ភ្នំពេញ ៖ សមត្ថកិច្ចនៃការិយាល័យនគរបាលព្រហ្មទណ្ឌកម្រិតស្រាល នៃស្នងការរាជធានីភ្នំពេញ បានឲ្យដឹងថា បន្ទាប់ធ្វើការស្រាវជ្រាវ ករណី (ឆក់កាបូបដៃពណ៌ខ្មៅ) នៅចំណុចមុខផ្ទះលេខ៨ ផ្លូវលេខ២៩៤ ភូមិ៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីរសៀលថ្ងៃទី១៣ ខែសីហា ឆ្នាំ២០១៨ វេលាម៉ោង១៣និង០០នាទី មកដល់ថ្ងៃទី១៧ ខែកញ្ញានេះ សមត្ថកិច្ចការិយាល័យព្រហ្មទណ្ឌកម្រិតស្រាល បានឃាត់ជនសង្ស័យនោះបានហើយ ថែមទាំងដកកាំភ្លើងខ្លីម៉ាកGLOCK19របស់អធិការរងខណ្ឌមានជ័យបានមកវិញផងដែរ។
ឃាត់ខ្លួនជនសង្ស័យម្នាក់នោះ នៅចំណុចផ្ទះសំណាក់យីហោ ទិត ហួរ ផ្លូវលំ សង្កាត់គោកឃ្លាង ខណ្ឌសែនសុខ កាលពីថ្ងៃទី១៧ ខែកញ្ញា ឆ្នាំ២០១៨ ហើយការឃាត់ខ្លួននេះ សមត្ថកិច្ចបានដកហូតអាវុធខ្លី មួយដើមម៉ាក GLOCK19 ពណ៌ខ្មៅ លេខ AAMY860 ផលិតនៅប្រទេសអាមេរិកនិងបង់អាវុធខ្លីចំនួនមួយ មានគ្រាប់ចំនួន៤ ជារបស់ជនរងគ្រោះឈ្មោះ ម៉េង វិមានតារា ហើយសមត្ថកិច្ច បានឃាត់យកមកស្នងការនគរបាលរាជធានីភ្នំពេញ ដើម្បីធ្វើការសាកសួរ។
នេះបើតាមនាយការិយាល័យព្រហ្មទណ្ឌកម្រិតស្រាល ឲ្យដឹងកាលពីល្ងាចថ្ងៃទី១៧កញ្ញានេះ។
ប្រភពបានបន្តទៀតថា ជនសង្ស័យមានឈ្មោះ ម៉ន សំនៀង ភេទប្រុស អាយុ២៤ឆ្នាំ មុខរបរមិនពិតប្រាកដ ស្នាក់នៅផ្ទះលេខ៦០E0Z ផ្លូវលេខ១២២ ក្រុម៧០ សង្កាត់មិត្តភាព ខណ្ឌ៧មករា ចំណែកឯជនរងគ្រោះមានឈ្មោះ ម៉េង វិមានតារា ភេទប្រុស អាយុ៣៧ឆ្នាំ មុខរបរនគរបាល ស្នាក់នៅផ្ទះលេខ១៥៤ ផ្លូវបេតុង ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
បន្ទាប់ពីឃាត់ខ្លួនជនសង្ស័យសមត្ថកិច្ចបានបញ្ជាក់ថា សម្ភារៈដែលបានបាត់បង់មាន អាវុធខ្លីម៉ាក GLOCK19 ពណ៌ខ្មៅ លេខAAMY860 ផលិតនៅប្រទេសអាមេរិកមួយដើម, បង់អាវុធខ្លីចំនួនមួយ, គ្រាប់ចំនួន១៥, ទូរសព្ទ័ដៃម៉ាក Samsung Galaxy S9 ពណ៌ខ្មៅ, ប័ណ្ណសម្គាល់យានយន្ត ពាក់ស្លាកលេខ ភ្នំពេញ 2AC- 8798, ប័ណ្ណបើកបរចំនួន១, អត្តសញ្ញាណប័ណ្ណសញ្ជាតិខ្មែរចំនួន១, កាត ATM ចំនួន៤សន្លឹក, ប្រាក់រៀលចំនួន ៤លានរៀល និងប្រាក់ដុល្លារ ២០ដុល្លារអាមេរិក។
បច្ចុប្បន្នជនសង្ស័យខាងលើ ត្រូវសមត្ថកិច្ចជំនាញការិយាល័យ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមច្បាប់៕
Source: Kampuchea Thmey Daily
0 Comments