ភ្នំពេញ ៖ យ៉ាងហោចណាស់មានមនុស្សប្រុស ស្រី ជាង២០នាក់ ត្រូវបានចាប់ខ្លួននៅក្នុងទីតាំងខារ៉ាអូខេឈ្មោះ PRO ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ នៅពេលដែលអាជ្ញាធរប្រឆាំងគ្រឿងញៀន សហការជាមួយអយ្យការអមសាលាដំបូងរាជធានីភ្នំពេញបង្ក្រាបក្រុមជួញដូរគ្រឿងញៀនតាមក្លឹបកំសាន្តនាពេលរាត្រី ។
ថ្នាំញៀនប្រភេទខេតាមីន៣០គ្រាប់ និង មេតំហ្វេតាមីនICE ១៨កញ្ចប់តូច ត្រូវបានរឹបអូសនៅក្នុងសម្បុកគ្រឿងញៀននេះ ។
ក្នុងចំណោមមនុស្សទាំង២០នាក់ សមត្ថកិច្ចបានធ្វើការសាកសួររកឃើញថា មាន២នាក់ ជាជនសង្ស័យពាក់ព័ន្ធករណីជួញដូរគ្រឿងញៀនដោយខុសច្បាប់ និង ជាមុខសញ្ញាចាស់ ធ្លាប់ពន្ធនាគារ២លើកមកហើយ ហើយក្នុងនោះមានម្នាក់ជាប្អូនថ្លៃរបស់អនុប្រធានមន្ទីរប្រឆាំងគ្រឿងញៀនទៀតផង។
ចំណែកមនុស្សជាង១០ នាក់ទៀតសុទ្ធតែបានប្រើប្រាស់គ្រឿងញៀន និង ប្រើនៅក្នុងបន្ទប់ខារ៉ាអូខេនោះតែម្តង នេះតាមការបញ្ជាក់ពីសមត្ថកិច្ច បន្ទាប់បានធ្វើតេស្តទឹកនោម លើមនុស្សទាំងអស់នោះ។
ក្រោយពីការសាកសួរមនុស្សជាង១០ នាក់ត្រូវបានសមត្ថកិច្ច តម្រូវឲ្យសាច់ញាតិ ឬក្រុមគ្រួសារទៅធ្វើកិច្ចសន្យា និង ធនាគារយកទៅផ្ទះវិញ តែក៏មានខ្លះប្រគល់ឲ្យទៅមន្ទីរសង្គមកិច្ចរាជធានីភ្នំពេញ យកទៅធ្វើការអប់រំ មានតែ២ នាក់ទេដែលបញ្ជូនទៅកាន់សាលាដំបូងរាជធានីភ្នំពេញ តាមនីតិវិធី។
ពុំមានរបាយការណ៍បង្ហាញពីការចាប់ខ្លួនម្ចាស់ក្លឹបPROនេះទេ ទោះបីអ្នកប្រើប្រាសគ្រឿងញៀនទាំងនោះបានសារភាពថា ពួកគេបានទិញគ្រឿងញៀនពីម្ចាស់ក្លឹប និងជួលបន្ទប់ក្លឹបដើម្បីជក់គ្រឿងញៀន ។
មានក្លឹបកំសាន្តរាត្រីរាប់រយនៅក្នុងរាជធានីភ្នំពេញដែលកំពុងប្រកបអាជីវកម្មលក់គ្រឿងញៀននិងជួលបន្ទប់អោយពួកយុវជនប្រើប្រាស់គ្រឿងញៀនក្រោមរូបភាពបិទបាំងដោយអាជីវកម្មខារាអូខេបន្តិចបន្តួច ប៉ុន្តែអាជ្ញាធរច្រើនឆ្នាំមកហើយមើលរំលងវិបត្តិសង្គមដ៏គ្រោះថ្នាក់នេះ ហើយយូរៗម្ដងគេឃើញមានការបង្ក្រាបទ្រង់ទ្រាយតូចៗក្នុងន័យដើម្បីក្រើនរំលឹកម្ចាស់ទីតាំងផ្សេងៗទៀតកុំបំភ្លេចអាជ្ញាធរមានសមត្ថកិច្ចអោយសោះ៕
Source: Kampuchea Thmey Daily
0 Comments