ថៃឃាត់ខ្លួនជនជាតិខ្មែរម្នាក់ រួមនឹងរថយន្តដែលមានដឹកឈើគ្រញូង

Cambodia News September 17, 2018

ប្រទេសថៃ ៖ ជនជាតិខ្មែរម្នាក់ រួមជាមួយនឹងរថយន្តដ៏ទំនើបមួយគ្រឿង ដែលមានបង្កប់ឈើគ្រញូងប្រមាណ ជាង២០ដុំ ត្រូវបានកំលាំងជំនាញថៃ ដែលឈរជើងនៅច្រកទ្វារអន្តរជាតិជាំស្រងាំ ក្នុងស្រុកកាបឈើង ខេត្តសុរិន្ទ ធ្វើការឃាត់ខ្លួនដោយដកហូតវត្ថុតាងព្រមទាំងបានបញ្ជូនទៅកាន់អង្គភាពជំនាញស្រុកកាបឈើង ផងដែរ ដើម្បីសាកសួរតាមនិតិវិធី។

តាមរបាយការណ៍ថៃបានបញ្ជាក់ថា ការឃាត់ខ្លួនជនជាតិខ្មែរម្នាក់នេះ គឺបានធ្វើឡើងនៅវេលាម៉ោង ៣ និង ៣០ នាទី រសៀល ថ្ងៃទី ១៦ ខែកញ្ញា ឆ្នាំ២០១៨ ត្រង់បរិវេណច្រកទ្វារអន្តរជាតិជាំស្រងាំ ស្ថិតក្នុងឃុំដាន ស្រុកកាបឈើង ខេត្តសុរិន្ទ ប្រទេសថៃ ។ ដោយបុរសម្នាក់ដែលជាជនជាតិខ្មែរនោះមានឈ្មោះ អួន លីហ៊រ អាយុ២២ឆ្នាំ រស់នៅភូមិផ្អង សង្កាត់កូនក្រៀល ក្រុងសំរោង ខេត្តឧត្តមានជ័យ ។

ការឃាត់ខ្លួននេះ គឺជនសង្ស័យបានបើកបររថយន្តមួយគ្រឿងចូលទៅក្នុងទឹកដីថៃតាមច្រកអន្តរជាតិជាំស្រងាំ ចូលទៅក្នុងខេត្តសុរិន្ទ លុះពេលចេញមកវិញទើបកំលាំង បានធ្វើការត្រួតពិនិត្យ ដោយរថយន្តនោះម៉ាក លុចស៊ីស RX 300 ពាក់ស្លាកលេខ ភ្នំពេញ 2-AE 7608 គឺសមត្ថកិច្ចថៃបានរកឃើញមានការលបបង្កប់ឈើគ្រញូងចំនួន ២៤ ដុំ។

ក្រោយពេលរកឃើញវត្ថុតាងរួចមក កំលាំងសមត្ថកិច្ចថៃប្រចាំច្រក បានធ្វើការប្រគល់ទាំងមនុស្ស រួមនិងវត្ថុតាង ទៅអោយខាងមេព្រៃស្រុកកាបឈើង ដើម្បីនាំយកទៅសាកសួរបន្ត ព្រមទាំងបាននាំយកវត្ថុតាងទៅរក្សាទុកជាបណ្តោះអាសន្នផងដែរ៕