ថ្នាក់ដឹកនាំ​ក្លិប​បឹងកេត ចេញទៅ​ទស្សនកិច្ច​សិក្សា​នៅ​ក្លិប​បាល់ទាត់​ឈៀង​រ៉ៃ សមាជិក​លី​គ​កំពូល​ប្រទេស​ថៃ

យោង​តាម​សេចក្តី​បញ្ជាក់​មកពី​ក្លិប​បឹងកេត បាន​អះអាង​ថា ​អនុប្រធាន​ក្លឹប​បឹងកេត​លោក រ៉ា​ច​នា​គិត វ៉ា​ស៊ុ​ណាន់ និង​អគ្គលេខា​របស់​ក្លឹប​លោក បែ មករា ព្រមទាំង​ក្រុមការងារ​មួយចំនួនទៀត​ បាន​ទៅធ្វើ​ទស្សនកិច្ច​ផ្លូវការ​ជាមួយ​ក្លិប​បាល់ទាត់​ឈៀង​រ៉ៃ​យូរ​ណាយ​ធី​ត (CHIANG RAI UNITED)​ដែលមាន​មូលដ្ឋាន​នៅ​ខេត្ត​ឈៀង​រ៉ៃ ប្រទេស​ថៃ​។



ប្រភព​បន្ត​ទៀត​ថា «​ក្នុង​ដំណើរ​ទស្សនកិច្ច​នៅ​ក្លិប​ស្ថិត​ក្នុង​លី​គ​កំពូល​របស់​ប្រទេស​ថៃ​នេះ​មាន​រយៈពេល​២​ថ្ងៃ​ក្នុង​គោលបំណង​បង្កើន​កិច្ច​សហប្រតិបត្តិការ​រ​វាង​ក្លិប​ទាំងពីរ​ក៏ដូចជា​សិក្សា​ស្វែងយល់​បន្ថែម​លើ​ចំណុច​សំខាន់ៗ​ដែល​អាច​ញ៉ាំង​ឲ្យ​វិស័យ​កីឡា​មួយ​នេះ​កាន់តែ​មាន​ភាព​រីកចម្រើន​។ បន្ថែម​លើ​នេះ​ទៅទៀត​ថ្នាក់ដឹកនាំ​កំពូល​នៃ​ក្លិប​ទាំងពីរ​និង​បន្ដ​ជួប​ជជែក​ពិភាក្សា​គ្នា​បន្ថែម​លើ​ចំណុច​ជាច្រើន​ទៀត​»​។



​មាន​ដំណឹង​ក្រៅផ្លូវការ​មួយ​បញ្ជាក់ថា​ ការ​ធ្វើដំណើរ​របស់​ថ្នាក់ដឹកនាំ​ក្លិប​បឹងកេត ទៅកាន់​ក្លិប​មាន​មូលដ្ឋាន​នៅ​ភាគ​ខាងជើង​ប្រទេស​ថៃ នេះ គឺអាច​ទៅ​ច​ចា​លើ​កិច្ចព្រមព្រៀង​ក្នុង​ការនាំយក​ខ្សែប្រយុទ្ធ ចាន់ វឌ្ឍនាកា ទៅលេង​នៅ​ទីនោះ​ក្នុង​រដូវ​កាល​ក្រោយ​នៃ​ក្របខ័ណ្ឌ Thai-League​។



ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅ​ក្រៅ​ស្រុក​វិញ​ក្រុម​ ដែល​មាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើង​ដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផងដែរ​។ នៅ​ឆ្នាំ​២០១៨​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់លំដាប់​ទី២ ប្រចាំទ្វីប​អាស៊ី AF Cup ផងដែរ តែធ្លាក់​ត្រឹម​វគ្គជម្រុះ​តាមពូល​ដូចគ្នា៕

    

Source: Kampuchea Thmey Daily