ភ្នំពេញ ៖ មន្ត្រីជាន់ខ្ពស់ក្រសួងការងារនិងបណ្ដុះបណ្ដាលវិជ្ជាជីវៈ បានអំពាវនាវឲ្យអ្នកម៉ៅការសំណង់ត្រូវបណ្តុះបណ្តាលដល់កម្មករសំណង់ជាមុនសិនមុននឹងអនុញ្ញាតឲ្យធ្វើការនៅតាមការដ្ឋាននានាដើម្បីធានាសុវត្តិភាពនិងគុណភាពសំណង់។
ថ្លែងក្រោយបញ្ចប់ជំនួបរវាងលោកបណ្ឌិត អ៊ិតសំហេង រដ្ឋមន្ត្រីក្រសួងការងារនិងបណ្ដុះបណ្ដា លវិជ្ជាជីវៈ និងលោក ជីរ៉ូ កាវ៉ាសាគីសមាជិកសភានិងជាអតីតរដ្ឋមន្ត្រីក្រសួងសុខាភិបាលការងារ និងសុខុមាលភាពជប៉ុនទទួលបន្ទុកលើសកម្មភាពអង្គការអន្តរជាតិខាងការងារ វិស័យសុខភាពនិងសុវត្ថិភាពការងារកាលពីព្រឹកថ្ងៃទី២៧ កញ្ញា នៅទីស្តីការក្រសួង លោក ឡេង តុង ប្រធាននាយកដ្ឋានពេទ្យការងារនៃក្រសួងការងារនិងបណ្តុះបណ្តាលវិជ្ជាជីវៈបានបន្តថា ការបញ្ជ្រាបចំណេះដឹងដល់កម្មករសំណង់នេះ មិនត្រឹមតែអាចកាត់បន្ថយគ្រោះថ្នាក់នៅកន្លែងការងារប៉ុណ្ណោះទេថែមទាំងជួយជំរុញឲ្យការងារឲ្យបានលឿនឆាប់រហ័សផងដែរ។
លោកបានបន្ថែមទៀតថា បច្ចុប្បន្នវិស័យសំណង់កំពុងប្រឈមនឹងគ្រោះថ្នាក់យ៉ាងខ្លាំងដោយកម្មករត្រូវធ្វើការនៅតាមអគារខ្ពស់ៗនិងមានការលើកដាក់អីវ៉ាន់ធ្ងន់ៗហើយ កន្លងមកមានកម្មករមួយចំនួនរងរបួស ហើយខ្លះទៀតមានគ្រោះថ្នាក់រហូតដល់អាយុជីវិតដោយសារតែធ្លាក់ពីលើអគារនិងសំណង់ផ្សេងៗ។
លោកបានស្នើឲ្យអ្នកម៉ៅការសំណង់ ឬ ម្ចាស់សំណង់ទាំងអស់បើកវគ្គបណ្តុះបណ្តាលដល់កម្មករដើម្បីឲ្យពួកគេទទួលបាននូវចំណេះដឹងបន្ថែមទៀតទាក់ទងនឹងសុវត្ថិភាពការងារសំដៅឈានទៅកាត់បន្ថយគ្រោះថ្នាក់នៅកន្លែងការងារប្រកបដោយប្រសិទ្ធភាពខ្ពស់។
លោក ឡេង តុងបានមានប្រសាសន៍ទៀតថា ក្រសួងបានបន្តខិតខំប្រឹងប្រែងជំរុញការអនុវត្តច្បាប់ និងលិខិតបទដ្ឋានគតិយុត្តិ ក៏ដូចជាគោលនយោបាយផ្សេងៗទៀតដើម្បីកាត់បន្ថយហានិភ័យគ្រោះថ្នាក់ការងារ ក្នុងវិស័យសំណង់ ក្នុងការធានាបាននូវសន្តិសុខ និងសុវត្ថិភាពការងារក្នុងវិស័យនេះ។
លោក ជីរ៉ូ កាវ៉ាសាគីសមាជិកសភានិងជាអតីតរដ្ឋមន្ត្រីក្រសួងសុខាភិបាលការងារ និងសុខុមាលភាពជប៉ុន ទទួលបន្ទុកលើសកម្មភាពអង្គការអន្តរជាតិខាងការងារ វិស័យសុខភាពនិងសុវត្ថិភាពការងារបានមានប្រសាសន៍ថា ជប៉ុននឹងបន្តគាំទ្រគម្រោងនេះជាបន្តទៀត ដើម្បីជួយលើកកម្ពស់សុវត្ថិភាពដល់កម្មករនៅក្នុងវិស័យសំណង់កាន់តែប្រសើរឡើងថែមទៀត។
លោក ស៊ីវ ផេង អគ្គលេខាធិការសមាគមអ្នកសាងសង់កម្ពុជាបានបានគាំទ្រចំពោះការលើកឡើងរបស់ក្រសួងការងារនេះព្រោះបានជួយឲ្យកម្មករដែលធ្វើការនៅតាមការដ្ឋានសំណង់បានយល់ដឹងពីរបៀបពាក់មួកសុវត្ថិភាព ស្រោមដៃ ស្រោមជើងនិងសុវត្ថិភាពការងារនៅអគារខ្ពស់ៗជាដើមទទួលបានសុខសុវត្ថិភាពបានល្អ ខណៈបច្ចុប្បន្នវិស័យសំណង់កំពុងមានការរីកដុះដាលខ្លាំង៕
Source: Kampuchea Thmey Daily
0 Comments