ភ្នំពេញ ៖ ធនាគារអភិវឌ្ឍន៍អាស៊ី (ADB) បានអះអាងថា ផលិតផលសរុប នៅក្នុងស្រុករបស់កម្ពុជា នឹងបន្តរក្សាកំណើនរឹងមាំ នៅក្នុងឆ្នាំ២០១៨ និងឆ្នាំ២០១៩ ដែលនាំឲ្យមានការរំពឹងទុកថា ការនាំចេញ និងការប្រើប្រាស់ នឹងមានលទ្ធផលល្អប្រសើរ ព្រមទាំងធ្វើឲ្យមានអត្រាកំណើនសេដ្ឋកិច្ចក្នុងរង្វង់៧ភាគរយ នេះបើតាមសេចក្ដីប្រកាសចុះថ្ងៃទី២៦ ខែកញ្ញា។
នាយកធនាគារអភិវឌ្ឍន៍អាស៊ីប្រចាំកម្ពុជា អ្នកស្រីស៊ុននីយ៉ា ឌុរ៉ានី ចាម៉ាល (Sunniya Durrani – Jamal) បានលើកឡើងថា “សេដ្ឋកិច្ចរបស់ប្រទេសកម្ពុជា បន្តកើនឡើងក្នុងល្បឿនដ៏រឹងមាំ ដោយសារតែកំណើនការនាំចេញដ៏រឹងមាំ ការកើនឡើងនៃចំនួនភ្ញៀវទេសចរ តម្រូវការក្នុងស្រុកមានសន្ទុះខ្លាំងក្លា និងការពង្រីកគោលនយោបាយសារពើពន្ធ ប៉ុន្តែកំណើនប្រាក់ឈ្នួលដ៏ឆាប់រហ័ស ដោយពុំមានកំណើនផលិតភាព អាចបង្កឲ្យមានហានិភ័យក្នុងស្រុកចម្បងមួយ ដែលអាចប៉ះពាល់ដល់សមត្ថភាពប្រកួតប្រជែងជាមួយនឹងប្រទេសដទៃទៀត ដែលបន្តពឹងអាស្រ័យលើកម្លាំងពលកម្មដែលមានថ្លៃឈ្នួលទាប”។
សេចក្ដីប្រកាសនេះបន្ថែមថា ការកើនឡើងនៃការចំណាយរបស់រដ្ឋាភិបាល ដោយសារតែការបង្កើនការវិនិយោគសាធារណៈ និងបៀវត្សសម្រាប់វិស័យសាធារណៈ ក៏ជាកត្តាមួយជួយរុញច្រានសេដ្ឋកិច្ចកម្ពុជានៅក្នុងឆ្នាំ២០១៨នេះផងដែរ។ ជាមួយគ្នានេះ ADB បានបន្តថា ការនាំចេញរបស់កម្ពុជា នៅក្នុងឆមាសទី១ឆ្នាំ២០១៨ បានកើនឡើងចំនួន១៣,៣ភាគរយ ខណៈការនាំចូលបានកើនឡើងដល់២៥,៧ភាគរយ៕
Source: Kampuchea Thmey Daily
0 Comments