ធន់​ចាន់​តាក់ អាច​យកឈ្នះ ហា ឆ្លាម ឬ​អត់​?

ធន់ ចាន់​តាក់ អ្នក​ប្រដាល់​សមាគម​កីឡាប្រដាល់​ក្រសួងការពារជាតិ និង ជា​ម្ចាស់​ខ្សែក្រវាត់ ត្រូវគេ​ផ្គូផ្គង​អោយ​ជួប​ប្រកួត​ជាមួយ​អ្នក​ប្រដាល់​ថៃ ហា ឆ្លាម​(Har Chhlam) ដោយ​ប្រកួត​គ្នា​ក្នុង​ទម្ងន់​៦៣,៥០០ គ​.​ក្រ ។ ពីរ​នាក់​នេះ ប្រកួត​គ្នា​នៅក្នុង​កម្មវិធី​ប្រដាល់ TV5 Knock Out Series by K.Cement លើ​សង្វៀន TV5 ព្រែកកំពឹស នា​យប់​ថ្ងៃ​សៅរ៍ ទី​០៦ តុលា ២០១៨​នេះ។

​ចាន់​តាក់ ជា​អ្នក​ប្រដាល់​ដែល​ចាត់ទុកថា ជា​ជើង​ខ្លាំង​ស្រករ​ក្រោយ​ម្នាក់ ។ គេ​បាន​ឆ្លងកាត់​ការប្រកួត​ជាមួយ​អ្នក​ប្រដាល់​ថៃ​ប្រមាណ​ជាង​២០​នាក់​ទាំង​លើក​នេះ ។ កាលពី​ជួប​ប្រកួត​ជាមួយ​ថៃ​លើកចុងក្រោយ​នេះ (១១​សីហា​២០១៨) គេ​បាន​ផ្តួល​ថៃ​Yorth Phit អោយ​សន្លប់​ក្នុង​ទឹក​ទី​៤ ។​

ធន់ ចាន់​តាក់ មាន​ប្រវត្តិ​ប្រកួត​ប្រមាណ​ជា​៧០​លើក ក្នុងនោះ​វាយ​ឈ្នះ​៥៨ ចាញ់​១១ លើក និង​ស្មើ ០១​លើក ។ គេ​ជា​អ្នក​ប្រដាល់​ជើង​ខ្លាំង​ស្រករ​ក្រោយ ដែលមាន​ចិត្តធំ កម្លាំង​ខ្លាំង វាយ​មិន​សំចៃ​ដៃ​ឡើយ​។​ប៉ុន្តែ​យ៉ាងណា​ការប្រកួត​លើក​នេះ មិនដឹងថា ចាន់​តាក់​អាច​យកឈ្នះ​ហា ឆ្លាម បាន​ឬក៏​អត់​នោះទេ​? ។ តែបើ​អាច​ឈ្នះ​បាន គឺមាន​តែ​ការ​វាយ​ប្តូរ​កែង​មួយ​មុខ​គត់ ដែល​ប្រថុយ​ដូរ​ជាមួយនឹង​ជ័យជំនះ ។
​
ហា ឆ្លាម ជា​ជើង​ខ្លាំង​និង​ជា​ម្ចាស់​ខ្សែក្រវាត់ ដែលមាន​ស្នៀត​ទាត់ និង​កណ្តាប់ដៃ​ល្អ ។​ដូច្នេះ​ធន់ ចាន់​តាក់​ប្រកួត​លើក​នេះ អាច​នឹង​ជួប​ការលំបាក​ច្រើន ព្រោះ​អ្នក​ប្រដាល់​ថៃ​រូបនេះ​មាន​ស្នៀត​ប្រដាល់​ល្អ​និង​ខ្លាំង ។
​
អ្នក​ប្រដាល់​ថៃ​រូបនេះ ធ្លាប់​មក​ប្រកួត​នៅ​កម្ពុជា​ប្រមាណ​ពីរលើក​ហើយ ដែល​ការ​មក​ប្រកួត​លើកចុងក្រោយ​នេះ​(១៥​កញ្ញា​២០១៨) គេ​មក​ប៉ះ​ជាមួយ​វេ​ង សុ​ភ័​ក្រ អ្នក​ប្រដាល់​ក្លិប​កងពលតូច​ទ័ព​ឆ័​ត្រ​យោង​៩១១ ។​កាលពី​មកលើ​ក​ទី​១(០១​កញ្ញា​២០១៨) គេ​បាន​ផ្តួល សេង ស្រឿ​ន អ្នក​ប្រដាល់​កម្ពុជា​ក្លិប​ម​ហិ​ទ្ធ​រិ​ទ្ធ​តា​ដំបង​ដែក ឲ្យ​បោះបង់​ការប្រកួត​មុន​ទឹក​ទី​៥ ។ អ្នក​ប្រដាល់​ថៃ​រូបនេះ មាន​ប្រវត្តិ​ប្រកួត​ចំនួន​ធ្លាប់​ប្រកួត​បាន​ចំនួន ៥៨​លើក ឈ្នះ ៥១ លើក និង​ចាញ់ ០៧ លើក មិនដែល​ស្មើ​។​ចាំមើល រវាង ធន់ ចាន់​តាក់ និង ហា ឆ្លាម តើន​រណា​ជា​អ្នកឈ្នះ​នៅក្នុង​ការជួបគ្នា​នេះ ? ។​
​
ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ តក់ សោ​ភ័​ណ្ឌ អ្នក​ប្រដាល់​ក្លិប​មកុដ​រាជសីហ៍ ដែល​ទើប​វិល​មក​សង្វៀន​ប្រដាល់​វិញ​នោះ ត្រូវគេ​ផ្គូ​អោយ​ជួប​ប្រកួត​ជាមួយ ធី តុង​ហ៊ី អ្នក​ប្រដាល់​ក្លិប​ពន្លឺ​វិបុល​មាន​រិ​ទ្ធ ដោយ​ប្រកួត​គ្នា​ក្នុង​ប្រភេទ​ទម្ងន់​៦៩​គីឡូក្រាម ។​
​តក់ សោ​ភ័​ណ្ឌ កាលពី​សប្តាហ៍​មុន​ត្រូវគេ​ផ្តល់​ឪ​កាស​ឲ្យ​ឡើង​ប្រកួត​ជាមួយ ចាន់ សំអាត អ្នក​ប្រដាល់​ក្លិប​អប់រំ​កាយ​ស្រុក​អន្លង់វែង ខេត្ត​ឧ​ត្ត​រ​មានជ័យ ហើយ​ត្រូវ​វាយ​ចាញ់​សំអាត ក្នុង​ទឹក​ទី​៣ ដោយសារ​ខូច​ជើង​ក្រោម ។​
​
មក​ប៉ះ​ជាមួយ​ធី តុង​ហ៊ី លើក​នេះ តក់ សោ​ភ័​ណ្ឌ ក៏​ប្រហែលជា​យ៉ាប់​ដែរ ព្រោះ​តុង​ហ៊ី គេ​ខ្លាំង​ជាង​ចាន់ សំអាត​ទៅទៀត គ្រាន់តែ​តុង​ហ៊ី​ឥឡូវ​រាង​អន់​ខ្សោយកម្លាំង​កាយសម្បទា​ប៉ុណ្ណោះ ។
​ស៊ឹម ប៊ុនឆៃ អ្នក​ប្រដាល់​ក្លិប​ព្រៃទទឹង​ខេត្តបាត់ដំបង នឹង​ជួប​ប្រកួត​ជាមួយ​ធន់ ចាន់​ឌី អ្នក​ប្រដាល់​ក្លិប​មជ្ឈមណ្ឌល​កីឡាខ​.​ភ​.​ម ។​ពីរ​នាក់​នេះ ប្រកួត​គ្នា​ក្នុង​ទម្ងន់​៥៧​គីឡូក្រាម​។​ពីរ​នាក់​នេះ មិន​ធ្លាប់​ដែល​ជួបគ្នា​ទេ​កន្លងមក ។​
​
ធន់ ចាន់​ឌី ជា​អ្នក​ប្រដាល់​ជើង​ថ្មី ដែល​ផ្ទុយ​ពី​ស៊ឹម ប៊ុនឆៃ ជា​អ្នក​ប្រដាល់​ចាស់វស្សា ។​ប៉ុន្តែ​យ៉ាងណា ប៊ុនឆៃ មិនដឹងថា​អាច​យកឈ្នះ​ធន់ ចាន់​ឌី បាន​ឬ​អត់​នោះទេ​? ។​
​ចំណែក ឡុង ចាន់​សាន់ អ្នក​ប្រដាល់​ក្លិប​សាល​វ័​ន្ត​កីឡា ត្រូវគេ​ផ្គូ​អោយ​ជួប​ប្រកួត​ជាមួយ​ពុទ្ធ ភា​រិន្ទ អ្នក​ប្រដាល់​ក្លិប​ពុទ្ធ​សេរី​វង្ស​កីឡា ដោយ​ប្រកួត​គ្នា​ក្នុង​ទម្ងន់​៥៧​គីឡូក្រាម​ដែរ ។ ឯ សាន វាសនា ក្លិប​អា​រុណ​រះ​កីឡា នឹង​ជួប​ប្រកួត​ជាមួយ ឡុង ភី​រម្យ ក្លិប​តា​ឡី​ដំរី​មាន​រិ​ទ្ធ ក្នុង​ប្រភេទ​ទម្ងន់​៥៧​គីឡូក្រាម​ដែរ៕

Source: Kampuchea Thmey Daily