ប៉ូលិសបាននិយាយនៅថ្ងៃចន្ទថា គ្មានអ្វីត្រូវលើកឡើងទេដែលថា សារធាតុគីមី Novichok បានបណ្តាលឲ្យមនុស្សពីរនាក់ធ្លាក់ខ្លួនឈឺនៅក្នុងទីក្រុងអង់គ្លេសដែលជាកន្លែងអតីតចារកម្មរុស្ស៊ីនិងកូនស្រីរបស់គាត់ត្រូវបានបំពុលដោយភ្នាក់ងារបំផ្លាញសរសៃប្រសាទដ៏សាហាវនេះ។
ផ្នែកខ្លះនៃទីក្រុង Salisbury ភាគនិរតីប្រទេសអង់គ្លេសត្រូវបានបិទហើយក្រុមឆ្លើយតបនៃតំបន់មានគ្រោះថ្នាក់ត្រូវបានគេហៅទៅកន្លែងកើតហេតុបន្ទាប់ពីមនុស្សពីរនាក់មានភាពមិនស្រួលនៅក្នុងភោជនីយដ្ឋានអ៊ីតាលីមួយកាលពីល្ងាចថ្ងៃអាទិត្យ។
ប៉ូលិសតំបន់ Wiltshire បាននិយាយនៅក្នុងសេចក្តីថ្លែងការណ៍មួយថា “ដោយសារតែព្រឹត្តិការណ៍ថ្មីៗនៅក្នុងទីក្រុងនេះនិងការព្រួយបារម្ភថាអ្នកទាំងពីរត្រូវបានប៉ះពាល់ទៅនឹងសារធាតុដែលគេមិនស្គាល់នោះ វិធីសាស្ត្រប្រុងប្រយ័ត្នខ្ពស់ត្រូវបានយកទៅប្រើប្រាស់ដោយសេវាសង្គ្រោះបន្ទាន់ទាំងអស់។ ឥឡូវនេះយើងអាចបញ្ជាក់បានថា គ្មានសារធាតុ Novichok ទេ”។
ប៉ូលិសបាននិយាយថា អ្នកទាំងពីរដែលបុរសស្ថិតក្នុងវ័យ៤០ឆ្នាំនិងស្ត្រីក្នុងវ័យ៣០ឆ្នាំត្រូវបានគេវាយតម្លៃនៅក្នុងមន្ទីរពេទ្យដែលនៅទីនោះ ពួកគេនៅតែស្ថិតក្រោមការសង្កេត។
ប៉ូលិសបាននិយាយទៀតថា វាមិនច្បាស់ទេថាតើមានឧក្រិដ្ឋកម្មណាមួយត្រូវបានប្រព្រឹត្តដែរឬក៏អត់។ ប៉ូលិសបន្ថែមថា ព្រឹត្តិការណ៍នេះលែងត្រូវបានគេចាត់ទុកជាឧប្បត្តិហេតុធំទៀតហើយប៉ុន្តែការស៊ើបអង្កេតកំពុងបន្ត។
ទីក្រុង Salisbury ជាកន្លែងដែលភ្នាក់ងារចារកម្មរុស្ស៊ីលោក Sergei Skripal និងកូនស្រីរបស់គាត់ឈ្មោះ Yulia ត្រូវបានបំពុលជាមួយសារធាតុ Novichok ដែលជាសារធាតុបំផ្លាញសរសៃប្រសាទដ៏មានឥទ្ធិពលបង្កើតឡើងនៅក្នុងសហភាពសូវៀត។
ចក្រភពអង់គ្លេសបានចោទប្រកាន់ប្រទេសរុស្ស៊ីពីបទរៀបចំការវាយប្រហារនោះដែលការចោទប្រកាន់បែបនេះត្រូវបានក្រុងមូស្គូបដិសេធ។
លោក Skripal និងកូនស្រីរបស់គាត់បានរួចជីវិតប៉ុន្តែប្តីប្រពន្ធជនជាតិអង់គ្លេសឈ្មោះ Dawn Sturgess និង Charlie Rowley បានប៉ះពាល់ជាមួយសារធាតុដូចគ្នានេះនៅក្នុងទីក្រុងមួយក្បែរទីក្រុង Salisbury នាប៉ុន្មានខែក្រោយហើយ Sturgess អាយុ៤៤ឆ្នាំបានស្លាប់នៅក្នុងមន្ទីរពេទ្យ៕ AFP
Source: Kampuchea Thmey Daily
0 Comments