ក្រុមបាល់ទាត់វិសាខា សមាជិកពានរង្វាន់លីគកំពូលកម្ពុជា Metfone Cambodian League 2018 រៀបគម្រោងពិសេសមួយដល់កីឡាករជាសមាជិករបស់ខ្លួនក្លាយជាទូតតំណាងតាមខេត្តកំណើតខ្លួន ដើម្បីធ្វើឲ្យមានការចាប់អារម្មណ៍ខ្លាំងពីសំណាក់ប្រជាពលរដ្ឋជាគោលដៅនិងបង្កើនភាពទាក់ទាញដល់ក្លិប។
លោក ហុក សុចិត្រា អ្នកចាត់ការទូទៅរបស់ក្លិបវិសាខា បានលើកឡើងថា គម្រោងនេះនឹងលេចចេញជារូបរាងឡើង នៅដំណាច់រដូវកាល២០១៨ខាងមុខ។ អតីតជម្រើសជាតិកម្ពុជា រូបនេះបញ្ជាក់ថា «គោលដៅរបស់ឯកឧត្តមប្រធាន គឺចង់ឲ្យកីឡាករជា favorite របស់អ្នកគាំទ្រ មានស្រុកកំណើតនៅខេត្តណា នឹងធ្វើជាទូតសុច្ឆន្ទៈរបស់ខេត្តហ្នុង។ ឧទាហរណ៍ ដូច កែវ សុខផេង មានកំណើតនៅខេត្តក្រចេះ គាត់នឹងធ្វើជាតំណាងវិសាខានៅខេត្តក្រចេះ ដើម្បីឲ្យប្រជាពលរដ្ឋដឹងថា កីឡាករពីខេត្តក្រចេះ មានជាប់ជម្រើសជាតិ និង ដឹងថា ជាកីឡាករល្អនៅកម្ពុជា»។
លោក ហុក សុចិត្រា បន្ថែមថា គោលការណ៍ដ៏ធំរបស់វិសាខា គឺវិវឌ្ឍន៍ខ្លួនទៅជាក្លិបអាជីពដ៏ពិតប្រាកដមួយនៅកម្ពុជា ហើយការរួមចំណែកក្នុងកិច្ចការសង្គមក៏ជាផ្នែកមួយរបស់ក្លិបផងដែរ។
ក្រុមវិសាខា បានបង្កើតឡើងពីថ្ងៃទី៥ ខែកុម្ភៈ ឆ្នាំ២០១៧ ក្រោមការឧបត្ថម្ភគាំទ្រពីសំណាក់លោក ស សុខា។ បច្ចុប្បន្នក្លឹបមានកីឡាករជិត៣០នាក់ ដែលមានលោក ហុក សុចិត្រា អតីតគ្រូបង្វឹកក្រុមជម្រើសជាតិកម្ពុជា ដើរតួធ្វើជាអ្នកចាត់ការទូទៅរបស់ក្រុម ខណៈលោក ហុក សុជីវ័ន ជាប្អូនប្រុសបង្កើតធ្វើជាគ្រូបង្វឹក។ ក្រុមវិសាខា បានកសាងកីឡដ្ឋានថ្មីផ្ទាល់ខ្លួន មានទីតាំងនៅតាមផ្លូវលេខ៥៩៨ ខាងឆ្វេងដៃខ្លោងទ្វារ Grand Phnom Penh។ កីឡដ្ឋាននេះអាចផ្ទុកទស្សនិកជនប្រមាណជាង៥០០០នាក់ ដែលមានទីលានជាស្មៅធម្មជាតិ។
ក្រុមនេះជាបេក្ខភាពមួយមិនអាចមើលរំលងបានក្នុងការប្រជែងយកជើងឯកនៅឆ្នាំចាស់នេះ ខណៈឆ្លងកាត់១៥ប្រកួតមកនេះក្នុងពានរង្វាន់លីគកំពូលកម្ពុជា វិសាខា ឈរលេខ៣ក្នុងតារាងរួមដែលមាន១២ក្រុមក្រោយប្រកួតឈ្នះ១១ លើកស្មើគ្នា២លើក និងចាញ់២លើក មាន៣៥ពិន្ទុក្នុងដៃ។ សម្រាប់ប្រកួតបន្ទាប់ក្រុមវិសាខា ត្រូវប៉ះក្រុមវេស្ទើនភ្នំពេញ នៅម៉ោង៦ល្ងាចលើទីលានកីឡដ្ឋានស្តាតចាស់ នៅថ្ងៃសៅរ៍ ទី៤ ខែសីហា ឆ្នាំ២០១៨ ខាងមុខ៕
Source: Kampuchea Thmey Daily
0 Comments