កំពង់ធំ ៖ ផ្ទុះរឿងឪពុកក្មេក និងកូនប្រសា ក្នុងរង្វង់គ្រួសារកសិករមួយ ឈានដល់ការប្រើប្រាស់អំពើហិង្សាដាក់គ្នា ដោយសារតែទំនាស់ពាក្យសំដីរវាង កូនប្រសា និងឪពុកក្មេក បណ្តាលឲ្យឪពុកក្មេកខឹងច្រឡោច នឹងកូនប្រសា ជេរដៀមដាម ដៀលពូជដៀលអំបូរ ទើបទាញកាំបិត កាប់ព្រមានឲ្យស្គាល់ដៃ ដើម្បីឲ្យរាងចាល។
ដោយសារតែកំហឹងពុះកញ្ជ្រោល ចំពោះការជេរប្រមាថរបស់កូនប្រសាមិនបាន ទើបឪពុកក្មេកប្រើហិង្សាដោយចេតនា យកកាំបិតផ្គាក់កាប់កូនប្រសាបណ្តាលឲ្យរបួសធ្ងន់ធ្ងរ កាលពីវេលាម៉ោង១៨និង៣៥នាទី នៅថ្ងៃទី២៥ ខែកញ្ញា ឆ្នាំ២០១៨ នៅចំណុចផ្ទះជនសង្ស័យនៅភូមិសង្វាត ឃុំក្រយា ស្រុកប្រាសាទបល្ល័ង្ក ខេត្តកំពង់ធំ។
សមត្ថកិច្ចបានឲ្យដឹងថា ករណីហិង្សានេះ បង្កឡើងជនសង្ស័យឈ្មោះប្រាក់ សឺយ ភេទប្រុស អាយុ៥៤ឆ្នាំ ទីលំនៅ ភូមិកើតហេតុខាងលើ បានយកកាំបិតផ្គាក់កាប់ទៅលើជនរងគ្រោះឈ្មោះ ព្រិន ប្រាជ ភេទប្រុស អាយុ៣៨ឆ្នាំ (ត្រូវជាកូនប្រសា) បណ្តាលឲ្យរបួសក្បាលលើស្លឹកត្រចៀកខាងឆ្វេង(របួសធ្ងន់)បញ្ជូនទៅសង្គ្រោះនៅមន្ទីរពេទ្យបង្អែកស្រុកស្ទោង ខេត្តកំពង់ធំ។
មូលហេតុ ខឹងនឹងជនរងគ្រោះ រករឿងកូនរបស់គាត់និងជេរប្រមាថដៀលពូជអំបូរ ថាលោកឪពុកក្មេក មិនចេះប្រដៅកូនចៅទើបបណ្តាលឲ្យ លោកឪពុកក្មេកឈួលច្រមុះ ខឹងនឹងសំដីចោរម្សៀតរបស់កូនប្រសា ហើយក៏ឈានដល់ប្រើហិង្សាតែម្តង។
ក្រោយទទួលបានព័ត៌មានកម្លាំងយើងចុះអន្តរាគមន៍ឃាត់ខ្លួនជនសង្ស័យបញ្ជូនទៅប៉ុស្តិ៍នគរបាលរដ្ឋបាលឃុំក្រយា ដើម្បីកសាងសំណុំរឿងបញ្ជូនទៅសាលាដំបូងខេត្តកំពង់ធំ៕
Source: Kampuchea Thmey Daily
0 Comments