ក្រសួងការពារជាតិអេស្ប៉ាញកំពុងធ្វើការស៊ើបអង្កេតបន្ទាប់ពីយន្ដហោះចម្បាំងមួយគ្រឿងរបស់ខ្លួនបានបាញ់មីស៊ីលដោយចៃដន្យលើប្រទេសអេស្ដូនីអំឡុងពេលបេសកកម្មហ្វឹកហ្វឺន។
ក្រសួងនេះបាននិយាយថា ឧបទ្ទវហេតុនេះបានកើតឡើងកាលពីរសៀលថ្ងៃអង្គារនៅក្នុងតំបន់មួយនៃភាគនិរតីប្រទេសអេស្តូនៀដែលជាកន្លែងអនុញ្ញាតសម្រាប់ការធ្វើលំហាត់បែបនេះ។
ក្រសួងបានបន្ថែមថា មីស៊ីលបាញ់ពីអាកាសទៅអាកាសនេះមិនបានបង្កការខូចខាតទេ។
ប៉ុន្តែយោធារបស់ប្រទេសអេស្ដូនីបាននិយាយថា ខ្លួនកំពុងតែស្វែងរកបំណែកមីស៊ីលនេះ។
ក្រសួងការពារជាតិអេស្ប៉ាញបាននិយាយនៅក្នុងសេចក្តីថ្លែងការណ៍មួយថា “យន្តហោះ Eurofighter ដែលមានមូលដ្ឋាននៅប្រទេសលីទុយអានីបានច្រឡំបាញ់មីស៊ីលប៉ុន្តែមិនបង្កគ្រោះថ្នាក់អ្វីឡើយ។ មីស៊ីលបាញ់ពីអាកាសទៅអាកាសនេះមិនបានវាយប្រហារយន្តហោះណាមួយទេ។ យើងបានបើកការស៊ើបអង្កេតមួយដើម្បីបញ្ជាក់ពីមូលហេតុពិតប្រាកដនៃឧបទ្ទវហេតុនេះ”។
មីស៊ីលនេះត្រូវបានគេរាយការណ៍ថាមានផ្ទុកគ្រឿងផ្ទុះទម្ងន់១០គីឡូក្រាមនិងត្រូវបានគេគិតថាបានធ្លាក់នៅចម្ងាយ៤០គីឡូម៉ែត្រនៅភាគខាងជើងទីក្រុង Tartu នៃប្រទេសអេស្តូនី។
យន្ដហោះអេស្ប៉ាញពីរគ្រឿងនិងយន្តហោះបារាំងពីរគ្រឿងបានចូលរួមក្នុងសមយុទ្ធមួយដែលជាផ្នែកមួយនៃបេសកកម្ម Baltic Air Policing របស់អង្គការណាតូនៅពេលឧប្បត្តិហេតុនេះបានកើតឡើង។
នៅក្នុងទំព័រ Facebook នាយករដ្ឋមន្ត្រីអេស្តូនីលោក Jür Ratas បានរៀបរាប់ហេតុការណ៍នោះថា ជាការគួរឲ្យភ្ញាក់ផ្អើលនិងគួរឲ្យសោកស្តាយបំផុត។
លោកបានសរសេរថា “នេះជាករណីធ្ងន់ធ្ងរមួយហើយយើងមានការព្រួយបារម្ភយ៉ាងខ្លាំងអំពីរឿងនេះ។ អរគុណព្រះជាម្ចាស់ គ្មាននរណាម្នាក់ត្រូវបានគេដឹងថារងរបួសឡើយដោយសារហេតុការណ៍នេះ”។
លោកបានបន្ថែមថា “ខ្ញុំជឿជាក់ថា កងកម្លាំងការពារជាតិអេស្តូនីនឹងខិតខំប្រឹងប្រែងដើម្បីធ្វើឲ្យប្រាកដថា មិនមានរឿងបែបនេះកើតឡើងម្តងទៀតទេ”៕
Source: Kampuchea Thmey Daily
0 Comments