កណ្តាល ៖ នគរបាលប៉ុស្តិ៍រដ្ឋបាល និង កម្លាំងជំនាញប្រឆាំងបទល្មើសគ្រឿងញៀនស្រុកស្អាង កាលពីយប់ថ្ងៃទី២៥ ខែកញ្ញា ឆ្នាំ២០១៨ បានឃាត់ខ្លួនជនសង្ស័យជាមុខសញ្ញាជួញដូរគ្រឿងញៀនចំនួន៣នាក់ ដកហូតវត្ថុតាងថ្នាំញៀនចំនួន១០កញ្ចប់នៅចំណុចឃុំស្អាងភ្នុំនិងឃុំតាលន់។
លោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា ជនសង្ស័យ៣នាក់ និង ថ្នាំញៀនចំនួន១០កញ្ចប់ ត្រូវបានបង្ក្រាបនៅចំណុចផ្សេងពីគ្នាទី១នៅចំណុច ចុងព្រែកតាមុល ស្ថិតក្នុងភូមិ ដំរីឆ្លង ឃុំ ស្អាងភ្នំ ស្រុកស្អាង វេលាម៉ោង១៩និង៣០នាទីថ្ងៃទី២៥ ខែកញ្ញា ឆ្នាំ២០១៨។
ជនសង្ស័យ ចំនួន០២នាក់ (ឃាត់ខ្លួន) ១ / ឈ្មោះ លន់ ស៊ីថា ភេទប្រុស អាយុ២២ឆ្នាំ ជនជាតិ ខ្មែរ មុខរបរ កសិករ ២ / ឈ្មោះតុន ចន្ទ្រា ភេទ ប្រុស អាយុ ២៣ឆ្នាំ ជនជាតិ ខ្មែរ មុខរបរ កសិករអ្នកទាំងពីរនាក់ខាងលើមានទីលំនៅបច្ចុប្បន្នភូមិ ដំរីឆ្លង ឃុំ ស្អាងភ្នំស្រុកស្អាង ខេត្តកណ្តាល ។វត្ថុតាងចាប់យករួមមាន៖
១ / ម្សៅក្រាមពណ៌សថ្លាសង្ស័យថា ជាសារធាតុញៀន(ម៉ាទឹកកក) ចំនួន៥កញ្ចប់។ទីតាំងទី២ នៅចំណុចភូមិ វាលត្រែង ឃុំ តាលន់ស្រុកស្អាងវេលាម៉ោង២៣និង៣៣នាទីថ្ងៃទី២៥ខែកញ្ញាឆ្នាំ២០១៨។
ជនសង្ស័យ ចំនួន ០១នាក់ (ឃាត់ខ្លួន)ឈ្មោះ យ៉ៃ បាន់ ភេទប្រុស អាយុ ២៥ឆ្នាំ ជនជាតិ វៀតណាម មុខរបរ កម្មករបាញ់ថ្នាំស្វាយ មានទីលំនៅៗភូមិវាលត្រែងឃុំតាលន់ ស្រុកស្អាង ខេត្តកណ្តាល។ វត្ថុតាងចាប់យករួមមាន ម្សៅក្រាមពណ៌សថ្លាសង្ស័យថា ជាសារធាតុញៀនប្រភេទ (ម៉ាទឹកកក) ចំនួន ០៥កញ្ចប់តូច។
លោកអធិការបញ្ជាក់ថា ថ្នាំញៀនទាំងនោះបើតាមចំលើយជនសង្ស័យសារភាពពួកគេបានទិញបន្តពីបក្សពួកមកចែកចាយភាគច្រើនជនសង្ស័យទិញពីចំណុចវាលខ្សាច់នៅចក្រអង្រែ។
លោកអធិការបានបញ្ជាក់ឲ្យដឹងទៀតថា ស្នងការនគរបាលខេត្តកណ្តាលលោកឧត្តមសេនីយ៍ទោ អ៊ាវ ចំរើនជានិច្ចជាកាលតែងតែដាស់តឿនក្រើនរំលឹកដល់កម្លាំងនគរបាលគ្រប់បណ្តាស្រុកក្រុងឲ្យយកចិត្តទុកដាក់ខ្ពស់ចំពោះសន្តិសុខ ក្នុងមូលដ្ឋានរបស់ខ្លួនត្រូវបង្ការ បង្ក្រាបរាល់បទល្មើសដូចភ្លៀងរលឹមដើម្បីសេចក្តីសុខរបស់ប្រជាពលរដ្ឋ៕
Source: Kampuchea Thmey Daily
0 Comments