ពានរង្វាន់​«​កីឡាករ​សង្ហា​ជាងគេ​ប្រចាំឆ្នាំ​» កំពុង​បន្ត​ស្វែងរក​សំ​ឡេង​គាំទ្រ​នៅ​ដំណាក់កាល​ជុំ​ចុងក្រោយ

​ក្នុងចំណោម​កីឡាករ​ជាច្រើនរូប​ដែល​ត្រូវបាន​គណៈកម្មការ​ប្រកួត​បាល់ទាត់​ជាតិ​កម្ពុជា (CNCC) ដាក់​ឲ្យ​មហាជន​បោះឆ្នោត​គាំទ្រ​លើ​ហ្វេ​ស​ប៊ុ​ក​របស់​ខ្លួន អស់​រយៈពេល​កន្លងមក នៅពេល​បានធ្វើ​ដំណើរ​ដល់​វគ្គ​ជម្រុះ​ជុំ​ចុងក្រោយ​ហើយដោយ គេ​ឃើញថា​មានតែ​កីឡាករ​១០​នាក់​ប៉ុណ្ណោះ ដែល​ទទួលបាន​ចំនួន​គាំទ្រ​ច្រើនជាងគេ​នៅក្នុង​ពានរង្វាន់​«​កីឡាករ​សង្ហា​ជាងគេ​ប្រចាំឆ្នាំ​»​។

ពានរង្វាន់​នេះ​នឹង​ប្រកាស​លទ្ធផល​នៅក្នុង​កម្មវិធី CAMBODIAN FOOTBALL AWARD នៅ​ចុងរដូវ​កាល​នេះ​។ ជា​លទ្ធផល​កីឡាករ​១០​នាក់​ដែល​សល់​ក្នុង​បញ្ជី​ជម្រុះ​បឋម​នោះ​មាន​ចាន់ វឌ្ឍនាកា របស់​បឹងកេត ឆេង ម៉េង របស់​ណាហ្គា​វើ​ល លី វ៉ា​ហេ​ទ របស់​បឹងកេត រស់ សំអឿន របស់​វិសាខា Alexandre You របស់​ភ្នំពេញ​ក្រោ​ន កែវ សុខ​ផេង របស់​វិសាខា Harley Williard របស់​ព្រះខ័ន​រាជ​ស្វាយរៀង ប្រាក់ សុវណ្ណ​ពិសិដ្ឋ របស់​ព្រះខ័ន​រាជ​ស្វាយរៀង ព្រីង ចិ​ត្រា របស់​អាស៊ី​អឺរ៉ុប និង Kazuteru Okamoto របស់​អង្គ​រថា​យ​ហ្គឺ​រ​។​



សម្រាប់​ការប្រកួតប្រជែង​នៅ​ដំណាក់កាល​ទី​២​នេះ​ប្រព្រឹត្តទៅ​ចាប់ពី​ថ្ងៃទី​១៧ កញ្ញា ដល់​ថ្ងៃទី២៦ កញ្ញា ហើយ​កីឡាករ​រូប​ណា​ទទួល​បានការ​ចុច​ចូលចិត្ត (Like) ច្រើនជាងគេ នឹង​ឡើងទៅ​កាន់​ដំណាក់កាល​ទី​៣​។ ចំណែក​ដំណាក់កាល​ទី​៣​ឬ​ដំណាក់កាល​ចុង​ក្រោយនេះ​នឹង​ដាក់​ឲ្យ​ប្រកួតប្រជែង​យក Like ពី​ចន្លោះ​ថ្ងៃទី​២៨ កញ្ញា ដល់​ថ្ងៃទី​២៨ តុលា ឆ្នាំ​២០១៨​។



គេ​ចាំ​នៅក្នុង​ថ្ងៃ​នៅក្នុង​ព្រឹត្តិការណ៍ «​ពានរង្វាន់​បាល់ទាត់​កម្ពុជា​ប្រចាំឆ្នាំ (Cambodia Football Award» ដែល​រៀបចំឡើង​ដោយ CNCC កាលពី​ដើមឆ្នាំ​បាន​ចែក​ពានរង្វាន់​ជាច្រើន​ដល់​ម្ចាស់​ជយលាភី​ដែល​ពាក់ព័ន្ធ​ខណៈ​ម្ចាស់​ពានរង្វាន់​«​កីឡាករ​ដែល​សង្ហា​ជាងគេ​» បាន​ទៅ​កីឡាករ លី វ៉ា​ហេ​ទ របស់​ក្រុម​បឹងកេត ដែល​កាលនោះ​ទទួលបាន​ការគាំទ្រ​លើ​ហ្វេ​ស​ប៊ុ​ក​ច្រើនជាងគេ​។

​លោក ឆាំង ពិសិដ្ឋ អគ្គលេខាធិការ​របស់ CNCC ធ្លាប់​បាន​បញ្ជាក់​ជុំវិញ​កម្មវិធី CAMBODIAN FOOTBALL AWARD ថា «​យោងតាម​ថ្នាក់ដឹកនាំ ការបង្កើត​ពានរង្វាន់​នេះ​ឡើង​ដើម្បី​លើកទឹកចិត្ត​និង​ផ្ដល់​តម្លៃ​ដល់​កីឡាករ ក្លិប​នីមួយៗ គ្រូបង្វឹក មន្ត្រី​រៀបចំ​ការប្រកួត​និង​អ្នក​ពាក់ព័ន្ធ​ផង​ផ្សេងទៀត ដែល​តែងតែ​ខិតខំ​ប្រឹងប្រែង​កន្លងមក​ដល់​ដើម្បី​បាល់ទាត់​យើង​។ ព្រឹត្តិការណ៍​នេះ​យក​លំ​អាន​តាម​លំ​អាន​របស់​សហព័ន្ធ​កីឡាបាល់ទាត់​ទ្វីបអាស៊ី ខណៈ​យើង​រំពឹងថា​នឹង​វិវត្តន៍​ឲ្យ​កាន់តែ​រីកចម្រើន​នៅ​ថ្ងៃ​ខាងមុខ​»៕

Source: Kampuchea Thmey Daily