សៀមរាប ៖ បុរសជាភ្ញៀវទេសចរណ៍ជនជាតិអូស្ត្រាលីម្នាក់ ត្រូវបានគេប្រទះឃើញដេកស្លាប់ក្នុងភូមិគ្រឹះ យីហោ(ណេឈប៊ូទិករ៉េស៊ីដិន)ហើយតាមការឲ្យដឹងពីសមត្ថកិច្ចជំនាញថា ជនរងគ្រោះបានស្លាប់ដោយសារខ្យល់គ។
ហេតុការណ៍នេះ កើតឡើងនៅវេលាម៉ោង១៨និង០០នាទី ថ្ងៃទី០១ ខែសីហា ឆ្នាំ២០១៨ នៅចំណុចភូមិគ្រឹះណេឈប៊ូទិករ៉េស៊ីដិន ស្ថិតនៅក្រុមទី១ ភូមិកក្រាញ់សង្កាត់សៀមរាប ក្រុងខេត្តសៀមរាប មានជនបរទេសម្នាក់ បានដេកស្លាប់នៅក្នុងបន្ទប់ ។
សមត្ថកិច្ចបានឲ្យដឹងថា ជនរងគ្រោះឈ្មោះ MCCRANNJAKEBENJAMIN ភេទប្រុស អាយុ៤៣ឆ្នាំ ជនជាតិអូស្ត្រាលី កាន់លិខិតឆ្លងដែន ជាភ្ញៀវទេសចរណ៍ ចូលមកស្នាក់នៅបន្ទប់លេខ១ ភូមិគ្រឹះខាងលើកាលពីថ្ងៃទី ១៧ ខែមីនា ឆ្នាំ២០១៨។
តាមការបំភ្លឺពីបុគ្គលិកភូមិគ្រឹះបានឲ្យដឹងថា នៅវេលាម៉ោងប្រហែល១៨និង០០នាទីថ្ងៃទី០១ ខែសីហា ឆ្នាំ២០១៨ ដោយមិនឃើញជនរងគ្រោះចេញពីក្នុងបន្ទប់ ខ្លួនក៏បានដើរទៅគោះទ្វារបន្ទប់តែគ្មានអ្នកឆ្លើយតប ដោយមានការសង្ស័យខ្លួនក៏បាននាំគ្នាគាស់ទ្វារបន្ទប់ចូលមើលស្រាប់តែឃើញជនរងគ្រោះដេកស្លាប់នៅលើគ្រែក្នុងបន្ទប់តែម្តង។
តាមការស្រាវជ្រាវរបស់សមត្ថកិច្ចជំនាញ និងលោកវេជ្ជបណ្ឌិតអ៊ិត ឆបឆរ័ត្ន គ្រូពេទ្យអមតុលាការបានសន្និដ្ឋានថា ជនរងគ្រោះស្លាប់ដោយខ្យល់គ។
សាកសពត្រូវបានកម្លាំងសមត្ថកិច្ច បញ្ជូនទៅតម្កល់ទុក បណ្តោះអាសន្ននៅមន្ទីរពេទ្យមិត្តភាពខ្មែរសូវៀត(ពេទ្យរុស្ស៊ី) រាជធានីភ្នំពេញតាមសំណូមពររបស់តំណាងស្ថានទូត៕
Source: Kampuchea Thmey Daily
0 Comments