កម្មវិធី​ជួបជុំ​រវាង​អ្នក​កីឡាករ​ភ្នំពេញ​ក្រោ​ន​និង​អ្នកគាំទ្រ​បានបញ្ចប់​ដោយ​រលូន

ក្លិប​បាល់ទាត់​ម្ចាស់​ជើងឯក​៦​សម័យកាល​ភ្នំពេញ​ក្រោ​ន សមាជិក​ពានរង្វាន់​លី​គ​កំពូល​កម្ពុជា (Metfone Cambodian League 2018) បានរៀបចំ​កម្មវិធី​ជួបជុំ​អ្នកគាំទ្រ​(Fan Appreciation Day) នៅ​ដើម​សប្ដាហ៍​នេះហើយ​បានបញ្ចប់​ដោយ​ជោគជ័យ អមដោយ​ភាពសប្បាយ​រីករាយ និង​ភាព​ស្និទ្ធស្នាល​រវាង​អ្នកគាំទ្រ និង​គ្រូបង្វឹក កីឡាករ​។



ប្រភព​មកពី​ក្លិប​ភ្នំពេញ​ក្រោ​ន បញ្ជាក់​ថា ​គោលបំណង​សំខាន់​នៃ​ការរៀបចំ​កម្មវិធី​នេះ​គឺ​មាន​បីដូច​ជា ប្រមូល​ផ្តុំ​អ្នកគាំទ្រ ជួបជុំគ្នា​រវាង​គ្រូ បុគ្គលិក កីឡាករ ជាមួយ​អ្នកគាំទ្រ និង​ចែករំលែក​ពី​ទស្សន​វិស័យ​របស់​ក្លឹប​សម្រាប់​ពេល​អនាគត​ទៅកាន់​អ្នកគាំទ្រ​។ ​បើ​ទោះបី​ជា​មេឃ​ភ្លៀង​ខ្លាំង​យ៉ាងណា​ក៏​អ្នកគាំទ្រ​ក្លឹប​បាល់ទាត់​ភ្នំពេញ​ក្រោ​ន​បាន​ចូលរួម​លេង​សប្បាយ ញាំ​អាហារ និង​រាំ​សប្បាយ​ជាមួយ​ក្រុម​កីឡាករ​។



ចំពោះ​ពានរង្វាន់​លី​គ​កំពូល​កម្ពុជា ក្រុម​ភ្នំពេញ​ក្រោ​ន អស់​ឱកាស​ប្រជែង​ជើងឯក​ហើយ ពោល​គឺ​រក្សា​ចំណាត់ថ្នាក់​លេខ​៥​ឲ្យ​គង់វង្ស​ជា​ជម្រើស​ដ៏​ល្អ​ព្រោះ​អស់​ឱកាស​ទៅ​ប្រជែង​ចំណាត់ថ្នាក់​លេខ​៤​ទៀតហើយ ពោល​គឺ​ក្រោយ​ប្រកួត​បាន​២១​លើក ឈ្នះ​បាន​១០​លើក ស្មើគ្នា​៣​លើក​និង​ចាញ់​៨​លើក​មាន​៣៣​ពិន្ទុ ពោលគឺ​ចាញ់​ក្រុម​កំពូល​តារាង​ណាហ្គា​វើ​ល រហូតដល់​២០​ពិន្ទុ ទោះបីជា​នៅសល់​១​ប្រកួត​ក្នុង​ដៃ​ទៀត​ក៏ដោយ​។ ចំពោះ​ប្រកួត​ដែល​នៅសល់​ចុងក្រោយ​ក្រុម​ភ្នំពេញ​ក្រោ​ន ត្រូវ​ប៉ះ​បឹងកេត​អែ​ហ្វ​ស៊ី​។



ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup)​វិញ​ក្រុម​ក្រុម​ភ្នំពេញ​ក្រោ​ន បាន​ធ្លាក់​ចេញ​ត្រឹម​វគ្គ​៨​ក្រុម​ចុងក្រោយ កាលពីពេល​ថ្មីៗ បន្ទាប់ពី​ចាញ់​ក្រុម​អង្គ​រថា​យ​ហ្គឺ​រ ដែល​មកពី​ខេត្តសៀមរាប ដោយ​បាល់​ប៉េ​ណាំង​ទី​កាត់សេចក្តី​៤​ទល់​៣ ក្រោយ​ប្រកួត​ស្មើគ្នា​ទាំង​២​ជើង​៤​ទល់​៤​។ លោក Sean Sainsbury ដែលជា​គ្រូបង្វឹក​នៅតែមាន​ឆន្ទៈ​ដាក់​កីឡាករ​ក្មេងៗ​ឲ្យ​ប្រកួត​នៅក្នុង​ប្រកួតដែល​នៅ​សល់​ដើម្បី​ពង្រឹង​បច្ចេកទេស​និងសមត្ថភាព​ត្រៀម​ទៅ​ថ្ងៃ​អនាគត​៕

Source: Kampuchea Thmey Daily