ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា ប្រទេសកម្ពុជាជាប្រទេសឯករាជ្យ និងមានអធិបតេយ្យភាពគ្រប់គ្រាន់ មិនស្ថិតនៅក្រោមអាណានិគមនិយមរបស់សហគមន៍អឺរ៉ុបឡើយ ដូច្នេះសេចក្តីសម្រេចរបស់សភាអឺរ៉ុប គឺជាជ្រៀតជ្រែកចូលកិច្ចការផ្ទៃក្នុងរបស់កម្ពុជាទាំងកំរោល ដែលមិនអាចទទួលយកបានទេ។
អ្នកនាំពាក្យគណបក្សប្រជាជនកម្ពុជា លើកឡើងបែបនេះ បន្ទាប់ពីសភាអឺរ៉ុបបានបោះឆ្នោតអនុម័តលើសេចក្តីសម្រេចចិត្តមួយស្តីពីស្ថានការណ៍នៅក្នុងកម្ពុជា ដោយបានស្នើឲ្យរាជរដ្ឋាភិបាលកម្ពុជា ទម្លាក់ការចោទប្រកាន់លើលោក កឹម សុខា និងបានទាមទារឲ្យមានការទម្លាក់បទចោទប្រកាន់លើថ្នាក់ដឹកនាំនយោបាយផ្សេងទៀត របស់អតីតគណបក្សសង្គ្រោះជាតិ មានទាំងលោកសម រង្ស៊ីផងដែរ។
ឆ្លើយតបនឹងសេចក្តីសម្រេចនេះ លោក សុខ ឥសាន លើកឡើងថា ”ប្រទេសកម្ពុជាជាប្រទេសឯករាជ្យ និងមានអធិបតេយ្យ មិនមែនស្ថិតនៅក្រោមនឹមអាណានិគមនិយមរបស់សហគមន៍អឺរ៉ុបឡើយ។ តើសភាសហគមន៍អឺរ៉ុប សម្រេចសេចក្តីលើបញ្ហាកម្ពុជាផ្អែកលើច្បាប់ស្អី? តើផ្អែកលើរដ្ឋធម្មនុញ្ញនៃសហភាពអឺរ៉ុបឬ? តើមានចែងពីរឿងដាក់ទណ្ឌកម្មលើកម្ពុជាឬទេ ? ការសម្រេចលើបញ្ហាកម្ពុជា ដោយមិនក្តាប់បានបញ្ហាកម្ពុជា ឆ្លុះបញ្ចាំងឲ្យឃើញថា សភាសហគមន៍អឺរ៉ុបជ្រៀតជ្រែកចូលកិច្ចការផ្ទៃក្នុងកម្ពុជាយ៉ាងកំរោល”។
តាមលោក សុខ ឥសាន សេចក្តីសម្រេចរបស់សភាហគមន៍អឺរ៉ុប មានលក្ខណៈបណ្តោះអាសន្ន មិនអាចយកទៅអនុវត្តបាននៅឡើយ ដោយសារត្រូវនៅឆ្លងបណ្តារដ្ឋាភិបាលប្រទេស២៨នៃសហគមន៍អឺរ៉ុបសិន ហើយចំណុចមួយចំនួននៃសេចក្តីសម្រេចនេះ មិនត្រូវបានទទួលយកដោយរដ្ឋាភិបាលនៃប្រទេសក្នុងសហគមន៍អឺរ៉ុបឡើយ ។ បណ្តារដ្ឋាភិបាលប្រទេសសហគមន៍អឺរ៉ុប និងសភាសហគមន៍អឺរ៉ុប នៅត្រូវការពេលវេលាមួយជាកំណត់ ដើម្បីពិភាក្សាតវ៉ាគ្នាទៅទៀត មុននឹងមានសេចក្តីសម្រេចណាមួយជាចុងក្រោយ។ ដូច្នេះផ្អែកតាមគោលការណ៍នេះ សភាសហគមន៍អឺរ៉ុប មិនងាយនឹងឈានដល់គោលដៅក្នុងការដាក់ទណ្ឌកម្មមកលើកម្ពុជា បានតាមបំណងរបស់ខ្លួនឡើយ។
គួររំលឹកថា កាលពីថ្ងៃព្រហស្បតិ៍ ទី១៣ ខែកញ្ញា ឆ្នាំ២០១៨ សភាអឺរ៉ុបបានបោះឆ្នោតអនុម័តបានអនុម័តដោយលើកដៃ លើសេចក្តីសម្រេចចិត្តមួយ ស្តីពីស្ថានការណ៍នៅក្នុងកម្ពុជា ដោយបានស្នើឲ្យរដ្ឋាភិបាលកម្ពុជា ទម្លាក់ចោលការប្រកាន់ និងដោះលែងលោក កឹម សុខា ឲ្យមានសេរីភាពពេញលេញឡើងវិញ។ តាមសេចក្តីសម្រេចនោះ ក្រៅពីករណីលោក កឹម សុខា សភាអឺរ៉ុបក៏បានទាមទារឲ្យមានការទម្លាក់ចោល ការចោទប្រកាន់លើថ្នាក់ដឹកនាំនយោបាយផ្សេងទៀត របស់អតីតគណបក្សប្រឆាំង ក្នុងនោះមានលោក សម រង្ស៊ីផងដែរ៕
Source: Kampuchea Thmey Daily
0 Comments