ម្ចាស់​លុយ​ជនជាតិ​ជប៉ុន​ អំពាវនាវ អោយ​លោក ទេព រិទ្ធី វិ​ទ្ធ អតីត​ប្រធាន​ក្រុមប្រឹក្សាភិបាល​ក្រុមហ៊ុន POH ចូលខ្លួន ដោះស្រាយ​រឿង​លួច​លក់ ក្រុមហ៊ុន

ភ្នំពេញ ​៖ ​ម្ចាស់​លុយ​ជនជាតិ​ជប៉ុន របស់ ក្រុមហ៊ុន (Pacific Opportunities Holdings S.a.r.l) បាន អំពាវនាវ អោយ លោក ទេព រិទ្ធី វិ​ទ្ធ អតីត​ប្រធាន​ក្រុមប្រឹក្សាភិបាល​ក្រុមហ៊ុន POH ចូលខ្លួន ដោះស្រាយ​រឿង​លួច​លក់ ក្រុមហ៊ុន ប្រសិនបើ​នៅតែ​រឹងទទឹង​មិន​ចូលខ្លួន​ទេ គាត់​នឹង​មាន​វិធានការ​ទៅតាម​ផ្លូវច្បាប់ ដោយ​គ្មាន​ការ​យល់យោគ​ទៀតឡើយ។

ប្រភព​ព័ត៌មាន បានឱ្យដឹង ថា អតីត​ប្រធាន​ក្រុមប្រឹក្សាភិបាល​រូបនេះ​ឈ្មោះ​ទេព រិទ្ធី វិ​ទ្ធ ភេទ​ប្រុស អាយុ​៥៥​ឆ្នាំ រស់នៅ​ផ្ទះ​លេខ​១ ផ្លូវ​លេខ​២ បុរី​សាន់វ៉េ ខណ្ឌទួលគោក រាជធានី​ភ្នំពេញ ត្រូវបាន ម្ចាស់​លុយ ជនជាតិ​ជប៉ុន ប្តឹង ទៅ​តុលាការ រឿង លោក ទេព រិទ្ធី វិ​ទ្ធ លក់​ក្រុមហ៊ុន​ទៅអោយ​អ្នកដទៃ។ ទង្វើ​ របស់ ឈ្មោះ​ទេព រិទ្ធី វិ​ទ្ធ បាន​កំពុង ធ្វើ​ឲ្យ អ្នកវិនិយោគ​បរទេស កុំ​ពុង​ព្រួយ​បារម្ភ យ៉ាងខ្លាំង ពី​ការដាក់​វិនិយោគទុន​នៅ​កម្ពុជា។

ប្រភពព័ត៌មាន បានឱ្យដឹង​ទៀតថា ដើមចម​នៃ​ការប្តឹង​នេះ​បាន​កើតឡើង​ដោយសារ ថៅកែ​ជនជាតិ​ជប៉ុន បាន ឲ្យ លោក​ទេព រិទ្ធី វិ​ទ្ធ ឈរឈ្មោះ​ជា​ប្រធាន​ក្រុមប្រឹក្សាភិបាល​មាន​ភាគហ៊ុន​មួយរយ​ភាគរយ​នៃ​ក្រុមហ៊ុន​POH (Pacific Opportunities Holdings S.a.r.l) ដោយ​ទទួល​ប្រាក់ខែ​ចំនួន​៧០០០​ដុល្លារ​អាមេរិក​ក្នុង​មួយខែ​និង​ក្រោយមក​ក្រុមហ៊ុន​ក៏បាន​ដំឡើង​ប្រាក់ខែ​បន្ថែម​ឱ្យ​លោក​ទេព រិ​ទ្ធិ​វិ​ទ្ធ ចំនួន​១២០០០​ដុល្លារ​អាមេរិក​ក្នុង​មួយខែ​ពោលគឺ​បានន័យថា​លោក​ទេព រិ​ទ្ធិ​វិ​ទ្ធ គឺជា​មនុស្ស​ដែល​ក្រុមហ៊ុន ទុកចិត្ត និង បាន​ជួល​មកអោយ​ធ្វើការ​ដោយមាន​ភ្ជាប់​នឹង​កិច្ចសន្យា​ច្បាស់លាស់ ប៉ុណ្ណោះ ពោលគឺ​លោក មិនមាន​សិទ្ធិ​លក់​ភាគហ៊ុន​នេះ​បានទេ​។​

​ប្រភព​ដដែល​បាន​អះអាងថា បន្ទាប់ពី​គ្រប់គ្រង​និង​ឈរឈ្មោះ​ឱ្យ​ក្រុមហ៊ុន​POH អស់​រយៈពេល​ជិត​៣​ឆ្នាំ លោក​ទេព រិ​ទ្ធិ​វិ​ទ្ធ បាន សហការ ជាមួយ បុគ្គល​និង​ក្រុមហ៊ុន​បរទេស​មួយចំនួន​ទៀត​ដែល​មានបំណង​បំផ្លាញ​ក្រុមហ៊ុន​POH បាន​រៀបចំ​ល្បិច​តាម រូប ភាព​ជូនដំណឹង​តាមរយៈ​អ៊ី​ម៉ែ​ល​ដោយ​ខ្លួនឯង​ផ្ទាល់ និង​ដោយ​មេធាវី ទៅ​ក្រុមហ៊ុន ថា គាត់​ឈ្មោះ​ទេព រិ​ទ្ធិ​វិ​ទ្ធ មិនមាន​ភាគហ៊ុន​អ្វី​ទាំងអស់​នៅក្នុង​ក្រុមហ៊ុន POH ក្រុមហ៊ុន Cougar Pacific Pte Ltd. និង​ក្រុមហ៊ុន Kuga Reflorestamento Ltda នោះទេ គឺ​គាត់​គ្រាន់តែ​ជា​អ្នក​ជួយ​ឈរឈ្មោះ​ជា​ប្រធាន​ក្រុមប្រឹក្សាភិបាល​ប៉ុណ្ណោះ។ ក្រោយពី លោក​ទេព រិ​ទ្ធិ​វិ​ទ្ធ បាន​សុំលាលែង​ចេញពី​ក្រុមហ៊ុន​ទាំងអស់​ដែល​ពាក់ព័ន្ធ​ជាមួយ​គាត់​នៅ​ថ្ងៃទី​១ ខែកុម្ភៈ ឆ្នាំ​២០១៨ និង​យល់​ព្រមឱ្យ រក​អ្នកតំណាង​ថ្មី​ជំនួស​គាត់​ដើម្បី​ទទួលយក​ភាគហ៊ុន​មួយ​រយ​ភាគរយ​ពី​ក្រុមហ៊ុន​POH ។

ប៉ុន្តែ​ពេល កំពុង​ដំណើរការ​បញ្ជូន​ឈ្មោះ​អ្នកតំណាង​ថ្មី ឱ្យមក​កាន់កាប់​ក្រុមហ៊ុន​POH ជំនួស​លោក​ទេព រិ​ទ្ធិ​វិ​ទ្ធ នៅ​មិនទាន់​បញ្ចប់​ការផ្ទេរ​ភាគហ៊ុន​នៅឡើយ​ផង ស្រាប់តែ​នៅ​ថ្ងៃទី​១២ ខែមិថុនា ឆ្នាំ​២០១៨ លោក​ទេព រិ​ទ្ធិ​វិ​ទ្ធ បាន​លួច​លក់​ភាគហ៊ុន​មួយ​រយ​ភាគរយ​នៃ​ក្រុមហ៊ុន​POH ដែល​ជា​ក្រុមហ៊ុនមេ​របស់​ក្រុមហ៊ុន​ពីរ​ទៀត​គឺ​ក្រុមហ៊ុន Cougar Pacific Pte Ltd. និង Kuga Reflorestamento Ltda ទៅឱ្យ​ក្រុមហ៊ុន Saronic Holdings Ltd ដែល ម្ចាស់​ដើម មិនបាន​ដឹង​អ្វី​ទាំងអស់​ទង្វើ​ទាំងអស់នេះ​ធ្វើឱ្យ​ប៉ះពាល់​យ៉ាងធ្ងន់ធ្ងរ​ដល់​ក្រុមហ៊ុន​POH និង ក្រុមហ៊ុន​ផ្សេងៗ​ទៀត។

ប្រភព​ដដែល​បន្ត​ទៀត​ថា បន្ទាប់ពី​រឿង លួច​លក់​ភាគហ៊ុន​កើតឡើង ថៅកែ​បាន​ព្យាយាម​ អញ្ជើញ លោក​ទេព រិ​ទ្ធិ​វិ​ទ្ធ ដែល​បាន​លួច​លក់​ភាគហ៊ុន​មួយរយ​ភាគរយ​នៃ​ក្រុមហ៊ុន​POH ឲ្យ​ចូលខ្លួន​មក​ដោះស្រាយ ប៉ុន្តែ ជន​នោះ​ពុំបាន​ចូល ខ្លួន​មក​ដោះ​ជា​ស្រាយ​ជាមួយ​ថៅកែ ជប៉ុន ឡើយ។ ប្រភពពី​តុលាការ​បាន​ឲ្យ​ដឹង​ថា ករណី​រឿង​លួច​លក់ ក្រុមហ៊ុន​នេះ តុលាការ ក៏បាន ចោទប្រកាន់ រួចហើយ លើ អតីត​ប្រធាន​ក្រុមប្រឹក្សាភិបាល​ក្រុមហ៊ុន POH ពីបទ រំលោភ ទំនុកចិត្ត ដោយ​អភិបាល និង បទ លួច លក់​ភាគហ៊ុន​ក្រុមហ៊ុន។

តាម​ប្រភព​មួយ​បាន​បង្ហើប​ឱ្យដឹងថា ការលក់ដូរ​ក្រុមហ៊ុន​នេះ​បង្កប់​នូវ​ភាព​អាថ៌កំបាំង​ជាច្រើន​ជាប់​ពាក់ព័ន្ធ​ជាមួយ​បុគ្គល​ និង​ក្រុមហ៊ុន​បរទេស​មួយចំនួន​ទៀត​ដែល​ទាមទារ​ឱ្យ​តុលាការ​ត្រូវ​បើក​ការស៊ើបអង្កេត​យ៉ាង​ម៉ត់ចត់​ជាទីបំផុត ព្រោះ​លោក​ទេព រិទ្ធី​វិ​ទ្ធ បាន​ទំនាក់ទំនង​ជាមួយ​ប្រធាន​ក្រុមហ៊ុន J.trust Co.Ltd​មាន​ទីតាំងនៅ​ប្រទេស​ជប៉ុន​អស់​រយៈពេល​បី​ទៅ​បួន​ឆ្នាំ​ហើយ។ ទើប លួច​លក់​ភាគហ៊ុន​មួយរយ​ភាគរយ​របស់​ក្រុមហ៊ុន​POH ទៅឱ្យ​ក្រុមហ៊ុន​កូនជឹង​របស់ខ្លួន​ឈ្មោះ​Saronic។

ប្រភព​ក្រៅ ផ្លូវការ បានដឹងថា នាពេល​កន្លងមកនេះ មាន​ក្រុមហ៊ុន​មួយចំនួន បាន​ប្តឹង​ក្រុមហ៊ុន J.trust Co.Ltd នៅ​តុលាការ​ប្រទេស ម៉ាឡេស៊ី ឥណ្ឌូណេស៊ី និង សិង្ហ​បុរី ដោយសារ ក្រុមហ៊ុន J.trust Co.Ltd លេប​យក​ក្រុមហ៊ុន​អ្នកដទៃ តាមរយៈ ការប្រើប្រាស់​បក្ខពួក និង ក្រុមហ៊ុន​កូនជឹង​របស់ខ្លួន។ ចំណែក តុលាការ​នៅ​ទីក្រុង​ហុងកុង ធ្លាប់​អះអាង​ថា ការទិញ​ភាគហ៊ុន​នេះ មាន​ភាព​អាថ៌កំបាំង ដោយសារតែ​ក្រុមហ៊ុន​Saronic Holding Ltd ទើបតែ​ដំណើរការ​ថ្មីៗ​សោះ ហេតុអ្វី ហ៊ាន​ទិញ​ភាគហ៊ុន​ដទៃ​ភ្លាមៗ ដោយ​ពុំបាន​សិក្សា​ស្រាវជ្រាវ​ឱ្យ​ប្រវត្តិ​ក្រុមហ៊ុន​នោះ​សោះ ពោល​គឺ អាច​សបញ្ជាក់​ឱ្យឃើញថា ពិតជា​មានការ​ឃុបឃិត រៀបចំ​ដោយ​ក្រុមហ៊ុន​J.trust Co.Ltd​ជាមុន​មែន។​

រីឯ​ក្រុមហ៊ុន​Saronic Holding Ltd ទៀតសោត​បាន​ដំណើរការ​នៅ​ថ្ងៃទី​២៩ ខែឧសភា ឆ្នាំ​២០១៨ ដោយមាន​បុគ្គល​តែ​ម្នាក់​គត់​ជា​ប្រធាន​ផង និង​ជា​បុគ្គលិក​ផង ស្រាប់តែ​នៅ​ថ្ងៃទី​១២ ខែមិថុនា ឆ្នាំ​២០១៨ ពោល​គឺ​មាន​រយៈពេល​ទើបតែ​២​សប្ដាហ៍​ប៉ុណ្ណោះ ចេញមុខ​មក​ទិញ​យក​ភាគហ៊ុន​មួយ​រយ​ភាគរយ​ពី​លោក​ទេព រិទ្ធី​វិ​ទ្ធ ទៅវិញ។

ប្រភព​ដដែល​បាន​អះអាង​ថា លោក​ទេព រិទ្ធី​វិ​ទ្ធ ត្រូវតែ​ចូល​មក​សារភាព​ការពិត​ និង​ធ្វើការ​ដោះស្រាយ​ជាមួយ​ក្រុមហ៊ុន​នៅ​ចំពោះមុខ​តុលាការ​ប្រសើរ​ជាង​ជ្រើសរើស​យក​ការ​គេចវេស​ម្តង​ហើយ​ម្តង​ទៀត​នាំ​ឱ្យ​មាន​ទុក្ខទោស​ដល់​ខ្លួន។ ជុំវិញ​ករណីនេះ​មិនអាច​សុំ​ការ​ពន្យល់​ និង​បំភ្លឺ ពី តំណាង​ក្រុមហ៊ុន​ពាក់ព័ន្ធ​បានទេ៕

Source: Kampuchea Thmey Daily