នាយករដ្ឋមន្ត្រី​អ៊ីស្រាអែល​រិះគន់​អ៊ីរ៉ង់​ដោយ​អះអាង​ថា មាន​ឃ្លាំង​បរមាណូ​សម្ងាត់

នាយករដ្ឋមន្ត្រី​អ៊ីស្រាអែល​កាលពី​ថ្ងៃ​ព្រហស្បតិ៍​បាន​ចោទប្រកាន់​សត្រូវ​គឺ​ទីក្រុង​តេ​រ៉ង់​ថា​មាន​ឃ្លាំង​បរមាណូ​សម្ងាត់​ហើយ​បាន​សន្យាថា ប្រទេស​របស់លោក​នឹងមិន​អនុញ្ញាត​ឲ្យ​អ៊ីរ៉ង់​ផលិត​អាវុធ​នុយក្លេអ៊ែរ​ទេ​។​

លោក Benjamin Netanyahu បាន​ប្រាប់​មហាសន្និបាត​អង្គការសហប្រជាជាតិ​ថា “​អ៊ីរ៉ង់​មិនបាន​បោះបង់ចោល​គោលបំណង​របស់ខ្លួន​ក្នុងការ​អភិវឌ្ឍ​អាវុធ​នុយក្លេអ៊ែរ​ទេ​”​។ លោក Netanyahu តែងតែ​ប្រើ​មហាសន្និបាត​ប្រចាំ​ឆ្នាំនេះ​ដើម្បី​ផ្តោតលើ​ប្រទេស​អ៊ីរ៉ង់​។​

លោក​បាន​និយាយថា “​អ៊ីស្រាអែល​នឹងមិន​អនុញ្ញាត​ឲ្យ​របប​មួយ​ដែល​អំពាវនាវ​ឲ្យ​មានការ​បំផ្លិចបំផ្លាញ​ដើម្បី​អភិវឌ្ឍ​អាវុធ​នុយក្លេអ៊ែរ​ទេ​។ មិនមែន​ឥឡូវនេះ មិនមែន​១០​ឆ្នាំ​ទៀត​មិនមែនជា​រៀងរហូត​។ អ៊ីស្រាអែល​នឹងធ្វើ​អ្វីដែល​ខ្លួន​ត្រូវធ្វើ​ដើម្បី​ការពារ​ខ្លួន​ប្រឆាំងនឹង​ការឈ្លានពាន​របស់​អ៊ីរ៉ង់​”​។ នាយករដ្ឋមន្ត្រី​រូបនេះ​បាន​បន្ថែមថា “​អ្វីដែល​អ៊ីរ៉ង់​លាក់ អ៊ីស្រាអែល​នឹង​រកឃើញ​”​។​

អ៊ីស្រាអែល​បាន​ប្រឆាំង​យ៉ាង​ដាច់អហង្ការ​ចំពោះ​កិច្ចព្រមព្រៀង​នុយក្លេអ៊ែរ​អ៊ីរ៉ង់​ដែល​សម្របសម្រួល​ដោយ​សហរដ្ឋអាមេរិក រុស្ស៊ី ចិន​និង​បណ្តា​ប្រទេស​អឺរ៉ុប​ក្នុង​ឆ្នាំ​២០១៥​និង​បាន​អបអរសាទរ​លោក​ប្រធានាធិបតី Donald Trump សម្រាប់​ការដើរ​ចេញពី​កិច្ចព្រមព្រៀង​នេះ​។​

លោក Netanyahu បាន​បើក​សុន្ទរកថា​របស់លោក​ដោយ​អះអាងថា ប្រទេស​អ៊ីរ៉ង់​មាន​ឃ្លាំង​បរមាណូ​សម្ងាត់​មួយ​នៅក្នុង​ទីក្រុង​តេ​រ៉ង់​។ លោក​បានលើកឡើង​បែបនេះ​ដោយមាន​កាន់​ផែនទី​និង​រូបថត​នៃ​បរិវេណ​ដែល​លោក​បាន​ជំរុញ​ឲ្យ​ទីភ្នាក់ងារ​បរមាណូ​រប​ស់​អង្គការសហប្រជាជាតិ​ពិនិត្យមើល​។​

លោក​បាន​និយាយថា “​ថ្ងៃនេះ​ខ្ញុំ​សូម​បង្ហាញ​ជា​លើកដំបូង​ថា ប្រទេស​អ៊ីរ៉ង់​មាន​កន្លែង​សម្ងាត់​មួយ​ផ្សេងទៀត​នៅក្នុង​ទីក្រុង​តេ​រ៉ង់​ដែលជា​ឃ្លាំង​បរមាណូ​ដ៏​អាថ៌កំបាំង​សម្រាប់​រក្សាទុក​គ្រឿង​បរិក្ខា​ដ៏​ធំ​សម្បើម​និង​សម្ភារៈ​ពី​កម្មវិធី​អាវុធ​នុយក្លេអ៊ែរ​សម្ងាត់​របស់​អ៊ីរ៉ង់​”​។​

លោក​ក៏បាន​អះអាង​ផងដែរ​ថា កងជីវពល​និកាយ​ស៊ី​អ៊ី​ត Hezbollah លី​បង់​ដែលមាន​ទំនាក់ទំនង​ជាមួយ​អ៊ីរ៉ង់​បានដាក់​ទីតាំង​មី​ស៊ី​ល​ចំនួន​បី​នៅក្បែរ​ព្រលានយន្តហោះ​ក្រុង​បេ​រូត​។ លោក​បាន​កាន់​នូវ​អ្វីដែល​លោក​ហៅថា​ជា “​រូបភាព​នៃ​កាំជ្រួច​មី​ស៊ី​ល​រាប់ពាន់​គ្រាប់​”​។​
​ទោះបីជា​យ៉ាងណាក៏ដោយ រដ្ឋមន្ត្រីការបរទេស​អ៊ីរ៉ង់​លោក Mohammad Javad Zarif ក្រោយមក​បាន​ចំអក​មើលងាយ​ការចោទប្រកាន់​របស់ Netanyahu ដោយ​និយាយថា ការអះអាង​ពីមុនៗ​របស់​អ៊ីស្រាអែល​គឺ​មិន​ផ្អែកលើ​ការពិនិត្យ​ពិច័យ​ទេ​នៅពេល​មានការ​ស៊ើបអង្កេត​ដោយ​ភ្នាក់ងារ​ថាមពល​អា​តូ​មិ​ក​អន្តរជាតិ​របស់​អង្គការសហប្រជាជាតិ​ទេ​៕ AFP

​

[caption id="attachment_981864" align="alignnone" width="700"] ​[/caption]

Source: Kampuchea Thmey Daily