ភ្នំពេញ ៖ ដូចមហាជន និងអ្នកគាំទ្របានដឹងស្រាប់ហើយកន្លងមកតារាចម្រៀងដែលត្រូវជាប្អូនស្រីបង្កើតរបស់លោក ខេមរៈ សិរីមន្ត គឺកញ្ញា ខេមរៈ ស្រីពៅ បានឃ្លាតឆ្ងាយពីវិថីសិល្បៈមានរយៈពេលប្រមាណ១ឆ្នាំមកហើយ បន្ទាប់បែកធ្លាយដំណឹងនៃការធ្លាក់ខ្លួនឈឺរបស់នាងយ៉ាងភ្ញាក់ផ្អើលនោះ។
ការផ្អាក់ពីសិល្បៈរបស់តារាចម្រៀងកញ្ញា ខេមរៈ ស្រីពៅ អំឡុងពេលនោះ ត្រូវបានក្រុមគ្រួសារនិងសាមីខ្លួនធ្លាប់អះអាងថា ដោយសារបញ្ហាសុខភាព(ជំងឺ)ទើបបានជានាងសុខចិត្តដកឃ្លាពីវិថីសិល្បៈមួយរយៈពេលដើម្បីសម្រាកព្យាបាលជំងឺ។ ប៉ុន្តែកន្លងមកពុំធ្លាប់មានការបញ្ជាក់ច្បាស់ណាមួយថា ខេមរៈ ស្រីពៅ មានជំងឺអ្វីឲ្យពិតប្រាកដនោះទេ ពោលគឺត្រឹមតែមានការសង្ស័យលើបញ្ហាជំងឺប្រតិកម្មស្បែកតែប៉ុណ្ណោះ។
ស្របពេលដែលសាមីខ្លួនកញ្ញា ខេមរៈ ស្រីពៅ កំពុងតែរស់នៅដោយឃ្លាតឆ្ងាយពីសិល្បៈនិងតែងមានទស្សនិកជនមួយចំនួនចង់ដឹងពីបញ្ហាសុខភាពជាមួយការវិលចូលសិល្បៈរបស់នាងនោះ ក៏ស្រាប់តែតារាចម្រៀងប្រុសលោក ខេមរៈ សិរីមន្ត បានចេញមុខបញ្ជាក់ថា ប្អូនស្រីរបស់ខ្លួនកញ្ញា ខេមរៈ ស្រីពៅ បច្ចុប្បន្នត្រូវប្រឈមការវះកាត់ព្យាបាលជំងឺដ៏គ្រោះថ្នាក់មួយនាពេលខាងមុខនេះ។
លោក ខេមរៈ សិរីមន្តបានសរសេរភ្ជាប់ជាមួយរូបភាពប្អូនស្រីកំពុងតែសម្រាកព្យាបាលលើគ្រែនៃមន្ទីរពេទ្យថា ជាច្រើនឆ្នាំមកនេះប្អូនស្រីដ៏កំសត់ម្នាក់នេះមិនដែលចង់ឃើញ Fan ដែលគាំទ្រគាត់ពិបាកចិត្តព្រោះតែស្ថានភាពជំងឺរបស់គាត់ឡើយគាត់ចង់ឃើញFanគាត់រីករាយគ្រប់ពេលវេលា……។
តារាចម្រៀងល្បីឈ្មោះលំដាប់ប្រទេសលោក ខេមរៈ សិរីមន្ត បញ្ជាក់បន្ថែមថា ក្នុងនាមខ្ញុំជាបងប្រុសរបស់គាត់ចង់ប្រាប់បងប្អូនទាំងអស់គ្នាថានៅពេលខាងមុខនេះគាត់ត្រូវឆ្លងកាត់ការវះកាត់ដ៏គ្រោះថ្នាក់មួយ។ខ្ញុំជាបងប្រុសជូនពរប្អូនអោយឆ្លងផុតពេលវេលាដ៏លំបាកនេះបើបងប្អូនស្រលាញ់និងគាំទ្រគាត់សូមជូនពរគាត់អោយឆ្លងផុតគ្រោះនេះផងដើម្បីគាត់មានសុខភាពល្អមកបំពេញការងារសិល្បៈវិញ។ ថ្វីត្បិតតែបែបនេះក៏ពិតមែនពុំទាន់មានប្រភពណាបបង្ហើបទេថា ខេមរៈ ស្រីពៅ ត្រូវវះកាត់ព្យាបាលជំងឺអ្វីនៅឡើយទេ៕
Source: Kampuchea Thmey Daily
0 Comments