ភ្នំពេញ ៖ មេបញ្ជាការប៉េអិមខេត្តព្រះវិហារត្រូវបានកូនចៅក្រោមឱវាទចោទប្រកាន់ថា បានស៊ីដាច់លុយឧបត្ថម្ភចំនួន៨០លានរៀល ដែលជាលុយឧបត្ថម្ភដល់អង្គភាព ដើម្បីចែកមន្ត្រីអាវុធហត្ថ ដែលករណីនេះ ធ្វើឲ្យកូនចៅមិនសប្បាយចិត្ត និងបានស្នើឲ្យលោកនាយឧត្តមសេនីយ៍ សៅ សុខា មេប៉េអិមលើផ្ទៃប្រទេស មេត្តាពិនិត្យមើលករណីនេះផង ប៉ុន្តែត្រូវបានបដិសេធ។
ប្រភពច្បាស់ការណ៍ បានប្រាប់អ្នកសារព័ត៌មានថា លោកឧត្តមសេនីយ៍ត្រី កង សៅគុណ មេបញ្ជាការប៉េអិមខេត្តព្រះវិហារ បានស៊ីដាច់លុយរបស់លោកនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការកងយោធពលខេមរភូមិន្ទ និងជាមេបញ្ជាការកងរក្សសម្តេចតេជោ ហ៊ុន សែន ប្រមាណ៨០លានរៀល ដែលបានឧបត្ថម្ភដល់អង្គភាព "ខ26-2" កាលពីមុនពេលបោះឆ្នោតជ្រើសតាំងតំណាងរាស្ត្រ នីតិកាលទី៦ ហើយក្រៅពីបញ្ហាលុយនេះ ក៏នៅមានសកម្មភាពមិនប្រក្រតីមួយចំនួនទៀតផងដែរ។
ប្រភពដដែលបានបញ្ជាក់ថា សកម្មភាពមិនប្រក្រតីធំៗរបស់លោកឧត្តមសេនីយ៍ត្រី កង សៅគុណ មានដូចជា ទី១, យកដីអង្គភាព មកធ្វើជាកម្មសិទ្ធិរបស់ខ្លួន ដូចជាដីនៅស្នាក់ការស្រយ៉ង់ និងដីស្នាក់ការកំពង់ស្រឡៅ។ ទី២, បង្ខំមេបញ្ជាការមូលដ្ឋានតាមបណ្តា ក្រុង ស្រុក កាត់ប្រាក់ខែក្នុងមួយខែ៥០ម៉ឺនរៀល ដើម្បីធ្វើអគារថ្មតាមបណ្តាក្រុង-ស្រុក ហើយអួតថា ខ្លួនជាអ្នកកសាង។ ទី៣, គំរាមកំហែងមេបញ្ជាការរង រហូតដល់យុទ្ធជន ប្រមាថចាប់ដាក់គុក កាត់ឈ្មោះចោល។ ទី៤, ចាប់ឡានដឹកឈើខុសច្បាប់នៅស្រុកជ័យសែន ជំរិតទារប្រាក់ចំនួន៦លានរៀល កាលពីថ្ងៃទី០៣ខែកញ្ញាឆ្នាំ២០១៨ជាថ្នូរនឹងការដោះលែងទៅវិញ។ ទី៥, ចំពោះឡានដឹកឈើខុសច្បាប់ចេញពីដេប៉ូនៅក្នុងខេត្ត គឺត្រូវបង់ក្នុងមួយឡានចំនួន៥០០ដុល្លារ។ ទី៦, ចំពោះឡានយីឌុបដឹកឈើខុសច្បាប់ផ្សេងៗទៀត ដែលឆ្លងកាត់ក្នុងខេត្តត្រូវបង់ក្នុងមួយឡានចំនួន ១៥០ដុល្លារ។
ចំពោះករណីខាងលើនេះ ក្រុមមន្ត្រីប៉េអិមនៅខេត្តព្រះវិហារ ទទូចសូមឲ្យនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថផ្ទៃប្រទេស ចាត់ក្រុមអធិការកិច្ចចុះស្រាវជ្រាវករណីនេះផង។
ទាក់ទងករណីនេះ ការិយាល័យយើងមិនទាន់អាចស្វែងរកការបញ្ជាក់ពីលោកឧត្តមសេនីយ៍ត្រី កង សៅគុណ នៅឡើយទេ ប៉ុន្តែបើតាមលិខិតមួយ ដែលអះអាងថា ជាលិខិតបំភ្លឺរបស់មេបញ្ជាការកងរាជអាវុធហត្ថខេត្តព្រះវិហារបានអះអាងថា លុយដែលនាយឧត្តមសេនីយ៍ ហ៊ីង ប៊ុនហៀង ចំនួន១២,៥០០ដុល្លារនេះ គឺផ្ដល់សម្រាប់ទិញសម្ភារ ដំឡើងវិទ្យុទាក់ទង បម្រើឲ្យការងារសន្ដិសុខ នៅតាមមូលដ្ឋាន មិនមែនសម្រាប់ចែកដល់មន្ដ្រីអាវុធហត្ថទេ...។ ចំណែកចំណុចផ្សេងទៀត លិខិតបំភ្លឺនោះបានរៀបរាប់ដូចព័ត៌មានខាងលើ តែបានបដិសេធថា មិនមែនជាការពិតទេ៕
Source: Kampuchea Thmey Daily
0 Comments