តារាសម្ដែង ស៊ីណាវ៉ាត់ត្រា ក្តាប់បានឱកាសដឹកដៃស្រីស្អាត ហក់ចូលក្រុមបង្ហាញម៉ូដ

ភ្នំពេញ ៖ តារាសម្តែងប្រុសសង្ហាធ្លាក់ឆ្លងកាត់ប្រវត្តិកំសត់ និងជាកូនកំព្រាឪពុកលោក ចាន់ស៊ីស៊ីណាវ៉ាត់ត្រា ស្របពេលដែលទីផ្សារសិល្បៈកាន់តែទទួលបានការគាំទ្រនិងមានប្រជាប្រិយភាពនោះ ពេលនេះក៏ស្រាប់តែក្តាប់បានឱកាសដឹកដៃតារាស្រីវ័យក្មេងដែលធ្លាប់សម្ដែងMVជាមួយគ្នាគឺកញ្ញា ស្រីពៅ ហក់ចូលក្នុងក្រុមបង្ហាញម៉ូដឲ្យទស្សនាវដ្ដីមួយដែលនឹងថតស្ទីលប្លែកៗបែបយុវវ័យបស្ចិមប្រទេស។

ជាការកត់សម្គាល់តារាសម្តែងប្រុសដែលមានដើមកំណើតមកពីខេត្តបាត់ដំបងលោក ស៊ីណាវ៉ាត់ត្រា បច្ចុប្បន្ន មិនត្រឹមតែមានភាពលេចធ្លោ និងទទួលបានឱកាសការងារសម្តែងសិល្បៈច្រើននោះទេ គឺលោកក៏កាន់តែធ្វើឲ្យទស្សនិកជនចាប់អារម្មណ៍និងលើកសរសើរពីសកម្មភាពមនុស្សធម៌ជាមួយអ្នកនាង ឆៃ លីដាឡែន តាមរយៈការចែកអាហារនិងសម្ភារៈដល់តា តាធាក់ស៊ីក្លូនិងជនអនាថានៅក្រុងភ្នំពេញទាំងកណ្ដាលអធ្រាត្រទៀតផង។

ទន្ទឹមគ្នានៃការចាប់បានឱកាសការងារថ្មីនេះដែរ លោក ចាន់ស៊ី ស៊ីណាវ៉ាត់ត្រា ប្រាប់ឲ្យដឹងថាថ្មីៗនេះខ្ញុំត្រូវក្រុមហ៊ុនមួយហៅឲ្យថតម៉ូដដាក់ទស្សនាវដ្ដីជាមួយកញ្ញា ស្រីពៅ រួមទាំងជាមួយពិធីការិនីម្នាក់នៅប៉ុស្តិ៍ទូរទស្សន៍មួយទៀតផងដែរ។ តាមពិតអាជីពបង្ហាញម៉ូដខ្ញុំស្រលាញ់ជាយូរមកហើយអញ្ចឹងនាពេលខាងមុខនេះខ្ញុំនឹងចាប់យកឲ្យដូចអាជីពសម្ដែងដែរព្រោះឲ្យតែការងារសិល្បៈខ្ញុំស្រលាញ់ទាំងអស់។

លោក ចាន់ស៊ី ស៊ីណាវ៉ាត់ត្រា បញ្ជាក់ថា អំឡុងពេលបច្ចុប្បន្ននេះដែរក៏មានខាងផលិតកម្មគេទាក់ទងហៅថតភាពយន្ដដែរតែខ្ញុំមិនទាន់ទទួលព្រោះខ្លាចមិនមានពេលវេលាគ្រប់គ្រាន់ដោយសារតែខ្ញុំជាប់ធ្វើការនៅក្រុមហ៊ុនមួយនៅខេត្តហេតុនេះហើយអាចឆ្លៀតបានតែថតMVនិងខាងFashionហ្នឹងព្រោះថតរយៈពេលខ្លីខុសពីការថតកុនដែលយើងត្រូវចំណាយពេលយូរថ្ងៃទើបអាចថតបាន។

ថ្វីត្បិតតែបែបនេះក៏ពិតមែនលោក ណាវ៉ាត់ត្រា គឺនៅមិនទាន់ច្បាស់ថា នឹងចូលរួមជាមួយក្រុមបង្ហាញម៉ូដណាមួយឲ្យពិតប្រាកនោះទេ តែតារាសម្ដែងរូបនេះលើកឡើងថា ចង់ថតសម្ដែងនិងបង្ហាញម៉ូដជាលក្ខណៈFreeLanceវិញប្រសើរជាងកុងត្រាឲ្យក្រុមហ៊ុនណាមួយដែលអាចមានបញ្ហានៅពេលដែលរូបគេគ្មានពេលគ្រប់គ្រាន់តាមលក្ខខណ្ឌសន្យានោះ។
សូមបញ្ជាក់ថា លោក ណាវ៉ាត់ត្រា គឺជាតារាសម្ដែងម្នាក់ដែលមានប្រវត្តិតស៊ូកម្សត់ព្រោះលោកជាកូនកំព្រាឪពុកតាំងពីនៅផ្ទៃម្ដាយម្ល៉េះ ហើយក្នុងវ័យកុមារលោកធ្លាប់ជាអ្នកទួលនំកងដើរលក់ទៀតផង។ ដោយសារឆ្លងកាត់ការលំបាកបែបនេះហើយទើបថ្មីៗនេះលោក ណាវ៉ាត់ត្រា បានចាប់ដៃជាមួយអ្នកនាង ឆៃ លីដាឡែន ធ្វើសកម្មភាពមនុស្សធម៌ចែកទានជូនតាតាធាក់ស៊ីក្លូ និងជនអនាថាគេងនៅតាមចិញ្ចើមផ្លូវនាក្រុងភ្នំពេញជាដើម៕