បន្ទាយមានជ័យ ៖ លោកឧត្តមសេនីយ៍ទោ អាត់ខែម ស្នងការនគរបាលខេត្តបន្ទាយមានជ័យ បានដាក់វិធានការឲ្យនគរបាលនៅស្រុកមង្គលបូរីចុះបង្ក្រាបក្រុមក្មេងទំនើង ដែលបង្កលួចគប់កញ្ចក់ឡានអ្នកធ្វើដំណើរនៅពេលយប់ឲ្យអស់ ឫសគល់នៅភូមិសាស្ត្រស្រុកមង្គលបូរី និងទូទាំងខេត្តបន្ទាយមានជ័យ និងបន្តបង្ក្រាបដូចភ្លៀងរលឹមកាលពីថ្ងៃទី១៥ ខែតុលា ឆ្នាំ២០២៨ នៅស្នងការដ្ឋាននគរបាលខេត្តបន្ទាយមានជ័យ។
គួរបញ្ជាក់ផងដែរថា កន្លងមកកម្លាំងនគរបាលស្រុកមង្គលបូរី បានចុះបង្ក្រាបក្មេងទំនើងដែលបង្កលួចគប់កញ្ចក់ឡានអ្នកធ្វើដំណើរនៅចំណុចផ្លូវរថភ្លើង ក្នុងភូមិសាស្ត្រសាលាដែង ឃុំឫស្សីក្រោយ ស្រុកមង្គលបូរី ខេត្តបន្ទាយមានជ័យ នៅវេលាម៉ោង ៥ល្ងាច ថ្ងៃទី១៣ ខែតុលា ឆ្នាំ២០១៨ ម្ចាស់ឡានមានឈ្មោះហែម វាសនា ភេទប្រុស អាយុ៣០ឆ្នាំ នៅភូមិចំការត្រដោក ឃុំឫស្សីក្រោក នគរបាលបានធ្វើការឃាត់ខ្លួនជនសង្ស័យបានចំនួន៤នាក់ ១មានឈ្មោះ ហេឈិត ភេទប្រុស អាយុ១៧ឆ្នាំ ២មានឈ្មោះអឿន សំណាង ភេទប្រុស អាយុ១៧ឆ្នាំ ៣មានឈ្មោះធូ ភេទប្រុស អាយុ២០ឆ្នាំ ៤មានឈ្មោះស៊ិន សុភារ៉ា ភេទប្រុស អាយុ១៨ឆ្នាំ ទាំង៤នាក់រស់នៅភូមិ កោះកែវ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ក្រោយពីឃាត់ខ្លួនហើយជនសង្ស័យបានបញ្ជូនមកស្នងការខេត្តបន្ទាយមានជ័យបន្តរៀបចំសំណុំបែបបទបញ្ជូនទៅតុលាការដើម្បីដាក់ទោសទៅតាមផ្លូវច្បាប់។
ក្នុងនោះលោកឧត្តមសេនីយ៍ទោ អាត់ ខែម បានធ្វើការកោតសរសើរនិងអគុណដល់កងកម្លាំងនគរបាលគ្រប់ថ្នាក់ គ្រប់ជំនាញនិងគ្រប់គោលដៅដែលបានខិតខំបំពេញការងារថែរក្សាការពារសន្តិសុខ សណ្តាប់ធ្នាប់ សុវត្ថិភាពទូទៅកន្លងមកនេះ និងក៏បន្ថែមការដាក់ផែនការការពារក្នុងឱកាសបុណ្យអុំទូក អកអំបុក សំពះព្រះខែ ក៏ដូចជាបុណ្យកឋិនទាននាពេលដ៏ខ្លីខាងមុខទៀតផង។
លោកស្នងការបានបញ្ជាក់ទៀតថា សន្តិសុខ សុវត្ថិភាព សណ្តាប់ធ្នាប់លំបាកស្មុគស្មាញកម្លាំងនគរបាលធ្វើបានល្អ មានប្រសិទ្ធភាព និងប្រកបដោយការទទួលខុសត្រូវ ហើយមានភាពកក់ក្តៅដល់ប្រជាជនមហាជនចឹងរឿងអីដែលឲ្យក្រុមក្មេងស្ទាវទំនើងក្រុមនេះ ក្រុមនោះម្តងហើយម្តងទៀតបង្កអុកឡុក ស្ទាក់ ឆ្មក់គប់កញ្ចក់ឡាន អ្នកធ្វើដំណើរតាមដងផ្លូវពេលយប់នោះបន្តទៀតបាន។
លោកវរសេនីយ៍ស៊ិន ណារ៉ាក់ អធិការនគរបាលស្រុកមង្គលបូរីបានឲ្យដឹងថា នៅថ្ងៃទី១៥ខែតុលា ឆ្នាំ២០១៨ ករណីក្រុមក្មេងទំនើងលួចគប់កញ្ចក់និងទ្រុងឡាននៅផ្លូវជាតិលេខ៥កាត់ថ្នល់រថភ្លើងនៅឃុំឫស្សីក្រោក កាលពីកន្លងមកនេះ គ្មានអ្នកប្តឹង ហើយកាលពីខែមីនា ឆ្នាំ២០១៨ នៅផ្លូវជាតិលេខ១៩៦ ភូមិស្រមោច ឃុំស្រុកព្រះនេត្រព្រះជាប់នឹងព្រំប្រទល់ឃុំគយម៉ែង ស្រុកព្រះនេត្រព្រះ ដែលក្មេងទំនើងគប់កញ្ចក់ឡានកូនរបស់លោកចៅហ្វាយខេត្ត ជាបញ្ហាបង្កឲ្យខូចខាតសន្តិសុខសណ្ដាប់ធ្នាប់ ករណីទាំងនេះ នគរបាលបានស្រាវជ្រាវដ៏លំបាកចុះបង្ក្រាបបានសម្រេចបន្តបន្ទាប់យកទៅដាក់គុកអស់ហើយ៕
Source: Kampuchea Thmey Daily
0 Comments