ភ្នំពេញ ៖ គណៈកម្មាធិការជាតិសុវត្ថិភាពចរាចរណ៍ បានអំពាវនាវឲ្យប្រប្រាស់ផ្លូវទាំងអស់ប្រកាន់យកចំណុចសំខាន់ៗចំនួន១០ ដើម្បីទប់ស្កាត់គ្រោះថ្នាក់ចរាចរណ៍ក្នុងឱកាសពិធីបុណ្យភ្ជុំបិណ្ឌខាងមុខ នេះបើតាមសេចក្តីអំពាវនាវចុះថ្ងៃទី២៦ ខែកញ្ញា ឆ្នាំ២០១៨។
សេចក្តីអំពាវនាវចុះហត្ថលេខាដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានលើកឡើងថា គណៈកម្មាធិការជាតិសុវត្ថិភាពចរាចរណ៍ផ្លូវគោក បានកោតសរសើរប្រកបដោយក្តីមោទនភាពជាទីបំផុត ចំពោះអ្នកប្រើប្រាស់ផ្លូវដ៏ច្រើនលើសលប់ ដែលមានឆន្ទៈក្នុងការចូលរួម និងអនុវត្តច្បាប់ស្តីពីចរាចរណ៍ផ្លូវគោកយ៉ាងផុសផុលក្នុងពេលធ្វើចរាចរណ៍ រួមចំណែកក្នុងការកាត់បន្ថយការបាត់បង់ជីវិត រងរបួស និងការខូចខាតទ្រព្យសម្បត្តិ ដោយគ្រោះថ្នាក់ចរាចរណ៍ផ្លូវគោកនាពេលកន្លងទៅ ប៉ុន្តែគ្រោះថ្នាក់ចរាចរណ៍ផ្លូវគោកនៅតែជាបញ្ហាប្រឈមចំពោះមុខ និងយូរអង្វែង ហើយវាអាចកើតឡើងភ្លាមៗ ក្នុងករណីអ្នកប្រើប្រាស់ផ្លូវមានការធ្វេសប្រហែស ឬខ្ជីខ្ជាមិនគោរពច្បាប់។
ក្នុងឱកាសពិធីបុណ្យភ្ជុំបិណ្ឌ ដែលនឹងប្រព្រឹត្តទៅចាប់ពីថ្ងៃទី៨ ដល់ថ្ងៃទី១០ ខែតុលា ឆ្នាំ២០១៨ខាងមុខនេះ យានយន្តធ្វើចរាចរ នឹងមានកំណើនកើនឡើងខ្ពស់ខុសប្រក្រតី ដែលអាចមានកំណើនគ្រោះថ្នាក់ចរាចរណ៍ ឬកកស្ទះចរាចរណ៍ ដូចក្នុងករណីបុណ្យនាពេលកន្លងទៅ។ ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសពិធីបុណ្យភ្ជុំបិណ្ឌខាងមុខ គណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើការអំពាវនាវដល់សាធារណជន ដែលជាអ្នកប្រើប្រាស់ផ្លូវទាំងអស់ចំនួន១០ចំណុចសំខាន់ៗ។
ទី១, ត្រូវត្រួតពិនិត្យលក្ខណៈបច្ចេកទេសយានយន្ដជានិច្ចជាពិសេសត្រូវត្រួតពិនិត្យកងជំពោះក្រាំងភ្លើងបំភ្លឺជាដើម ទី២, សូមកុំទុកអ្នកដំណើរឬទំនិញលើសកំណត់ចំពោះយានយន្តដឹកអ្នកដំណើរឬដឹកកម្មករមិនត្រូវផ្ទុកអ្នកដំណើរឬកម្មករលើដំបូងនិងកុំដំឡើងថ្លៃធ្វើដំណើរក្នុងឱកាសនេះ ទី៣, ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្ត ទី៤, ត្រូវពាក់ខ្សែក្រវាត់សុវត្ថិភាពជានិច្ច ទី៥, ត្រូវគោរពសិទ្ធិអាទិភាពគោរពសញ្ញាចរាចរណ៍និងប្រកាន់ស្ដាំជានិច្ច ទី៦, មិនត្រូវបើកបរលើសល្បឿនកំណត់ជាដាច់ខាត ទី៧, មិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត ទី៨, មិនត្រូវបត់ ឬ វ៉ាជែងក្នុងភាពប្រថុយប្រថានឬធ្វេសប្រហែស ទី៩, មិនត្រូវបើកបរក្នុងស្ថានភាពរងុយដេកជាដាច់ខាត ទី១០, ត្រូវបើកបរក្នុងស្មារតីប្រុងប្រយ័ត្នជានិច្ចប្រកបដោយសីលធម៌យោគយល់អធ្យាស្រ័យ។
គណៈកម្មាធិការជាតិសុវត្ថិភាពចរាចរណ៍ផ្លូវគោកបានសម្តែងនូវក្តីសង្ឃឹម និងជឿជាក់លើស្មារតីចូលរួមគោរពអនុវត្តច្បាប់ ក៏ដូចជាអនុវត្តសេចក្តីអំពាវនាវនេះ ពីសំណាក់អ្នកប្រើប្រាស់ផ្លូវគ្រប់រូប ដើម្បីនាំមកនូវសុវត្ថិភាព និងសេចក្តីរីករាយជាមួយក្រុមគ្រួសារ ក្នុងឱកាសពិធីបុណ្យភ្ជុំបិណ្ឌខាងមុខនេះ៕
Source: Kampuchea Thmey Daily
0 Comments