ប្រទេសកូរ៉េខាងជើងនិងកូរ៉េខាងត្បូងបានបើកការិយាល័យទំនាក់ទំនងរួមគ្នាមួយនៅទីក្រុង Kaesong របស់ប្រទេសកូរ៉េខាងជើងនៅថ្ងៃសុក្រ ខណៈដែលពួកគេខិតខំធ្វើឲ្យទំនាក់ទំនងកាន់តែជិតស្និទ្ធមុនដំណើរទស្សនកិច្ចរបស់លោកប្រធានាធិបតី មូន ចេអ៊ីន ទៅទីក្រុងព្យុងយ៉ាងនៅសប្តាហ៍ក្រោយ។
រដ្ឋមន្ត្រីក្រសួងបង្រួបបង្រួមកូរ៉េខាងត្បូងលោក Cho Myoung-gyon បានប្រាប់ពិធីមួយថា “ជំពូកថ្មីមួយនៅក្នុងប្រវត្តិសាស្ត្របានបើកនៅទីនេះនៅថ្ងៃនេះ។ ការិយាល័យទំនាក់ទំនងនេះគឺជានិមិត្តរូបមួយទៀតនៃសន្តិភាពដែលបង្កើតរួមគ្នាដោយកូរ៉េខាងត្បូងនិងកូរ៉េខាងជើង”។
ក្រសួងបង្រួបបង្រួមបាននិយាយថា អាគារនេះរួមមានការិយាល័យដាច់ដោយឡែកពីគ្នារវាងកូរ៉េខាងជើងនិងខាងត្បូងនិងបន្ទប់សន្និសីទរួមមួយហើយត្រូវបានបង្កើតឡើងដើម្បីជួយសម្រួលដល់ការដោះដូរឆ្លងកាត់ព្រំដែនបន្ទាប់ពីកិច្ចប្រជុំកំពូលនៅភូមិ Panmunjom រវាងលោកមូននិងមេដឹកនាំកូរ៉េខាងជើងលោកគីមជុងអ៊ុន។
ក្រុងសេអ៊ូលនិងក្រុងព្យុងយ៉ាងបានស្វះស្វែងរកគម្រោងរួមគ្នាក្នុងវិស័យជាច្រើនចាប់តាំងពីកិច្ចប្រជុំកំពូលកាលពីខែមេសារបស់ពួកគេនៅក្នុងតំបន់គ្មានយោធាដែលបែងចែកឧបទ្វីបនេះថ្វីបើកិច្ចខិតខំប្រឹងប្រែងរបស់អាមេរិកដើម្បីធានាឲ្យមានវឌ្ឍនភាពជាក់លាក់ឆ្ពោះទៅរកការរំសាយអាវុធនុយក្លេអ៊ែររបស់កូរ៉េខាងជើងបានជាប់គាំងក៏ដោយ។
លោក មូន នឹងធ្វើដំណើរទស្សនកិច្ចរដ្ឋធានីរបស់ប្រទេសកូរ៉េខាងជើងនៅថ្ងៃអង្គារសម្រាប់ដំណើរទស្សនកិច្ចរយៈពេលបីថ្ងៃដែលនឹងជាលើកទី៣របស់លោកជាមួយនឹងលោកគីមក្នុងឆ្នាំនេះបន្ទាប់ពីលោកបានរៀបចំឲ្យមានការវិវត្តន៍ផ្នែកការទូតយ៉ាងឆាប់រហ័សនៅលើឧបទ្វីបនេះហើយលោកបានសម្របសម្រួលកិច្ចប្រជុំកំពូលនៅប្រទេសសិង្ហបុរីកាលពីខែមិថុនារវាងមេដឹកនាំកូរ៉េខាងជើងនិងប្រធានាធិបតីអាមេរិកលោកដូណាល់ត្រាំ។
នៅទីនោះ លោក គីម បានគាំទ្រការរំសាយអាវុធនុយក្លេអ៊ែរចេញពីឧបទ្វីបកូរ៉េប៉ុន្តែមិនមានសេចក្តីលម្អិតត្រូវបានព្រមព្រៀងឡើយហើយក្រុងវ៉ាស៊ីនតោននិងក្រុងព្យុងយ៉ាងមានមន្ទិលសង្ស័យអំពីអត្ថន័យនិងរបៀបដែលវានឹងត្រូវសម្រេចបាន៕ AFP
Source: Kampuchea Thmey Daily
0 Comments