កណ្ដាល ៖ ក្រុមជួញដូរគ្រឿងញៀន ប្រុសស្រី៦នាក់ រួមទាំងគ្រឿងញៀនចំនួនជាង៣០កញ្ចប់ ត្រូវបានមន្ទីរប្រឆាំងបទល្មើសគ្រឿងញៀនក្រសួងមហាផ្ទៃសហការជាមួយកម្លាំងការិយាល័យប្រឆាំងគ្រឿងញៀនខេត្តកណ្តាល ដោយមានការសម្របសម្រួលពីលោក ទិន សុចិត្រា ព្រះរាជអាជ្ញាររងអមសាលាដំបូង ខេត្តកណ្តាល បានបើកប្រតិបត្តិការណ៍ បង្ក្រាបក្រុមជួញដូរគ្រឿងញៀននៅក្នុងផ្ទះសំណាក់ ឡា លីន ក្រុងតាខ្មៅ។ ហេតុការណ៍ចុះបង្ក្រាបនេះនៅថ្ងៃទី០១ ខែសីហា ឆ្មាំ២០១៨ វេលាម៉ោងជាង០២រសៀល នៅចំណុចក្នុងផ្ទះសំណាក់ ឡា លីន ស្ថិតក្នុងភូមិដើមមាន សង្កាត់ដើមមាន ក្រុងតាខ្មៅ ខេត្តកណ្តាល។
ប្រភពព័ត៌មានបានបង្ហើបឲ្យដឹងថា មុនឈានដល់ការបង្ក្រាប កម្លាំងមន្ទីរប្រឆាំងបទល្មើសគ្រឿងញៀន ក្រសួងមហាផ្ទៃបានឃាត់ខ្លួនជនសង្ស័យពីរនាក់នៅឯភ្នំពេញ បន្ទាប់ពីធ្វើការសាកសួររួច ទើបកម្លាំង ឈានដល់ការស្រាវជ្រាវ និងបានចូលដល់ក្នុងបន្ទប់លេខ១០១ និង១០២នៃផ្ទះសំណាក់ ឡា លីន មានទីតាំងស្ថិតនៅ សង្កាត់ដើមមាន ក្រុងតាខ្មៅ ខេត្តកណ្តាល ដោយបានឃើញមនុស្សប្រុសស្រី៦នាក់ កំពុងពពាក់ពពូនគ្នាជក់គ្រឿងញៀន រួមនឹងគ្រឿងញៀនជាង៣០កញ្ចប់ និងវត្ថុតាងវេចខ្ចប់មួយចំនួនធំ។
ប្រភពព័ត៌មានបន្តទៀតថា ក្រុមជួញដូរគ្រឿងញៀននោះបានមកសា្នក់នៅ និងជួលបន្ទប់ក្នុងផ្ទះសំណាក់ ឡា លីន នោះអស់រយៈពេល០១ខែហើយ។ ហេតុអ្វីម្ចាស់ផ្ទះសំណាក់មិនមានការសង្ស័យ ឬក៏ម្ចាស់ផ្ទះសំណាក់ដឹងតែធ្វើមិនដឹង? មជ្ឈដ្ឋានមួយចំនួនសង្ស័យថា ម្ចាស់ផ្ទះអាចបើកភ្លើងខៀវ គួរសមត្ថកិច្ចស៊ើបអង្កេតឲ្យបានល្អិតល្អន់។
បច្ចុប្បន្នជនសង្ស័យទាំង០៦នាក់ កម្លាំងជំនាញបានបញ្ជូន ទៅកាន់មន្ទីរប្រឆាំងបទល្មើសគ្រឿងញៀនក្រសួងមហាផ្ទៃដើម្បីធ្វើការសាកសួរ និងកសាងសំណុំរឿង ចាត់ការតាមនីតិវិធី។ ចំណែកទីតាំងបន្ទប់ផ្ទះសំណាក់ពីរបន្ទប់ លោកព្រះរាជអាជ្ញារងសម្រេចឲ្យបិទទ្វារ បណ្តោះអាសន្ន៕
Source: Kampuchea Thmey Daily
0 Comments