ការវាយឆ្មក់លើវាលខ្សាច់មួយនៅរដ្ឋ New Mexico បានរកឃើញកុមារចំនួន១១នាក់ស្លៀកពាក់រហែករយ៉ីរយ៉ៃ និងរស់នៅក្នុងភាពកខ្វក់ ហើយក៏បានទម្លាយរឿងរ៉ាវដ៏ចម្លែកទាក់ទងនឹងកាំភ្លើងនិងការបណ្តេញខ្មោចអារក្សព្រមទាំងកុមារដែលបាត់ខ្លួនម្នាក់ផងដែរ។
ឪពុករបស់ក្មេងប្រុសម្នាក់គឺជាមនុស្សម្នាក់ក្នុងចំណោមមនុស្ស៥នាក់ដែលត្រូវបានចាប់ខ្លួនបន្ទាប់ពីមានការឆ្មក់ក្បែរព្រំដែនជាប់រដ្ឋ Colorado ។ ឯកសារដែលបង្ហាញជាសាធារណៈនៅក្នុងការដាក់ពាក្យបណ្តឹងរបស់តុលាការកាលពីថ្ងៃចន្ទបាននិយាយថា ឪពុកបានប្រាប់ម្តាយរបស់ក្មេងប្រុសរូបនោះមុនពេលគេចខ្លួនពី Georgia ថា គាត់ចង់ធ្វើពិធីបណ្តេញខ្មោចអារក្សលើកូនព្រោះគាត់ជឿថា កូនត្រូវខ្មោចចូល។
តម្រួតតំបន់ Taos County លោក Jerry Hogrefe បាននិយាយថា ក្រុមមន្ត្រីបានចាប់ខ្លួនឪពុកឈ្មោះ Siraj Ibn Wahhaj និងមនុស្សពេញវ័យ៤នាក់ផ្សេងទៀតពីបទរំលោភបំពានលើកុមារបន្ទាប់ពីការរកឃើញក្មេងទាំង១១នាក់កាលពីថ្ងៃសុក្រនៅបរិវេណបណ្តោះអាសន្នមួយក្នុងសហគមន៍ Amalia ។ អាជ្ញាធរនិយាយថា ទីនោះគឺពោរពេញទៅដោយសំរាមនិងខ្វះទឹកស្អាត។
តម្រួតនិយាយថា នៅក្នុងនោះ លោក Wahhaj អាយុ៣៩ឆ្នាំត្រូវបានប្រទះឃើញមានប្រដាប់ដោយអាវុធជាច្រើនរួមទាំងកាំភ្លើង AR-15 មួយដើមផងដែរមុនពេលគាត់ត្រូវនាំទៅឃុំខ្លួន។
កូនប្រុសរបស់គាត់ឈ្មោះ Abdul-ghani ដែលមានអាយុ៣ឆ្នាំនៅពេលបាត់ខ្លួនកាលពីខែធ្នូគឺមិនស្ថិតក្នុងចំណោមកុមារដែលត្រូវបានរកឃើញនោះទេ។ ប៉ុន្តែលោក Hogrefe បាននិយាយថា អាជ្ញាធរមានមូលហេតុជឿជាក់ថា ក្មេងប្រុសម្នាក់នេះគឺស្ថិតនៅបរិវេណនេះកាលពីប៉ុន្មានសប្តាហ៍មុន។
ម្តាយរបស់ក្មេងប្រុសនេះបានប្រាប់អាជ្ញាធរថា ក្មេងប្រុសនេះមានរោគប្រគ្រីវកាច់ដោយមិនអាចដើរបានទេហើយទាមទារឲ្យមានការយកចិត្តទុកដាក់ជាប្រចាំ។ នាងបានប្រាប់ប៉ូលិសកាលពីខែធ្នូថា Wahhaj បាននាំក្មេងប្រុសនេះទៅឧទ្យានមួយហើយមិនដែលត្រឡប់មកវិញទេ។
ប៉ូលិសតំបន់ Clayton បាននិយាយនៅក្នុងរបាយការណ៍មនុស្សបាត់ខ្លួនថា Wahhaj និងកូនប្រុសរបស់គាត់ត្រូវបានគេប្រទះឃើញចុងក្រោយបំផុតនៅថ្ងៃទី១៣ខែធ្នូក្នុងរដ្ឋ Alabama ដោយធ្វើដំណើរជាមួយកុមារប្រាំនាក់ផ្សេងទៀតនិងមនុស្សពេញវ័យពីរនាក់។
វាមិនត្រូវបានគេដឹងភ្លាមៗទេថាតើលោក Wahhaj និងអ្នកដទៃទៀតដែលត្រូវបានចោទប្រកាន់ពីបទរំលោភបំពានលើកុមារនៅក្នុងរដ្ឋ New Mexico បានជួលមេធាវីដែរឬក៏អត់នោះទេ។ ការិយាល័យមេធាវីរដ្ឋនៅតំបន់ Taos County មិនបានតបសារភ្លាមៗពី The Associated Press ដើម្បីសុំយោបល់ឡើយ។
យោងតាមលោក Hogrefe បានឲ្យដឹងថា ការឆែកឆេរនៅបរិវេណនេះបានកើតឡើងចំពេលការស៊ើបអង្កេតរយៈពេលពីរខែដោយសហការជាមួយអាជ្ញាធរតំបន់ Taos County និង FBI ៕ REUTERS
Source: Kampuchea Thmey Daily
0 Comments