ភ្នំពេញ ៖ តារាចម្រៀង និងម្ចាស់ជ័យលាភីកម្មវិធីប្រឡងចម្រៀងលំដាប់ថ្នាក់ពិភពលោក The Voice Cambodia រដូវកាលទី១លោក ប៊ុត សីហា ថ្មីៗនេះ បានបែកធ្លាយដំណឹងដ៏រសើបពាក់ព័ន្ធករណីគ្រឿងញៀនជាថ្មីបង្កជាការសង្ស័យ និងមន្ទិលពីសំណាក់ទស្សនិកជនអ្នកគាំទ្រ។
ស្របពេលដែលមានការបង្ហើបដំណឹងរសើបរបស់លោក ប៊ុត សីហា ខាងលើនេះបច្ចុប្បន្នបានក្លាយជាប្រធានបទក្តៅសម្រាប់ប្រព័ន្ធផ្សព្វផ្សាយនានា។ មិនតែប៉ុណ្ណោះក៏មានការលើកឡើងថារំលងពេលប៉ុន្មានថ្ងៃកន្លងមកនេះលោក ប៊ុត សីហា បានជាប់ពាក់ព័ន្ធនៅក្នុងករណីនៃការប្រើប្រាស់គ្រឿងញៀនជាថ្មីដែលប្រព្រឹត្តឡើងនៅផ្ទះសំណាក់មួយកន្លែងយ៉ាងភ្ញាក់ផ្អើល។
ជាប្រតិកម្មឆ្លើយតបចំពោះព័ត៌មានមួយនេះ សាមីខ្លួនលោក ប៊ុត សីហា ភ្លាមៗនោះ បានចេញមុខច្រានចោលនិងបញ្ជាក់ថា ដំណឹងនេះត្រឹមតែជាការបំផ្លើសការពិតប៉ុណ្ណោះ។ លោក ប៊ុត សីហា បានលើកឡើងថា បាន២បទ ដែលគេចូលចិត្តស្តាប់ ហើយក៏ត្រូវចិត្តបានរាងរើបៗមកវិញ ដល់ឃើញឯងរាងងើបមកវិញតិច ក្តិចឯងទៀត ក្នុងលោកនេះតើអាចទេ បើខ្ញុំសុំម៉ារស់ៗអាចទេ?។
តារាចម្រៀងដែលកន្លងមកធ្លាប់រងរឿងអាស្រូវគ្រឿងញៀនលោក ប៊ុត សីហា បានបន្ថែមថា រវល់ថតបទចម្រៀងជាមួយអ្នកសម្របសម្រួលអង្គការ បងប្រុស សុខ លីមរក្សា ថតបទភ្ជុំហើយនឹងអាលបានថតសាច់រឿងខ្លី របស់គាត់ស្រាប់តែចេញព័ត៌មានណាឆ្កុយ។ ហួសចិត្តស្រុករំដួល ខ្ញុំឆ្អែត តោះកុំខ្វល់សំខាន់ធ្វើមិនដឹង ទៅជាយ៉ាងណាក៏ទៅៗហើយ។
គេចាំបានថា សមត្ថកិច្ចខណ្ឌពោធិ៍សែនជ័យកាលពីថ្ងៃទី១៩ ខែកញ្ញា ឆ្នាំ២០១៨កន្លងមកនេះបានបើកប្រតិបត្តិការចុះបង្ក្រាបគ្រឿងញៀននៅទីតាំងផ្ទះសំណាក់មួយកន្លែងដោយបានឃាត់ខ្លួនជនសង្ស័យនៅនឹងកន្លែងជាច្រើននាក់។ ខណៈក៏មានដំណឹងដ៏គួរឲ្យចាប់អារម្មណ៍មកថា ក្នុងចំណោមជនសង្ស័យចាប់ខ្លួនទាំងនោះក៏មានជាប់ពាក់ព័ន្ធនឹងលោក ប៊ុត សីហា ផងនោះ។ប៉ុន្តែជាប្រតិកម្មត្រូវបានតារាប្រុសរូបនេះឆ្លើយបដិសេធទាំងស្រុង៕
Source: Kampuchea Thmey Daily
0 Comments