លី​គ​កំពូល​កម្ពុជា ​៖ ​វេ​ស្ទើ​ន​ទទួល​ណាហ្គា​វើ​ល តែ​អង្គ​រថា​យ​ហ្គឺ​រ​ប៉ះ​ប៉ូលីស និង​ព្រះខ័ន​រាជ​ស្វាយរៀង ជួប​អាស៊ី​អឺរ៉ុប

ក្រុមបាល់ទាត់​វេ​ស្ទើ​ន ត្រូវ​ទទួល​ក្រុម​ណាហ្គា​វើ​ល ហើយ​ក្រុម​អង្គ​រថា​យ​ហ្គឺ​រ ប៉ះ​ក្រុម​អគ្គស្នងការដ្ឋាន​នគរ​បាល​ជាតិ (​ប៉ូលីស​) និង​ក្រុម​ព្រះខ័ន​រាជ​ស្វាយរៀង ជួប​ក្រុម​អាស៊ី​អឺរ៉ុប នៅ​ល្ងាច​ថ្ងៃ​សៅរ៍ ទី​១១ ខែសីហា ឆ្នាំ​២០១៨ ប្រចាំ​សប្ដាហ៍​ទី​១៧ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018)​។

*​ក្រុម​វេ​ស្ទើ​ន ប៉ះ​ក្រុម​ណាហ្គា​វើ​ល
ក្រុមបាល់ទាត់​វេ​ស្ទើ​ន​ភ្នំពេញ ត្រូវ​ប៉ះ​ក្រុម​ណាហ្គា​វើ​ល នៅវេលា​ម៉ោង​៣​រសៀល​លើ​ទីលាន​កីឡដ្ឋាន​វេ​ស្ទើ​ន ក្នុង​រាជធានី​ភ្នំពេញ ព្រមទាំង​មាន​ផ្សាយ​ផ្ទាល់​នៅលើ​ទំព័រ​ហ្វេ​ស​ប៊ុ​ក​របស់​គណៈកម្មការ​ប្រកួត​បាល់ទាត់​ជាតិ​កម្ពុជា (CNCC) ផងដែរ​។ ក្រុម​វេ​ស្ទើ​ន​ភ្នំពេញ វិញ​ទើបតែ​រកបាន​ពិន្ទុ​លើកដំបូង កាលពី​ពេល​ថ្មីៗ​ក្រោយ​ឆ្លងកាត់​១៦​ប្រកួត​មកនេះ​។ ក្រុម​នេះ​កំពុង​ដឹកនាំ​ដោយ​គ្រូបង្វឹក​ជនជាតិ​ម៉ាឡេស៊ី លោក FIZOL BIN A.RAZAK​។ ឆ្លងកាត់​ការប្រកួត​មួយរយៈ​ពេលនេះ​មក​លោក​បាន​មើលឃើញ​ពី​កម្រិត​ប្រកួតប្រជែង​និង​តម្រូវការ​ទាមទារ​នៅក្នុង​លី​គ​កម្ពុជា ដែលជា​បទពិសោធន៍​ល្អ​សម្រាប់​កីឡាករ​ក្មេងៗ​របស់លោក​ក៏ដូចជា​សម្រាប់​លោក​ផ្ទាល់​ផងដែរ​។



សម្រាប់​ក្រុម​ណាហ្គា​វើ​ល វិញ​កំពុង​ឈរ​លេខ​២ ក្នុង​តារាង​រួម ក្រោយ​ប្រកួត​ឈ្នះ​បាន​១២​លើក ស្មើគ្នា​២​លើក និង​ចាញ់​២​លើក មាន​៣៨​ពិន្ទុ​ក្នុង​ដៃ​។ លោក មាស ចាន់ណា គ្រូបង្វឹក​កាន់​អាជ្ញា​ប័​ណ្ឌ AFC A License បាន​អះអាងថា​លោក នឹង​ព្យាយាម​ប្រមូលផ្ដុំ​អារម្មណ៍​កីឡាករ​ឲ្យ​បានល្អ​ឡើងវិញ និង កែប្រែ​ចំណុច​ខ្វះខាត​ដើម្បី​បន្ត​រក​កៅអី​កំពូល​តារាង​រហូតដល់​ចប់​រដូវ​កាល​។

*​អង្គ​រថា​យ​ហ្គឺ​រ ប៉ះ​អគ្គស្នងការដ្ឋាន​នគរ​បាល​ជាតិ
ក្រុម​អង្គ​រថា​យ​ហ្គឺ​រ ទទួល​ក្រុម​អគ្គស្នងការដ្ឋាន​នគរ​បាល​ជាតិ វេលា​ម៉ោង​៣និង៣០​នាទី​ល្ងាច​លើ​ទីលាន​កីឡដ្ឋាន​ខេត្តសៀមរាប ព្រមទាំង​ផ្សាយ​ផ្ទាល់​តាម​ប៉ុស្តិ៍ BTV News​។ ក្រុម​អង្គ​រថា​យ​ហ្គឺ​រ ឆ្លងកាត់​ប្រកួត​១៦​លើក​មកនេះ​ឈ្នះ​បាន​៤ លើក​ស្មើគ្នា​បាន​៤​លើក និង​ចាញ់​៨​លើក​មាន​១៦​ពិន្ទុ​។ ក្រុម​នេះ​កំពុងតែ​ដឹកនាំ​ដោយ​លោក Oriol Mahedano ដែលជា​គ្រូបង្វឹក​សញ្ជាតិ​អេ​ស្ប៉ា​ញ កាន់​អាជ្ញាប័ណ្ណ​គ្រូបង្វឹក​កម្រិត UEFA A licence ដែលមាន​សមាជិក​២៥​នាក់​។ លោក Akihiro Kato ដែលជា​ប្រធាន​ក្លិប​បានដាក់​គោលដៅ​យក​កៅអី​នៅ​តំបន់​ក្រុម​ខ្លាំង​ទាំង​៤​ប្រចាំ​រដូវ​កាល (Top4) នៅ​ឆ្នាំនេះ ខណៈ​នៅ​ឆ្នាំ​២០២០ ក្លិប​ចង់​ប្រជែង​យក​ជើងឯក​។

ក្រុម​ប៉ូលីស វិញ​កំពុង​ឈរ​លេខ​៥ ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៧​លើក ស្មើគ្នា​៣​លើក​និង​ចាញ់​៦​លើក​។ លោក នុត សូ​នី គ្រូបង្វឹក​ក្រុម​នេះ​រំពឹង​ថា ​កូនក្រុម​នឹងធ្វើ​បាន​ល្អ​បន្ថែម​ទៀត ​ក្នុង​ប្រកួត​នៅពេល​ខាងមុខៗ ស្រប​ពេល​មាន​កីឡាករ​ស្ទើរតែ​ពាក់កណ្ដាល​ក្រុម ទើបតែ​បញ្ចប់​បំពេញ​កាតព្វកិច្ច​នៅ​សាលា​បណ្ឌិតសភា​នគរបាល​ជាតិ​។ ម្យ៉ាងទៀត​ក្លិប​មាន​កីឡាករ​សំខាន់​ម្នាក់​បាន​ផ្ទេរចេញ​គឺ ទិ​ត្យ ឌី​ណា ទៅ​ចូលរួម​វិសាខា ខណៈ​ក្លិប​បាន​បន្ថែម​កម្លាំង​ចំនួន​២​នាក់​វិញ​គឺ សុះ ប្រុស ហ៊ីម និង​កីឡាករ​កូរ៉េខាងត្បូង No Dae-ho​។​

*​ព្រះខ័ន​រាជ​ស្វាយរៀង ប៉ះ​អាស៊ី​អឺរ៉ុប
ក្រុមព្រះ​ខ័ន​រាជ​ស្វាយរៀង ទទួល​ក្រុម​អាស៊ី​អឺរ៉ុប នៅវេលា ម៉ោង​៦​ល្ងាច​លើ​ទីលាន​កីឡដ្ឋាន​ខេត្តស្វាយរៀង ព្រមទាំង​មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ក​របស់​កម្ពុ​ជាថ្មី​។ ក្រុមព្រះ​ខ័ន​រាជ​ស្វាយរៀង មួយរយៈ​ចុងក្រោយ​នេះ​ហាក់​ជួប​បញ្ហា​រឿង​កីឡាករ​របួស​និង​កីឡាករ​សំខាន់ៗ​ជាប់​ពិន័យ​ពី​សំណាក់​គណៈកម្មការ​វិន័យ​របស់​សហព័ន្ធ​កីឡាបាល់ទាត់​កម្ពុជា​។ លោក Conor Nestor គ្រូ​បង្គោល​ក្លិប​ព្រះខ័ន​រាជ​ស្វាយរៀង សរសើរ​កូនក្រុម​ក្នុង​ប្រកួត​ចុងក្រោយ​ដែល​ធ្វើ​បានល្អ​។



យ៉ាងណា​លោក​បាន​ដោះដូរ​កីឡាករ​គួរ​ឲ្យ​ភ្ញាក់ផ្អើល​មួយ​ដើម្បី​ត្រៀម​ជើង​ទី​២​នេះ​។ ក្រុមព្រះ​ខ័ន​រាជ​ស្វាយរៀង កំពុងតែ​ឈរ​ចំណាត់ថ្នាក់​លេខ​៧​បណ្តោះអាសន្ន​ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៦​លើក​ស្មើគ្នា​៣​លើក​និង​ចាញ់​៧​លើក​។

ក្រុម​អាស៊ី​អឺរ៉ុប កំពុង​ដឹកនាំ​ដោយ​លោក សុក វាសនា ពេលនេះ​កំពុង​ឈរ​ចំណាត់ថ្នាក់​លេខ​៨​បណ្តោះអាសន្ន​ក្នុង​តារាង​រួម​ដែល​មាន​ក្រុម​ចំនួន​១២ ក្រោយ​ប្រកួត​បាន​១៦​លើក ឈ្នះ​បាន​៥​លើក ស្មើគ្នា​៣​លើក និង​ចាញ់​៨​លើក មាន​១៨​ពិន្ទុ​ក្នុង​ដៃ​។ ខ្សែប្រយុទ្ធ​កា​ម៉េ​រូ​ន Befolo Mbarga Privat ជា​កីឡាករ​ឆ្នើម​ម្នាក់​ក្នុង​ក្រុម​ក្រោយ​រក​គ្រាប់​បាន​១៨​គ្រាប់​ម្នាក់ឯង​កន្លងមក​នេះ​។

ចំណែក​ប្រកួត​ផ្សេងទៀត​ប្រចាំ​សប្ដាហ៍​ទី​១៧ នេះ​ត្រូវ​បន្ត​ប្រកួត​នៅ​ថ្ងៃអាទិត្យ ទី​១២ ខែសីហា ឆ្នាំ​២០១៨ ទៀត​ដោយ​ក្រុម​សូល​ទី​ឡូ​អង្គរ ប៉ះ​ក្រុម​ក្រសួងការពារជាតិ វេលា​ម៉ោង​៣និង៣០​នាទី ​លើ​ទីលាន​កីឡដ្ឋាន​ខេត្តសៀមរាប មាន​ផ្សាយ​ផ្ទាល់​តាម​ប៉ុស្តិ៍ BTV News​ហើយ​ក្រុម​បឹងកេត ប៉ះ​ក្រុម​វិសាខា នៅ​ម៉ោង​៦​ល្ងាច​លើ​ទីលាន​ពហុ​កីឡដ្ឋាន​ជាតិ មាន​ផ្សាយ​ផ្ទាល់​តាម​ប៉ុស្តិ៍ BTV News ដែរ​និង​ក្រុម​អគ្គីសនី​កម្ពុជា ទទួល​ក្រុម​ភ្នំពេញ​ក្រោ​ន នៅ​ម៉ោង​៣​រសៀល​លើ​ទីលាន​កីឡដ្ឋាន​អគ្គីសនី​កម្ពុជា មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ករ​បស់ CNCC៕

  

Source: Kampuchea Thmey Daily