ភ្នំពេញ ៖ លោកជំទាវ ជុង ធីម៉ាយ (Truong Thi Mai) សមាជិកការិយាល័យលេខាមជ្ឈិមបក្ស និងជាប្រធានគណៈចលនាមហាជន នៃគណៈកម្មាធិការមជ្ឈិមបក្សកុម្មុយនីស្តវៀតណាម បានលើកឡើងថា ក្រុមហ៊ុនវៀតណាមនៅកម្ពុជា រហូតមកដល់ពេលនេះមានគម្រោងវិនិយោគរហូតដល់ ២០៦គម្រោង ដែលមានទំហំទឹកប្រាក់ប្រមាណជា ៣០០០លានដុល្លារអាមេរិក ហើយចំពោះការដោះដូរពាណិជ្ជកម្មក៏មានការរីកចម្រើនខ្លាំង ដែលទិសដៅនៃប្រទេសទាំងពីរនឹងជំរុញទំហំពាណិជ្ជកម្មជាមួយគ្នាឲ្យដល់ទំហំ ៥០០០លានដុល្លារក្នុងពេលឆាប់ៗខាងមុខនេះ។
នៅក្នុងឱកាសសម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា អនុញ្ញាតឲ្យចូលជួបសម្តែងការគួរសម និងពិភាក្សាការងារ ព្រឹកថ្ងៃទី២៦ ខែតុលានេះនៅវិមានរដ្ឋសភា ខណៈពេលដែលលោកជំទាវដឹកនាំគណៈប្រតិភូគណៈចលនាមហាជន នៃគណៈកម្មាធិការមជ្ឈិមបក្សកុម្មុយនីស្តវៀតណាមធ្វើទស្សនកិច្ចនៅកម្ពុជា លោកជំទាវ ជុង ធីម៉ាយ បានជម្រាបជូនសម្តេចប្រធានរដ្ឋសភា ពីដំណើរទស្សនកិច្ចរបស់គណៈប្រតិភូលោកជំទាវនៅកម្ពុជានាពេលនេះ ដើម្បីរួមចំណែកទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរកម្ពុជា-វៀតណាម ជាពិសេសរវាងគណៈចលនាមហាជននៃប្រទេសទាំងពីរឲ្យកាន់តែល្អប្រសើរ។
លោកជំទាវក៏បានសម្តែងនូវការភ្ញាក់ផ្អើលដោយបានឃើញផ្ទាល់ភ្នែកនូវការរីកចម្រើន ការអភិវឌ្ឍលើគ្រប់វិស័យរបស់កម្ពុជា ក្រោមការដឹកនាំដ៏ត្រឹមត្រូវរបស់រាជរដ្ឋាភិបាល ក៏ដូចជារដ្ឋសភាកម្ពុជា។ លោកជំទាវបានសម្តែងអបអរសាទរ និងជូនពរឲ្យកម្ពុជាកាន់តែមានការអភិវឌ្ឍរីកចម្រើនបន្ថែមទៀត។ លោកជំទាវ ជុង ធីម៉ាយ ក៏បានស្នើសុំសម្តេចប្រធានជួយបន្តគាំទ្រចំពោះអនិកជនវៀតណាម ដែលរស់នៅដោយស្របច្បាប់នៅកម្ពុជា ក៏ដូចជាវិនិយោគិនវៀតណាម ដែលបានបោះទុន និងប្រកបរបរទទួលទាននៅកម្ពុជាដោយស្របច្បាប់ផងដែរ។
សម្តេចអគ្គមហាពញាចក្រី ហេង សំរិន ប្រធានរដ្ឋសភា បានស្វាគមន៍ និងវាយតម្លៃខ្ពស់ចំពោះដំណើរទស្សនកិច្ចរបស់គណៈប្រតិភូ ដែលដឹកនាំដោយលោកជំទាវ ជុង ធីម៉ាយ ប្រធានគណៈចលនាមហាជន នៃគណបក្សកុម្មុយនីស្តវៀតណាម។ សម្តេចប្រធានបានបញ្ជាក់ថា ជាទស្សនកិច្ចដែលបានរួមចំណែកបន្តពូនជ្រុំទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យរវាងបក្ស រដ្ឋាភិបាល និងប្រជាជនប្រទេសទាំងពីរកម្ពុជា-វៀតណាមឲ្យកាន់តែរឹងមាំ និងខ្លាំងក្លាទ្វេដងទៀត។ សម្តេចប្រធានបានកោតសរសើរចំពោះកិច្ចខិតខំប្រឹងប្រែងគណៈចលនាមហាជនវៀតណាម ដែលបានរួមចំណែកអភិវឌ្ឍន៍ទំនាក់ទំនងប្រទេសទាំងពីរ ជាពិសេសរួមចំណែកពង្រីកកិច្ចសហប្រតិបត្តិការរវាងគណៈចលនាមហាជននៃប្រទេសទាំងពីរ ដើម្បីផលប្រយោជន៍គ្នាទៅវិញទៅមក។
សម្តេចប្រធានក៏បានលើកឡើងផងដែរគណៈចលនាមហាជនកម្ពុជាដឹកនាំដោយលោកជំទាវ ម៉ែន សំអន ក្នុងនោះដែរលោកជំទាវបានខិតខំយ៉ាងសកម្មធ្វើយ៉ាងណាដើម្បីឲ្យគណៈចលនាមហាជនមានការរីកចម្រើន ហើយទទួលបានលទ្ធផលល្អ ជាពិសេសខិតខំជំរុញកិច្ចសហប្រតិបត្តិការជិតស្និទ្ធរវាងគណៈចលនាមហាជនវៀតណាម-កម្ពុជា ដើម្បីផ្តល់បទពិសោធន៍ឲ្យគ្នាទៅវិញទៅមក ដើម្បីឧត្តមប្រយោជន៍ប្រជាជនទាំងពីរ។
សម្តេចក៏បានសម្តែងនូវការគាំទ្រផងដែរចំពោះកិច្ចសហប្រតិបត្តិការនេះ ហើយជំរុញឲ្យបន្តកិច្ចសហប្រតិបត្តិការកាន់តែស្អិតរមួតរវាងគណៈចលនាមហាជនទាំងពីរ។ សម្តេចក៏បានសម្តែងនូវការពេញចិត្តចំពោះសមិទ្ធផល និងវឌ្ឍនភាពនានាដែលប្រទេសទាំងពីរមានជាមួយគ្នា្នកន្លងមក។ ចំពោះកិច្ចសហប្រតិបត្តិការនានាទាំងបក្ស រដ្ឋាភិបាលមានការរីកចម្រើនយ៉ាងខ្លាំងពីមួយថ្ងៃទៅមួយថ្ងៃ ដែលកិច្ចសហប្រតិបត្តិការល្អប្រសើរនេះ ជាកិច្ចសហប្រតិបត្តិការមិត្តភាព សាមគ្គីភាពជាប្រពៃណី ហើយនិងជាកិច្ចសហប្រតិបត្តិការលើគ្រប់វិស័យនិងយូរអង្វែង។ សម្តេចក៏បានលើកឡើងផងដែរថា ប្រទេសទាំងពីរកម្ពុជា-វៀតណាម មានទំនាក់ទំនងជាប្រពៃណី ហើយជួយគ្នាទៅវិញទៅមក ហើយសហការគ្នា ប្រកៀកស្មាគ្នា តស៊ូប្រយុទ្ធប្រឆាំងនឹងអាណានិគម ចក្រព័ត្រនិយម ដើម្បីប្រទេសជាតិទទួលបានឯករាជ្យភាពរៀងៗខ្លួន។
សម្តេចបានលើកឡើងផងដែរថា ក្នុងដំណាក់កាលថ្មីនេះប្រទេសយើងទាំងពីរនឹងបន្តរួមគ្នា ដើម្បីកសាងអភិវឌ្ឍន៍ប្រទេសជាតិ និងលើកកម្ពស់ជីវភាពរស់នៅរបស់ប្រជាជនឲ្យកាន់តែល្អប្រសើរ ហើយនឹងពង្រីកកិច្ចសហប្រតិបត្តិការជាមួយគ្នាឲ្យកាន់តែស៊ីជម្រៅថែមទៀត។ ក្នុងនាមប្រជាជនកម្ពុជា សម្តេចប្រធានបានថ្លែងអំណរគុណចំពោះបក្ស រដ្ឋាភិបាល និងប្រជាជនវៀតណាម ដែលបានជួយឧបត្ថម្ភចំពោះប្រជាជនកម្ពុជា ក្នុងបុព្វហេតុរំដោះជាតិ ក៏ដូចជាដំណើរការអភិវឌ្ឍរហូតសព្វថ្ងៃនេះ៕
Source: Kampuchea Thmey Daily
0 Comments