អ្នកប្រដាល់វ័យក្មេងឈុត សេរីវ៉ាន់ថង ក្លិបរាហ៊ូកីឡាខេត្តបាត់ដំបង បានរបូតបាត់ខ្សែក្រវាត់ បន្ទាប់ពីគេប្រកួតចាញ់ឡុង ជិន អ្នកប្រដាល់ក្លិបខ្លារខិនមានរិទ្ធ ក្នុងការប្រកួតវគ្គផ្តាច់ព្រ័ត្រលើ សង្វៀនSEATV កាលពីល្ងាចថ្ងៃទី១៨ ខែសីហានោះ ធ្វើអោយឡុង ជិន ក្លាយជាម្ចាស់ជើងឯកខ្សែក្រវាត់Carabao ទម្ងន់៥៧គីឡូក្រាម។
ឡុង ជិន និង ឈុត សេរីវ៉ាន់ថង បានឡើងមកដល់វគ្គផ្តាច់ព្រ័ត្រដណ្ដើមតំណែងជើងឯកខ្សែក្រវាត់Carabaoនេះ បន្ទាប់ពីពួកគេទាំង២ រូបនេះ បានឆ្លងកាត់ក្នុងការប្រកួតជម្រុះ៤ប្រកួតកន្លងមកនោះ ។
នៅក្នុងការប្រកួតដណ្ដើមតំណែងជើងឯកខ្សែក្រវាត់នេះ ឡុង ជិន ប្រកួតឈ្នះឈុត សេរីវ៉ាន់ថងដោយពិន្ទុដាច់តែម្តង ពោលគឺ៥ទល់និង០ គឺចៅក្រមទាំង៥រូប បានផ្តល់ពិន្ទុអោយឡុង ជិន ឈ្នះទាំងអស់គ្នា។
ឈុត សេរីវ៉ាន់ថង ត្រូវបានគេរំពឹងទុកមុនការប្រកួតថា នឹងអាចឈ្នះឡុង ជិន នោះ ។ ក្រុមអ្នកលេងល្បែងភ្នាល់ក្រៅសង្វៀនសុទ្ធតែចាប់យកខាងឈុត សេរីវ៉ាន់ថងឈ្នះ តែទី បំផុតឈុត សេរីវ៉ាន់ថង ចាញ់ឡុងជិនទៅវិញ ហើយថែមទាំងចាញ់ដាច់ទៀត ។ លោក ឈុត សេរី ដែលជាឪពុករបស់វ៉ាន់ថង បានបង្ហោះសារក្នុងអាខោនរបស់លោកថា ឈុត សេរីវ៉ាន់ថង មានឪកាសប៉ុន្តែមិនអាចធ្វើបាន......។
ឡុង ជិន បានទទួលតំណែងជាម្ចាស់ខ្សែក្រវាត់ ដែលបានទទួលខ្សែក្រវាត់មួយ ពាន ១ និងប្រាក់រង្វាន់២០.០០០.០០០រៀល ប្រហាក់ប្រហែលនឹង៥.០០០ដុល្លារអាមេរិក ។ ចំពោះឈុត សេរីវ៉ាន់ថង ដែលបានលេខ ២ នោះ បានទទួលពានមួយ និង ប្រាក់រង្វាន់១២.០០០.០០០រៀល ប្រហាក់ប្រហែល៣.០០០ដុល្លារអាមេរិក។
គួរបញ្ជាក់ថា ព្រឹត្តិការណ៍ខ្សែក្រវាត់Carabao រដូវកាលទី៦ ទម្ងន់៥៧គីឡូក្រាម ដែលប្រកួតលើសង្វៀនSEA-TV នេះ មានអ្នកប្រដាល់ចូលរួមចំនួន៨រូប ក្នុងនោះខ្មែរ៤រូប និងថៃ៤ រូប ហើយបានដំណើរការប្រកួតអស់រយៈពេលជាង២ខែ ដោយចាប់ផ្ដើមពីថ្ងៃទី០២មិថុនា ២០១៨ ហើយបានមកបញ្ចប់នៅថ្ងៃទី១៨ សីហា ២០១៨។ ចំពោះគូដែលប្រកួតអមគូខ្សែក្រវាត់នេះ ជាការប្រកួតលក្ខណះអន្តរជាតិនោះ មាជ សុខរ៉ា អ្នកប្រដាល់ក្លិបតាព្រហ្មមានជ័យ បានប្រកួតចាញ់ពិន្ទុអ្នកប្រដាល់ថៃKhon Krong Thap ។
ចំណែក រ៉ែម រាជ អ្នកប្រដាល់ក្លិបដីឡូតិ៍មានរិទ្ធ គេបានផ្តួលយកឈ្នះឆាយម៉េត អ្នកប្រដាល់ក្លិបសំរោងកោងកីឡាខេត្តបាត់ដំបង ក្នុងទឹកទី៤ ៕
ជម្រុះជុំទី២ដណ្តើមប្រាក់លានទម្ងន់៦៥គ.ក្រ ៖ ហុងជីវ៉ុងចាញ់ អ៊ុំ វណ្ណេត ខណះ មុតខ្លឹមខ្មៅ ឈ្នះដោយស្វ័យប្រវត្តិ
ព្រឹត្តិការណ៍ប្រកួតប្រដាល់ជម្រុះដណ្តើមប្រាក់១០លានរៀល របស់ក្រុមហ៊ុនស្រាបៀរGanzberg ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍សប្តាហ៍ទី៣ កាលពីយប់ថ្ងៃទី១៨សីហា២០១៨នោះ លទ្ធផលគឺ ហុង ជីវ៉ុង អ្នកប្រដាល់ក្លិបមិត្តប៉ូលីស បានប្រកួតចាញ់អ៊ុំ វណ្ណេត អ្នកប្រដាល់ក្លិបការិយាល័យទី៥កងទ័ពជើងគោក ក្នុងទឹកទី៣ ហើយមួយគូទៀតមុត ខ្លឹមខ្មៅ អ្នកប្រដាល់ក្លិបមកុដរាជសីហ៍ បានឈ្នះដោយស្វ័យប្រវត្តិ បន្ទាប់ពីដៃគូរបស់គេ គឺង៉ែត្រ រដ្ឋា អ្នកប្រដាល់ក្លិបតាព្រហ្មមានជ័យ មានជម្ងឺមិនអាចធ្វើការប្រកួតបាននោះ ។
ចំពោះការប្រកួតជាលក្ខណះមិត្តភាពអន្តរជាតិកម្ពុជា-ថៃនិងរុស្សីវិញ សរ រាជសីហ៍ អ្នកប្រដាល់ជើងខ្លាំងកម្ពុជា ក្លិបមោងឫស្សីមរតកគុនខ្មែរខេត្តបាត់ដំបង បានវាយឈ្នះ អ្នកប្រដាល់រុស្សី Aushev ដោយពិន្ទុ បន្ទាប់ពីប្រកួតគ្នា៥ទឹកពេញនោះ ។ ពួកគេប្រកួតគ្នាក្នុងប្រភេទទម្ងន់៧៥ គីឡូក្រាម ។
ឯ សុខ សាវិន អ្នកប្រដាល់ជើងខ្លាំង នៃក្លិបឆ្មាសសែនសុខគុនខ្មែរ បានផ្តួលអ្នកប្រដាល់ថៃPhat Srakeo អោយសន្លប់ក្នុងទឹកទី៥ ក្នុងការជួបប្រកួតគ្នាទម្ងន់៦០គ.ក្រ ។ Phat Sra keo ត្រូវសុខ សាវិន ដាល់ចំកណ្តាលមុខមួយដៃពេញតែម្តង បណ្តាលឲ្យPhat Srakeo ដួលសន្លប់លែងក្រោក៕
Source: Kampuchea Thmey Daily
0 Comments