កម្ពុជា​ចូលរួម កិច្ចប្រជុំ​ថ្នាក់​រដ្ឋមន្ត្រី​របស់​ភាព​ជា​ដៃគូ​សេដ្ឋកិច្ច​គ្រប់​ជ្រុងជ្រោយ​ថ្នាក់​តំបន់ លើក​ទី​៦ (6th RCEP-ISSL MM)

ភ្នំពេញ​ ៖ លោក សុខ សុភ័ក្ត្រ អនុរដ្ឋលេខាធិការ តំណាង លោក ប៉ាន សូរ​ស័​ក្កិ រដ្ឋមន្ត្រីក្រសួង​ពាណិជ្ជកម្ម កាលពី​ថ្ងៃទី​១២-១៣ ខែតុលា ឆ្នាំ​២០១៨ បាន​ដឹកនាំ​ប្រតិភូ​កម្ពុជា ចូលរួម​អន្តរ​កិច្ចប្រជុំ​ថ្នាក់​រដ្ឋមន្ត្រី​របស់​ភាព​ជា​ដៃគូ​សេដ្ឋកិច្ច​គ្រប់​ជ្រុងជ្រោយ​ថ្នាក់​តំបន់ លើក​ទី​៦ (6th RCEP-Intersessional Ministerial Meeting-ISSL-MM) នៅ​ប្រទេស​សិង្ហ​បុរី​។



ក្រសួង បាន​ឲ្យ​ដឹង​ថា កិច្ចប្រជុំ​នេះ មានការ​ចូលរួម​ពី​រដ្ឋមន្ត្រី​ទាំង ១៦ របស់ RCEP និង​ផ្តោតលើ​របៀបវារៈ​ចំនួន ០៣ មានដូចជា ១) ការ​ចូល​ទីផ្សារ​ទំនិញ សេវាកម្ម និង​វិនិយោគ ២) វិធាន​-​ច្បាប់​ទាក់ទង​នឹង​ការធ្វើ​ពាណិជ្ជកម្ម ដូចជា ប្រភព​ដើម​ទំនិញ អនាម័យ​និង​ភូ​ត្ត​គា​ម​អនាម័យ របាំង​បច្ចេកទេស នីតិវិធី​គយ ការប្រកួតប្រជែង និង ៣) ការរៀបចំ​ផែនទី​បង្ហាញផ្លូវ​សម្រាប់​សម្រេច​ការងារ​ចរចា​កិច្ចប្រជុំ​ថ្នាក់​រដ្ឋមន្ត្រី RCEP នា​ខែវិច្ឆិកា​ខាងមុខ​។



នា​ឱកាស​នោះ លោក សុខ សុភ័ក្ត្រ បាន​ជំរុញ​បណ្តា​ប្រទេស​របស់ RCEP ទាំង ១៦ គោរព​ស្មារតី​នៃ​កិច្ច​សន្មត​ការងារ​សម្រាប់​ការចរចា (Working assumptions) ដែល​បាន​អនុម័ត​នៅក្នុង​កិច្ចប្រជុំ​ថ្នាក់​រដ្ឋមន្ត្រី​របស់ RCEP លើក​ទី​៦ កាលពី​ខែសីហា​កន្លងទៅ ដែល​ប្តេជ្ញា​មិន​ឲ្យ​មានការ​តំអក់​មិន​ព្រម​កាត់​ពន្ធ (Back-loading Offer) និង​ជៀសវាង​ហាម​មិន​ឲ្យ​ដាក់បញ្ចូល​មុខទំនិញ​សំខាន់​ដែល​កំពុង​ធ្វើ​ចរាចរ​ផ្នែក​ពាណិជ្ជកម្ម​របស់​សមាជិក​មួយចំនួន (​រួមមាន​កម្ពុជា​) ទៅក្នុង​បញ្ជី​លើកលែង​ដែល​មិន​ព្រម​កាត់​ពន្ធ (Exclusion List) ដើម្បី​ពង្រីក​ការនាំចេញ​ទំនិញ​សក្តានុពល​របស់​កម្ពុជា​។



ក្រសួងបញ្ជាក់ថា នៅក្នុង​កិច្ចប្រជុំ​ទាំងមូល បាន​ឯកភាព​ជាគោលការណ៍ ក្នុង​ការ​ជំរុញ​សមាជិក​ដែល​មិនទាន់​បាន​ផ្តល់ជូន​ការ​ផ្តល់​កញ្ចប់​សន្យា​ផ្នែក​ទំនិញ និង​សេវាកម្ម​បន្ទាប់​ចុងក្រោយ (Penultimate goods and services offers) ឲ្យ​ឆាប់​ផ្តល់​ឲ្យ​បាន​មុន​កិច្ចប្រជុំ RCEP លើក​ទី​២៤ ដែល​នឹង​ប្រព្រឹត្តទៅ​នៅ​ទីក្រុង Auckland ប្រទេស​ណូ​វែ​ល​សេ​ឡង់​ដ៍ នៅ​ចុងខែ​តុលា​នេះ​។ អង្គប្រជុំ​ក៏បាន​ឯកភាព​លើក​កាលបរិច្ឆេទ ដែល​ត្រូវ​ផ្តល់​ការ​ផ្តល់ជូន​ចុងក្រោយ​ផ្នែក​សេវាកម្ម និង​ទំនិញ (Final services and goods offers) និង​ផ្នែក​បញ្ជី​រក្សា​សិទ្ធិ​ក្របខ័ណ្ឌ​វិនិយោគ ទៅ​ថ្ងៃទី​០២ ខែវិច្ឆិកា ឆ្នាំ​២០១៨ ខាងមុខ​វិញ​។

ជា​ចុងក្រោយ កិច្ចប្រជុំ​បានកំណត់​ថ្ងៃទី​១២ ខែវិច្ឆិកា ឆ្នាំ​២០១៨ ជា​ថ្ងៃ​កិច្ចប្រជុំ​ត្រៀម​ថ្នាក់​រដ្ឋមន្ត្រី RCEP និង​ថ្ងៃទី​១៤ ខែវិច្ឆិកា ឆ្នាំ​២០១៨ ជា​ថ្ងៃ​នៃ​កិច្ចប្រជុំ​កំពូល RCEP​។ អង្គប្រជុំ​ទាំងមូល​ក៏បាន​ឯកភាព​ប្រឹងប្រែង​បន្ថែម ដើម្បី​រុញ​ការ​អនុម័តិ​កិច្ចព្រមព្រៀង RCEP សំដៅ​សម្រេច​បាន​ផល​ជា​ដុំកំភួន សម្រាប់​ជូន​ថ្នាក់ដឹកនាំ​កំពូល RCEP ប្រកាស​ក្នុង​ចុងឆ្នាំ ២០១៩ ខាងមុខ៕

Source: Kampuchea Thmey Daily