មន្ទីរពេទ្យ​ ៖ បេក្ខជន​ឈានមុខ​នៃ​ការបោះឆ្នោត​ប្រេ​ស៊ី​ល​ចេញពី​បន្ទប់សង្គ្រោះបន្ទាន់​ហើយ

បេក្ខជន​ប្រធានាធិបតី​ឈានមុខ​របស់​ប្រទេស​ប្រេ​ស៊ី​ល​លោក Jair Bolsonaro បាន​ចេញពី​បន្ទប់សង្គ្រោះបន្ទាន់​ហើយ​កាលពី​ថ្ងៃអាទិត្យ​ បន្ទាប់ពី​ទទួល​ការវះកាត់​របួស​ដែល​គាត់​ត្រូវគេ​ចាក់​អំឡុង​ពេលធ្វើ​យុទ្ធនាការ​ឃោសនាបោះឆ្នោត។

វេជ្ជបណ្ឌិត​នៅ​មន្ទីរពេទ្យ Albert Einstein ក្នុង​ទីក្រុង Sao Paulo បាន​និយាយថា បេក្ខជន​ដែល​បាន​វះកាត់​ការស្ទះ​ពោះវៀនតូច​គឺ​ត្រូវបាន​ផ្ទេរ​ទៅកាន់​មណ្ឌល​ថែទាំ​ពាក់កណ្តាល​ហើយ​។​
​
ជនដៃដល់​ឆ្វេងនិយម​ម្នាក់​បាន​ចាក់​លោក Bolsonaro អាយុ​៦៣​ឆ្នាំ​នៅ​ថ្ងៃទី​៦​ខែកញ្ញា​ក្នុងអំឡុង​យុទ្ធនា​ការឃោសនា​មួយ​នៅ​ទីក្រុង Juiz de Flora ភាគ​អាគ្នេយ៍​រដ្ឋ Minas Gerais ។​
​
គាត់​បាន​រងរបួស​ពោះវៀន​យ៉ាងធ្ងន់ធ្ងរ​ហើយ​បាន​បាត់បង់​ឈាម​ប្រហែល​៤០​ភាគរយ​។​
​នៅក្នុង​សេចក្តីថ្លែងការណ៍​កាលពី​ថ្ងៃអាទិត្យ មន្ទីរពេទ្យ​បាន​ឲ្យ​ដឹងថា លោក Bolsonaro មាន​សុខ​ភាពល្អ​ប៉ុន្តែ​ត្រូវគេ​បញ្ចុក​ចំណី​តាម​វ៉ែន​។​
​
នៅ​ខាងក្រៅ​មន្ទីរពេទ្យ ក្រុម​អ្នកគាំទ្រ​មាន​គ្នា​ប្រហែល​២០០​នាក់​ដែល​ភាគច្រើន​ជា​អ្នកជិះ​ម៉ូតូ​បាននាំគ្នា​បង្ហាញ​ការគាំទ្រ​ដោយ​គ្រវីទង់ជាតិ​និង​តុបតែង​ប៉េងប៉ោង​យក្ស​មួយ​ដែលមាន​រូបលោក Bolsonaro ។​
​
ខណៈដែល​ការបោះឆ្នោត​ប្រធានាធិបតី​ថ្ងៃទី​៧​ខែតុលា​នៅសល់​រយៈពេល​ត្រឹមតែ​៣​សប្តាហ៍​ទៀត​ប៉ុណ្ណោះ​នោះ គ្រូពេទ្យ​មិន​បង្ហាញ​ពី​ពេលវេលា​ដែល​គាត់​អាច​ចេញពី​មន្ទីរពេទ្យ​បានទេ​។​
​
គាត់​ត្រូវបាន​ផ្ទេរ​ចេញពី​បន្ទប់សង្គ្រោះបន្ទាន់​ជា​លើកដំបូង​កាលពី​ថ្ងៃ​អង្គារ​មុន​ប៉ុន្តែ​បាន​វិលត្រឡប់​មកវិញ​បន្ទាប់ពី​ការវះកាត់​កាលពី​ថ្ងៃ​ពុធ​ដើម្បី​ដកចេញ​នូវ​អ្វីដែល​គ្រូពេទ្យ​រៀបរាប់ថា​ជា “​ការស្ទះ​ពោះវៀន​”​។​
​
បន្ទាប់ពី​ការចាក់​ប្រហារ អ្នកគ្រប់គ្រង​យុទ្ធនាការ​របស់គាត់​បា​ន​និយាយថា គាត់​ប្រហែលជា​ចំណាយពេល​១០​ថ្ងៃ​នៅក្នុង​មន្ទីរពេទ្យ​ប៉ុន្តែ​ឥឡូវនេះ​ទំនងជា​ត្រូវ​ស្នាក់នៅ​រយៈពេល​យូរ​៕ AFP

​

Source: Kampuchea Thmey Daily