ពានរង្វាន់ក្លិបអាជីពប្រចាំតំបន់ប្រទេសដងទន្លេរមេគង្គ Toyota Mekong Club Championship (TMCC) ដែលធ្លាប់បានរៀបចំឡើងបាន៤លើកមកនេះ ត្រូវបានតំណាងគណៈកម្មការរៀបចំការប្រកួតអះអាងថា នឹងមិនរៀបចំនោះទេ នៅឆ្នាំ២០១៨នេះ ដោយហេតុផលថា សកម្មភាពប្រកួតបាល់ទាត់របស់ប្រទេសក្នុងតំបន់មានការមមាញឹកខ្លាំង។
តំណាងក្រុមហ៊ុនរថយន្ត Toyota ដែលជាម្ចាស់ឧបត្ថម្ភធំក្នុងពានរង្វាន់បានឲ្យដឹងថា ក្រុមហ៊ុនបានសម្រេចមិនរៀបចំការប្រកួតពានរង្វាន់TMCC ឆ្នាំ២០១៨នេះទេ។ មូលហេតុចម្បងដែលក្រុមហ៊ុនសម្រេចរំសាយការប្រកួតនៅឆ្នាំនេះគឺដោយសារមើលឃើញថា កាលវិភាគប្រកួតរបស់លីគក្នុងប្រទេសតាមដងទន្លេរមេគង្គមានការមមាញឹកខ្លាំង។ ប៉ុន្តែក្រុមហ៊ុននៅតែបន្តសកម្មភាពរៀបចំទិវាបាល់ទាត់ (Football Clinic) ដល់ក្រុមយុវជនតាមប្រទេសក្នុងតំបន់នេះដដែល។
ពានរង្វាន់ TMCC ដែលធ្លាប់រៀបចំកន្លងមកមានរូបមន្តប្រកួតផ្សេងៗគ្នាពីមួយឆ្នាំទៅមួយឆ្នាំ ខណៈឆ្នាំ២០១៤ ដែលជាឆ្នាំដំបូងគឺមានក្រុមចំនួន៤ប្រទេសប៉ុណ្ណោះ ដែលចូលរួមពោលគឺក្រុមដែលឈ្នះជើងឯកលីគកំពូលប្រទេសកម្ពុជា,វៀតណាម,ឡាវ និងមីយ៉ាន់ម៉ា ខណៈការប្រកួតធ្វើឡើងនៅកីឡដ្ឋានGò Đậu Stadium ក្នុងទីក្រុងThủ Dầu Một ខេត្ត Bình Dươngរបស់វៀតណាម។ កាលនោះក្រុមBecamex Bình Dương របស់វៀតណាម ជាម្ចាស់ជើងឯក ហើយក្រុមAyeyawady United របស់មីយ៉ាន់ម៉ា ជាជើងឯករង ហើយក្រុមភ្នំពេញក្រោន របស់កម្ពុជា ជាក្រុមលេខ៣និងក្រុមHoang Anh Attapeu របស់ឡាវ ជាប់លេខ៤។
នៅឆ្នាំ២០១៥ មានមានក្រុមចូលរួមចំនួន៥ដោយបូកបន្ថែមក្រុមមកពីប្រទេសថៃ១ទៀត ដោយការប្រកួតធ្វើឡើងនៅតាមទឹកដីរៀងៗខ្លួន។ ការប្រកួតចែកចេញជា៣វគ្គដោយវគ្គទី១ក្រុមនៅប្រទេសកម្ពុជា,ឡាវ និងមីយ៉ាន់ម៉ា ប្រកួតគ្នារកក្រុមខ្លាំងឡើងទៅប៉ះក្រុមរបស់វៀតណាម ដែលឈរចាំនៅវគ្គពាក់កណ្ដាលផ្តាច់ព្រ័ត្រ ហើយក្រុមឈ្នះវគ្គនេះត្រូវឡើងទៅប៉ះក្រុមថៃនៅវគ្គផ្តាច់ព្រ័ត្រ។ ជាលទ្ធផលក្រុម Buriram United របស់ថៃ ឈ្នះជើងឯក ហើយក្រុមបឹងកេតរបស់កម្ពុជា ជាជើងឯករង ខណៈក្រុម Becamex Bình Dương។
នៅឆ្នាំ២០១៦ វិញតម្រូវឱ្យក្រុមនៅប្រទេសវៀតណាម ឡាវ និងមីយ៉ាន់ម៉ា ប្រកួតគ្នាសិនមុនឡើងមកប៉ះក្រុមកម្ពុជា នៅវគ្គពាក់កណ្ដាលផ្តាច់ព្រ័ត្រ មុនបន្តឡើងទៅប៉ះក្រុមថៃ នៅវគ្គពាក់កណ្ដាលផ្តាច់ព្រ័ត្រ។ ជាលទ្ធផលក្រុម Buriram United របស់ថៃឈ្នះជើងឯកហើយក្រុម Lanexang United របស់ឡាវ ឈ្នះជើងឯករង និងក្រុមបឹងកេត ឈរលេខ៣ម្តង។
ចំណែកនៅឆ្នាំ២០១៧ វិញក្រុមមកពីមីយ៉ាន់ម៉ា សុំមិនចូលរួមប្រកួតដោយតម្រូវឱ្យក្រុមវៀតណាម ប៉ះគ្នាជាមួយក្រុមកម្ពុជា មុនឡើងទៅប៉ះក្រុមឡាវ នៅវគ្គពាក់កណ្ដាលផ្តាច់ព្រ័ត្រ និងបន្តឡើងទៅប៉ះក្រុមថៃ នៅវគ្គផ្តាច់ព្រ័ត្រ។ ក្រុមMuangthong United របស់ថៃ ជាម្ចាស់ជើងឯក ហើយក្រុមSanna Khánh Hòa របស់វៀតណាម ឈ្នះជើងឯកនិងក្រុមLao Toyota របស់ឡាវ ឈ្នះលេខ៣៕
Source: Kampuchea Thmey Daily
0 Comments