ការប្រកួតជម្រុះដណ្តើមខ្សែក្រវាត់ជើងឯកលេខ ១ គូបូតាទម្ងន់៥៤គីឡូក្រាម នៅសង្វៀនបាយ័នស្ទឹងមានជ័យ នៅយប់ថ្ងៃសុក្រទី០៥ ខែតុលា ឆ្នាំ២០១៨ខាងមុខនេះ ជាការប្រកួតជុំទី៣ របស់ខេម ចាន់ អ្នកប្រដាល់ក្លិបកងពលតូចទ័ពឆ័ត្រយោង៩១១និងផាន ផាត់យុទ្ធ អ្នកប្រដាល់ក្លិបសាលវ័ន្តកីឡា។
សម្រាប់ជំនួបក្នុងជុំទី៣នេះ ខេម ចាន់ គេនឹងត្រូវជួបជាមួយអ្នកប្រដាល់ឡាវ Wangngeun Rungrean Kilanakorn Phattorn ហើយផាន ផាត់យុទ្ធ គេជួបអ្នកប្រដាល់ថៃ Anuntasak Site Phukhorngyus ។
រវាងខេម ចាន់ និង Wangngeun មិនដែលប៉ះគ្នាទេកន្លងមក។ តែយ៉ាងណាខេម ចាន់ប្រហែលជួបការលំបាកបន្តិចហើយ មិនដូចជាកាលជំនួបលើកទី១ ជាមួយអ្នកប្រដាល់ថៃ Kaoreanghornនោះទេ ព្រោះWangngeun វាយឈ្នះរិទ្ធ អាទិត្យដោយពិន្ទុកាលពីជុំទី២នោះ ។
ទោះជាយ៉ាងនេះក្តី សម្រាប់ការជួបគ្នារវាងខេម ចាន់ និង Wangngeun នេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចមានអ្នកណាម្នាក់មើលស្រាលគ្នាបានដែរ ។
Wangngeun នេះ ជាអ្នកប្រដាល់ឡាវមានឈ្មោះល្បីគួរសមដែរនៅស្រុកឡាវ ។គេមិនធ្លាប់មកប្រកួតនៅស្រុកខ្មែរទេកន្លងមក។ កាលពីប្រកួតក្នុងជុំទី១ Wangngeun បានវាយចាញ់ផាន ផាត់យុទ្ធ ដោយពិន្ទុ និងជុំទី២ គេវាយឈ្នះរិទ្ធ អាទិត្យ ដោយពិន្ទុគឺមិនធម្មតាឡើយ។ដូច្នេះ Wangngeun ឆ្លងកាត់មួយពីរប្រកួត បាន៤ពិន្ទុ គឺឈ្នះ១ចាញ់១ប្រកួត ។
ខេម ចាន់ អ្នកប្រដាល់កម្ពុជាវិញ គេក៏មិនធម្មតានោះដែរ គេមានផ្លែល្អ ពិសេសកែងនិងជង្គង់ ដែលក្នុងជំនួបលើកទី១ គេបានវាយឈ្នះKaoreanghornដោយពិន្ទុ តែជំនួបលើកទី២ គេវាយចាញ់ឡាវ Seang Suriya ដោយពិន្ទុ ហេតុនេះសម្រាប់ជំនួបលើកទី៣នេះ គេក៏មិនទាន់ប្រាកដថាឈ្នះឬចាញ់ Wangngeun នោះដែរ ។ ខេម ចាន់ គេក៏មាន៤ពិន្ទុក្នុងដៃហើយដែរ ដោយពីរប្រកួតកន្លងមកគេឈ្នះ១ចាញ់១ប្រកួត ។
ចំពោះការជួបគ្នារវាងផាន ផាត់យុទ្ធ និង អ្នកប្រដាល់ថៃ Anuntasak Site Phukhorngyus វិញ ផាន ផាត់យុទ្ធ ក៏ប្រហែលជាមិនជួបការលំបាកប៉ុន្មានឡើយ ដោយសារអ្នកប្រដាល់ថៃរូបនេះ គេវាយពុំសូវខ្លាំងនោះ ។ ទោះជាយ៉ាងណា ផាត់យុទ្ធ មិនអាចមើលស្រាល Anuntasak បានឡើយ ព្រោះអ្នកប្រដាល់ថៃរូបនេះ មានកាយសម្បទាល្អ ដែលអ្នកណាក៏មិនមើលស្រាលគេបានដែរ ។
ផាន ផាត់យុទ្ធ ក្នុងការប្រកួតជុំទី១ គេវាយឈ្នះអ្នកប្រដាល់ឡាវ Wangngeun Rungreankilana kom Phattom ដោយពិន្ទុ និងជុំទី២ វាយឈ្នះថៃPlangthipដោយពិន្ទុ ដូច្នេះឆ្លងកាត់ពីរប្រកួតកន្លងមក ផាត់យុទ្ធបាន៦ពិន្ទុហើយ ឯ Anuntasak គេមានតែ៤ពិន្ទុទេ ដោយក្នុងជុំទី១ គេវាយឈ្នះចាន់ សាន់ ទឹក២ ហើយជុំទី២ គេវាយចាញ់ប៊ុន សុធា ក្នុងទឹកទី៣នោះ ។
ចាំមើល ការប្រកួតក្នុងជុំទី៣នេះ រវាងផាន ផាត់យុទ្ធ និង Anuntasak តើនរណាយកបាន៣ពិន្ទុបន្ថែមនោះ ? ។ សម្រាប់ការប្រកួតជម្រុះនេះ អ្នកឈ្នះទទួលបាន៣ពិន្ទុ អ្នកចាញ់បាន១ពិន្ទុ អ្នកបោះបង់ការប្រកួតបាន០ពិន្ទុ ។
សូមបញ្ជាក់ថា ការប្រកួតដណ្តើមខ្សែក្រវាត់គូបូតារដូវកាលថ្មីទម្ងន់៥៤គីឡូក្រាមនេះ មានអ្នកប្រដាល់ជើងខ្លាំងកម្ពុជា៥រូប និង អ្នកប្រដាល់ជើងខ្លាំងថៃ-ឡាវ ៥ រូប ចូលរួមវាយដណ្តើមយកខ្សែក្រវាត់នេះ ។
អ្នកប្រដាល់មួយរូបៗ ទាំងខ្មែរ ទាំងថៃ និងឡាវ គឺត្រូវឆ្លងកាត់ការប្រកួតក្នុងម្នាក់ៗ ចំនួន ៤ ប្រកួតម្នាក់ ហើយអ្នកដែលមានពិន្ទុច្រើន២រូបក្នុងមួយពូល ទាំងពូលខ្មែរ និង ពូលថៃ-ឡាវ នឹងត្រូវបានឡើងទៅប្រកួតវគ្គពាក់កណ្តាលផ្តាច់ព្រ័ត្រ និង ផ្តាច់ព្រ័ត្រ៕
Source: Kampuchea Thmey Daily
0 Comments