អាមេរិក​ដាក់ទណ្ឌកម្ម​អង្គភាព​យោធា​ចិន​សម្រាប់​ការទិញ​យន្ដហោះ​និង​មី​ស៊ី​ល​របស់​រុស្ស៊ី

សហរដ្ឋអាមេរិក​បាន​ពង្រីក​ការដាក់ទណ្ឌកម្ម​របស់​ខ្លួន​ប្រឆាំងនឹង​រុស្ស៊ី​ទៅដល់​ប្រទេស​ចិន​ហើយ​កាលពី​ថ្ងៃ​ព្រហស្បតិ៍​ដោយ​ប្រកាស​ពី​វិធានការ​ដាក់ទណ្ឌកម្ម​ប្រឆាំងនឹង​អង្គភាព​យោធា​ចិន​មួយ​ដោយសារ​ការទិញ​យន្ដហោះ​ចម្បាំង​និង​មី​ស៊ី​ល​របស់​រុស្ស៊ី។

ក្រសួងការបរទេស​អា​មេ​រិ​កបាន​និយាយថា ខ្លួន​កំពុង​ដាក់ទណ្ឌកម្ម​ហិរញ្ញវត្ថុ​លើ​នាយកដ្ឋាន​អភិវឌ្ឍន៍​ឧបករណ៍​នៃ​ក្រសួងការពារជាតិ​ចិន​និង​អ្នកគ្រប់គ្រង​កំពូល​របស់ខ្លួន​ចំពោះ​ការទិញ​យន្តហោះ​ចម្បាំង​Sukhoi Su-35​និង​មី​ស៊ី​លបាញ់​ពី​ដី​ទៅ​អាកាស​S-400 របស់​រុស្ស៊ី​នាពេល​ថ្មីៗ​នេះ​។​

ក្រុមមន្ត្រី​បាន​និយាយថា វា​គឺជា​លើក​ទី​១​ហើយ​ដែល​ប្រទេស​ទី​៣​ត្រូវបាន​ដាក់ទណ្ឌកម្ម​ក្រោម​ច្បាប់​ទណ្ឌកម្ម CAATSA សម្រាប់​ការទាក់ទង​ជាមួយ​ប្រទេស​រុស្ស៊ី​ហើយ​បានបង្ហាញ​ពី​ឆន្ទៈ​របស់​រដ្ឋបាល​លោក Trump ដែល​ហ៊ាន​ប្រថុយ​ផ្តាច់ទំនាក់ទំនង​ជាមួយ​បណ្តា​ប្រទេស​ដទៃទៀត​នៅក្នុង​យុទ្ធនាការ​របស់ខ្លួន​ប្រឆាំងនឹង​ទីក្រុង​មូ​ស្គូ​។​

ពួកគេ​ក៏បាន​និយាយ​ផងដែរ​ថា សហរដ្ឋអាមេរិក​អាច​ចាត់វិធានការ​ស្រដៀង​គ្នា​នេះ​ប្រឆាំងនឹង​ប្រទេស​ដទៃទៀត​ដែល​កំពុង​ដឹកជញ្ជូន​យន្ដហោះ​ចម្បាំង​និង​មី​ស៊ី​ល​រុស្ស៊ី​។ សម្ព័ន្ធមិត្ត​របស់​អាមេរិក​គឺ​ប្រទេស​ទួរគី​កំពុង​ពិភាក្សា​ជាមួយ​ក្រុង​មូ​ស្គូ​អំពី​កិច្ចព្រមព្រៀង​ទិញ​មី​ស៊ី​ល S400 ។​

មន្ត្រីរដ្ឋបាល​ជាន់ខ្ពស់​ម្នាក់​បាន​ប្រាប់​អ្នកកាសែត​ក្នុង​លក្ខខណ្ឌ​សុំ​មិន​បញ្ចេញ​ឈ្មោះថា “​គោលដៅ​ចុងក្រោយ​នៃ​ទណ្ឌកម្ម​ទាំងនេះ​គឺ​ប្រទេស​រុស្ស៊ី​។ ការដាក់ទណ្ឌកម្ម​រប​ស់ CAATSA មិនមាន​បំណង​ធ្វើ​ឲ្យ​ប៉ះពាល់​ដល់​សមត្ថភាព​ការពារ​របស់​ប្រទេស​ណាមួយ​នោះទេ​។ វា​សំដៅ​ទៅលើ​ការខាតបង់​របស់​រុស្ស៊ី​ក្នុងការ​ឆ្លើយតប​ទៅនឹង​សកម្មភាព​អាក្រក់​របស់​ខ្លួន​”​។​

CAATSA ឬ​ច្បាប់​ប្រឆាំងនឹង​សត្រូវ​របស់​អាមេរិក​តា​មរយៈ​ការដាក់ទណ្ឌកម្ម​ត្រូវបាន​អនុម័ត​ក្នុង​ឆ្នាំ​២០១៧​ជា​ឧបករណ៍​មួយ​ដែល​ផ្តល់​ឲ្យ​រដ្ឋបាល​លោក Trump នូវ​វិធី​បន្ថែមទៀត​ដើម្បី​កំណត់​ទិសដៅ​លើ​រុស្ស៊ី អ៊ីរ៉ង់​និង​កូរ៉េខាងជើង​ដោយ​ការដាក់ទណ្ឌកម្ម​សេដ្ឋកិច្ច​និង​នយោបាយ​។​

ក្រសួងការបរទេស​បាន​និយាយថា ទាក់ទង​ទៅនឹង​ប្រទេស​រុស្ស៊ី​, CAATSA បានកើត​ឡើង​ពី​ការឈ្លានពាន​របស់​ប្រទេស​នេះ​នៅ​អ៊ុយ​ក្រែ​ន​, ការ​កាត់​យក​ឧបទ្វីប Crimea, ការរំលោភបំពាន​និង​ការវាយប្រហារ​លើ​អ៊ីនធឺណិត ការជ្រៀតជ្រែក​ក្នុងការ​បោះឆ្នោត​ឆ្នាំ​២០១៦​និង​សកម្មភាព​អាក្រក់​ផ្សេងទៀត​" ។​

ច្បាប់​នេះ​អនុញ្ញាត​ឲ្យ​រដ្ឋាភិបាល​ចាត់វិធានការ​ប្រឆាំង​ក្រុមហ៊ុន​និង​បុគ្គល​ទាំងឡាយណា​ដែល​ត្រូវ​បានដាក់​នៅក្នុង​បញ្ជីខ្មៅ​របស់ CAATSA ៕ AFP

​

Source: Kampuchea Thmey Daily