ភ្នំពេញ ៖ មន្ត្រីជាន់ខ្ពស់ក្រសួងសុខាភិបាលបានអះអាងថា ក្រសួងសុខាភិបាលនឹងផាកពិន័យទឹកប្រាក់ចំនួន៤ម៉ឺនរៀលក្នុងមួយលើកទៅលើម្ចាស់ហាង ភោជនីយដ្ឋាន ឬសណ្ឋាគារទាំ ងឡាយណា ដែលបណ្តោយឲ្យភ្ញៀវជក់បារីនៅក្នុងទីតាំងរបស់ខ្លួន។
ថ្លែងនៅក្នុងពិធីបើកសិក្ខាសាលាស្តីពីភាពជាអ្នកដឹកនាំក្នុងការអនុវត្តន៍ច្បាប់ និងលិខិតបទដ្ឋានគតិយុត្តិនានាស្តីពីការត្រួតពិនិត្យផលិតផលថ្នាំជក់ដល់អាជ្ញាធរថ្នាក់ក្រោមជាតិ នៅសាលាខេត្តប៉ៃលិនកាលពីល្ងាចថ្ងៃទី២៧ ខែកញ្ញា ឆ្នាំ២០១៨ លោកវេជ្ជបណ្ឌិត អ៊ឹង ភីរុន រដ្ឋលេខាធិការក្រសួងសុខាភិបាលបានឲ្យដឹងថា «យើងមានក្រុមអធិការកិច្ចជាង៥០០នាក់ សម្រាប់ធ្វើការទៅលើច្បាប់អនុក្រឹត្យ ហើយបើសិនជាជនណាល្មើសជក់បារី ក្នុងតំបន់ហាមឃាត់ នឹងធ្វើការផាកពិន័យម្នាក់ ២ម៉ឺនរៀល។ លើសពីនោះបើចាប់បានអ្នកជក់បារីក្នុងភោជនីយដ្ឋាន ឬសណ្ឋាគារ នឹងត្រូវផាកពិន័យគុណនឹង២ដង ទៅលើម្ចាស់ហាងតែម្តង ដែលស្មើ៤ម៉ឺនរៀលក្នុងមួយដង»។
លោកវេជ្ជបណ្ឌិតបានបន្ថែមថា ដើម្បីកាត់បន្ថយអ្នកស្លាប់ និងឈឺដោយសារការជក់បារី និងការស្រូបផ្សែងបារី ក្រសួងសុខាភិបាល បានសហការជាមួយដៃគូពាក់ព័ន្ធ ពិសេសរាជរដ្ឋាភិបាល បានបង្កើតអនុក្រឹត្យស្តីពីការរៀបចំ និងប្រព្រឹត្តទៅ របស់គណៈកម្មាធិការត្រួតពិនិត្យផលិតផលថ្នាំជក់ ដែលមានតំណាងពាក់ព័ន្ធចំនួន ២០ក្រសួង ភាគីពាក់ព័ន្ធ ក្នុងការពង្រឹង និងអនុវត្តន៍ឲ្យមានតម្លាភាព និងប្រសិទ្ធភាព។
អង្គការសហប្រជាជាតិ បានទទួលស្គាល់ថា ការប្រើប្រាស់ថ្នាំជក់ ជាឧបសគ្គមួយរារាំងដល់ការសម្រេចបាន គោលដៅអភិវឌ្ឍន៍ ដោយសារការប្រើប្រាស់ថ្នាំជក់ ធ្វើឲ្យប៉ះពាល់ធ្ងន់ដល់សុខភាព សេដ្ឋកិច្ច យេនឌ័រ និងបរិស្ថានជាដើម។
យោងតាមរបាយការណ៍ អង្គការសុខភាពពិភពលោក ថ្នាំជក់សម្លាប់មនុស្ស ៧.២លាននាក់ក្នុងមួយឆ្នាំៗ ដោយក្នុងនោះមាន ៨០ភាគរយនៃអ្នកស្លាប់ទាំងនោះ នៅប្រទេសកំពុងអភិវឌ្ឍន៍។
ការប្រើប្រាស់ថ្នាំជក់នៅកម្ពុជាបានថយចុះជាបន្តបន្ទាប់ហើយចំពោះការអង្កេតស្រាវជ្រាវទូទាំងប្រទេស រៀងរាល់៥ឆ្នាំម្តង ស្តីពីការប្រើប្រាស់ថ្នាំជក់ ក្នុងចំណោមមនុស្ស ពេញវ័យអាយុចាប់ពី ១៨ឆ្នាំឡើងទៅ បានថយចុះក្នុងរយៈពេល១០ឆ្នាំចុងក្រោយនេះគឺបុរសថយចុះមកនៅ១៣,៦៨ភាគរយពោលគឺពី៤៨,៩៨ភាគរយ មកនៅត្រឹមតែ៣៥,៣ភាគចំណែកស្ត្រីថយចុះមកនៅ៨,៩៣ភាគរយពោលគឺពី២០,៥៣ភាគរយ មកនៅត្រឹមតែ ១១,៦ភាគរយ។
គួរបញ្ជាក់ថាបច្ចុប្បន្ននេះ មានប្រជាជនកម្ពុជាប្រមាណ ២លាននាក់ កំពុងប្រើប្រាស់ផលិតផលថ្នាំជក់ដោយបានចំណាយថវិកាប្រមាណ ២០១.៥លានដុល្លារអាមេរិកសម្រាប់ទិញបារីនិងប្រមាណ ១៦២.៧លានដុល្លារជារៀងរាល់ឆ្នាំទៅលើការព្យាបាលជំងឺព្រមទាំងការបាត់បង់កម្លាំងពលកម្មបណ្តាលមកពីជំងឺផ្សេងៗដែលបង្កឡើងដោយថ្នាំជក់៕
Source: Kampuchea Thmey Daily
0 Comments