សរ រាជសីហ៍ អ្នកប្រដាល់ជើងខ្លាំងរបស់កម្ពុជា បានប្រកួតឈ្នះ អ្នកប្រដាល់អ៊ីរ៉ង់Aboofazel ដោយពិន្ទុ នៅក្នុងជួបប្រកួតគ្នាក្នុងកម្មវិធីប្រដាល់ពេលព្រឹកBoostrong Fighter On Fire លើសង្វៀនSEATV ថ្ងៃអាទិត្យទី ១៦ កញ្ញា ២០១៨។
អ្នកប្រដាល់ក្លិបមោងឫស្សីមរតកគុនខ្មែរខេត្តបាត់ដំបងសរ រាជសីហ៍ និងអ្នកប្រដាល់អ៊ីរ៉ង់Aboofazel ប្រកួតគ្នាក្នុងប្រភេទទម្ងន់៧៥ គីឡូក្រាម ។ក្នុងការប្រកួតគ្នា៥ទឹកនោះ មានលក្ខណះ តឹងតែងបំផុត ព្រោះថា Aboofazel គេក៏ចេះប្រដាល់គុនខ្មែរច្បាស់គ្រាន់បើដែរ ដែលធ្វើអោយ សរ រាជសីហ៍ ពិបាកនឹងផ្តួលមុនទឹក៥នោះ។
Aboofazelគេជាអ្នកប្រដាល់ជើងថ្មី ដែលហ្វឹកហាតនៅស្រុកថៃ ។ គេមានស្នៀតកណ្តាប់ដៃល្អ ខ្លាំង និងរហ័ស ហើយចេះស្នៀតជង្គង់ថែមទៀត ។ អ្នកប្រដាល់រូបនេះ មានប្រវត្តិប្រកួតចំនួន៣៧លើក ដោយឈ្នះ២៦ដង ចាញ់១១ លើកនិងមិនដែលស្មើ។
គួរបញ្ជាក់ឲ្យដឹងដែរថា សរ រាជសីហ៍ កាលពីថ្ងៃទី១៨សីហា២០១៨កន្លងទៅនេះ បានវាយផ្តួលអ្នកប្រដាល់ជនជាតិរុស្សីឈ្មោះ Aushev យកឈ្នះដោយពិន្ទុ នៅលើសង្វៀនSEATV នេះ។ ចំពោះការប្រកួតរវាងអ្នកប្រដាល់រួមជាតិវិញ សូត្រ ខេវិន អ្នកប្រដាល់វ័យក្មេងនៃក្លិបបក្សីស្លាបដែក គេពុំអាចសម្រេចក្នុងការសងសឹក ផាន រះ អ្នកប្រដាល់ក្លិបតាព្រហ្មមានជ័យ នោះទេ ដោយក្នុងការជួបសងសឹកនេះ ខេវិនវាយចាញ់ផាន រះ ដោយពិន្ទុទៀត។
ម៉ន ភីរម្យ អ្នកប្រដាល់ក្លិបការិយាល័យទី៥ កងទ័ពជើងគោក ដែលឡើងសងសឹកធន់ អៀងឡៃ អ្នកប្រដាល់សមាគមកីឡាប្រដាល់ក្រសួងការពារជាតិនោះ មិនត្រូវបានគណៈកម្មការបច្ចេកទេសប្រកាសលទ្ធផលនោះឡើយ ដោយសារក្នុងការប្រកួតនេះ គណៈកម្មការមើលឃើញថាម៉ន ភីរម្យ គេវាយមិនអស់ពីសមត្ថភាព ពោលគឺគេមិនវ៉ៃតែម្តង ៕
ឯម ឡេងលី ឈ្នះ ខុន ក្រុងថេប ខណះ វេង សុភ័ក្រ ស្មើ ហា ឆ្លាម
អ្នកប្រដាល់ជើងខ្លាំងកម្ពុជា២រូប ដែលត្រូវគេផ្គូឲ្យជួបប្រកួតជាមួយអ្នកប្រដាល់ថៃ លើសង្វៀនWurkz កាលពីរសៀលថ្ងៃអាទិត្យទី១៦កញ្ញា២០១៨នោះ ម្នាក់ឈ្នះ ម្នាក់ចាញ់ ។
អ្នកដែលឈ្នះនោះ គឺ ឯម ឡេងលី អ្នកប្រដាល់ជើងខ្លាំងស្រករក្រោយ ក្លិបថ្មគោលពោធិសែនជ័យ បានវាយឈ្នះ អ្នកប្រដាល់ថៃឈ្មោះខុន ក្រុងថេប ( Khon Krong Thap )ដោយពិន្ទុ បន្ទាប់ពីប្រកួតគ្នា៥ទឹកពេញនោះ ។ ពួកគេទាំងពីរ ប្រកួតគ្នាក្នុងទម្ងន់៧១គីឡូក្រាម ។
ចំណែកអ្នកដែលវាយស្មើជាមួយថៃវិញនោះ គឺ វេង សុភ័ក្រ អ្នកប្រដាល់កងពលតូចទ័ពឆ័ត្រយោង៩១១ បានប្រកួតស្មើពិន្ទុជាមួយ ហា ឆ្លាម(Ha Chhlam) អ្នកប្រដាល់ថៃ ក្នុងប្រភេទទម្ងន់៦៣,៥០០គីឡូក្រាម ។
ហា ឆ្លាម កាលពីថ្ងៃទី០១កញ្ញា២០១៨បានផ្តួលសេង ស្រឿនអ្នកប្រដាល់ក្លិបមហិទ្ធរិទ្ធតាដំបងដែក អោយសន្លប់ក្នុងទឹកទី២ តែមកលើកនេះមិនអាចយកឈ្នះវេង សុភ័ក្រ បាននោះឡើយ ។
គង់ សំបូរ អ្នកប្រដាល់ជើងខ្លាំង ដែលបានបាត់មុខពីសង្វៀនជិតមួយឆ្នាំនោះ ពេលនេះគេនៅតែអាចវាយឈ្នះចេង គា អ្នកប្រដាល់ក្លិបសាលវ័ន្តកីឡា ដោយពិន្ទុដែរ ក្នុងការជួប ប្រកួតគ្នាក្នុងទម្ងន់៦៣,៥០០គីឡូក្រាម ។
ចំណែក ភួង ពិសិដ្ឋ អ្នកប្រដាល់ក្លិបរាជសីហ៍ខេត្តរតនគិរី ប្រកួតឈ្នះ នួន រ៉ាថេន អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែងដោយពិន្ទុ ក្នុងការជួបប្រកួតគ្នាក្នុងទម្ងន់៥៧គីឡូក្រាម ៕
សូត្រ ប៊ុនធី និង លី ភា រកបាន៣ពិន្ទុដូចគ្នា ក្នុងជម្រុះលើកទី១ ខ្សែក្រវាត់ខារ៉ាបាវរដូវកាលថ្មីនៅSEA-TV
អ្នកប្រដាល់សូត្រ ប៊ុនធី ក្លិបបក្សីស្លាបដែក និង លី ភា អ្នកប្រដាល់ក្លិបសំរោងកោងខេត្តបាត់ដំបង បានទទួលបាន៣ពិន្ទុដូចគ្នា នៅក្នុងការប្រកួតជម្រុះលើកទី១ ដណ្តើមខ្សែក្រវាត់ខារ៉ាបាវរដូវកាលទី៧ ទម្ងន់៦០គីឡូក្រាម កាលពីរសៀលថ្ងៃទី១៥កញ្ញា២០១៨ នៅលើសង្វៀនSEA-TV ។
សូត្រ ប៊ុនធី បានវាយឈ្នះអ្នកប្រដាល់ថៃ Phat Thana ដោយពិន្ទុដាច់តែម្តង គឺ៥ទល់០ ហើយមួយគូទៀត លី ភា គេក៏បានប្រកួតឈ្នះអ្នកប្រដាល់ថៃ Phat Ngenthong ដោយពិន្ទុដែរ គ្រាន់តែឈ្នះមិនឯកច្ឆ័ន្ទគឺ៤ទល់១ប៉ុណ្ណោះ។
ដូច្នេះ សូត្រ ប៊ុនធី និង លី ភា អ្នកប្រដាល់កម្ពុជាយើង ដែលថិតក្នុងពូលA(ពូលខ្មែរ) ពួកគេទាំងពីរទទួលបាន៣ពិន្ទុម្នាក់ដូចគ្នា ហើយ Phat Thana និង Phat Ngenthong បាន១ពិន្ទុម្នាក់ សម្រាប់ការប្រកួតជម្រុះលើកដំបូងនេះ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៧ ទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន ៨ រូប ចូលរួមប្រកួត គឺខ្មែរ៤នាក់ ថៃ៤នាក់។ អ្នកប្រដាល់ខ្មែរទាំង៤នាក់នោះ រួមមានឃីម បូរ៉ា ក្លិបរស្មីភូមិគាបខេត្តបន្ទាយមានជ័យ , សុខ សាវិន ក្លិបឆ្មាសសែនសុខគុនខ្មែរ , លី ភា ក្លិបសំរោងកោងខេត្តបាត់ដំបង និងសូត្រ ខេវិន ក្លិបបក្សីស្លាបដែក។ ឯ អ្នកប្រដាល់ថៃ ៤ នាក់វិញ មាន Phat ChhayakPhum , Phat Maha , Phat Ngenthong និង Phat Thana៕
ជម្រុះជុំទី៣ដណ្តើមប្រាក់លានទម្ងន់៦៥គ.ក្រ ៖ ង៉ែត រដ្ឋាចាញ់មាសសុជាតិ, អ៊ុំ វណ្ណេត ឈ្នះ ដោយស្វ័យប្រវត្តិ
ព្រឹត្តិការណ៍ប្រកួតប្រដាល់ជម្រុះដណ្តើមប្រាក់១០លានរៀល របស់ក្រុមហ៊ុនស្រាបៀរGanz berg ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍ សម្រាប់សប្តាហ៍ទី៧ យប់ថ្ងៃទី១៥កញ្ញា២០១៨ ដែលជាការប្រកួតជុំទី៣នោះ ង៉ែត្រ រដ្ឋា អ្នកប្រដាល់ក្លិបតាព្រហ្មមានជ័យ បានប្រកួតចាញ់ មាស សុជាតិ អ្នកប្រដាល់ក្លិបឃ្លាំងមឿងកីឡាខេត្តពោធិសាត់ ក្នុងទឹកទី២ ហើយមួយគូទៀត អ៊ុំ វណ្ណេត អ្នកប្រដាល់ក្លិបការិយាល័យទី៥ កងទ័ពជើងគោក បានឈ្នះដោយស្វ័យប្រវត្តិ បន្ទាប់ពីដៃគូរបស់គេហ៊ឹម សារ៉ាន់ អ្នកប្រដាល់សមាគមកីឡាប្រដាល់ក្រសួងការពារជាតិបានបោះបង់ការប្រកួតនោះ ។
គួរបញ្ជាក់ថា អ៊ុំ វណ្ណេត ដែលឈ្នះស្វ័យប្រវត្តិលើហ៊ឹម សារ៉ាន់នោះ ត្រូវគេអោយធ្វើការប្រកួតជាមួយរិន សារ័ត្ន អ្នកប្រដាល់ក្លិបកងទ័ពជើងទឹក ក្នុងលក្ខណះមិត្តភាពដកស្រង់បច្ចេកទេស ដែលការប្រកួតនេះ ជ័យជម្នះបានទៅលើអ៊ុំ វណ្ណេត ឈ្នះដោយពិន្ទុ ។
ឈឿន ឆៃដែន ចាញ់ថៃទឹក២ ខណះយុគ យក្សគីល ចាញ់អ៊ីរ៉ង់ទឹក២ដែរ
ឈឿន ឆៃដែន អ្នកប្រដាល់ក្លិបនិរោធមានជ័យ បានវាយចាញ់អ្នកប្រដាល់ថៃYorth Phit ក្នុងទឹកទី២ ក្នុងការជួបប្រកួតគ្នា នាយប់ថ្ងៃទី០៨កញ្ញា២០១៨ នៅលើសង្វៀនGanzberg Top Fighter របស់SEA-TV ។
Yorth Phit អ្នកប្រដាល់ថៃ បានបញ្ចប់ឈឿន ឆៃដែន លែងឲ្យតដៃបាន ក្រោយពីគេបានដាល់ចូលពោះទឹករបស់ឆៃដែន ដែលធ្វើអោយឆៃដែនចុកសន្លប់លែងក្រោកតែម្តង ។
ចំពោះ អ្នកប្រដាល់ជើងចាស់យុគ យក្សគីល ក្លិបកងចក្ររាជសីហ៍មានរិទ្ធវិញ ក៏បានប្រកួតចាញ់អ្នកប្រដាល់អ៊ីរ៉ង់ឈ្មោះHosein Nasiri ក្នុងទឹកទី២ដែរ ។ ពួកគេទាំងពីរ ប្រកួតគ្នាក្នុងទម្ងន់៧៣គីឡូក្រាម៕
Source: Kampuchea Thmey Daily
0 Comments