្នុងរដ្ឋសភាទាំង ១២៥អាសនៈតែម្តង៕
Source: Kampuchea Thmey Daily
0 Comments