ភ្នំពេញ ៖ លោក Jack Myrnt នាយកប្រតិបត្តិនៃក្រុមប្រឹក្សាធុរកិច្ចសហរដ្ឋអាមេរិក-អាស៊ានប្រចាំព្រះរាជាណាចក្រកម្ពុជា រួមជាមួយតំណាងសភាពាណិជ្ជកម្មកម្ពុជា និងតំណាងក្រុមហ៊ុនធំៗដែលវិនិយោគលើវិស័យកសិកម្មនៅកម្ពុជា បានប្រកាសថា នឹងជួយធ្វើការគាំទ្រដល់រាជរដ្ឋាភិបាលក្នុងការអភិវឌ្ឍវិស័យកសិកម្ម ចងក្រង និងអនុវត្តនូវវិធាននានាដែលទាក់ទងនឹងវិស័យកសិកម្ម ។
ការប្រកាសជួយ នេះបានធ្វើឡើងកាលពី ព្រឹកថ្ងៃនេះដែលជាថ្ងៃពុធ ៩រោច ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣ ខែតុលា ឆ្នាំ២០១៨ នៅទីស្តីការក្រសួងកសិកម្មនៅក្នុងជំនួបជាមួយ លោក វេង សាខុន រដ្ឋមន្ត្រីកសិកម្ម ។ក្រសួង បានឲ្យដឹងថា ដើម្បីផ្សារភ្ជាប់លទ្ធផលនៃជំនួបកំពូលរវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយលោក Michael Walter Michalak នាយកគ្រប់គ្រងតំបន់ និងក្រុមប្រឹក្សាធុរកិច្ចសហរដ្ឋអាមេរិក-អាស៊ាន កាលពីថ្ងៃទី២ ខែតុលា នៅវិមានសន្តិភាព លោក Jack Myrnt នាយកប្រតិបត្តិនៃក្រុមប្រឹក្សាធុរកិច្ចសហរដ្ឋអាមេរិក-អាស៊ានប្រចាំព្រះរាជាណាចក្រកម្ពុជា រួមជាមួយតំណាងសភាពាណិជ្ជកម្មកម្ពុជា និងតំណាងក្រុមហ៊ុនធំៗដែលវិនិយោគលើវិស័យកសិកម្មនៅកម្ពុជា ចូលជួប ជាមួយ លោកវេង សាខុន ដើម្បីពិភាក្សាការងារ។
ក្នុងឱកាសនោះលោកប្រធានប្រតិភូបានជម្រាបជូនលោក រដ្ឋមន្ត្រីពីគោលបំណងនៃជំនួបនាថ្ងៃនេះគឺទី១-ជួយធ្វើការគាំទ្រដល់រាជរដ្ឋាភិបាលក្នុងការអភិវឌ្ឍវិស័យកសិកម្ម ទី២-ជួយរៀបចំចងក្រង និងអនុវត្តនូវវិធាននានាដែលទាក់ទងនឹងវិស័យកសិកម្ម ទី៣-កសាងនិងអភិវឌ្ឍធនធានមនុស្សលើវិស័យកសិកម្ម និងទី៤-គាំទ្រ និងលើកទឹកចិត្តដល់សហគ្រាសខ្នាតតូច និងមធ្យម (SME)។
មានមតិស្វាគមន៍លោក រដ្ឋមន្ត្រី បានសម្តែងនូវទឹកចិត្តសប្បាយរីករាយដោយបានឃើញសមិទ្ធផលថ្មីៗជាច្រើនដែលកើតឡើងរវាងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក និងសូមថ្លែងអំណរគុណយ៉ាងជ្រាលជ្រៅជូនចំពោះលោក Jack Myrnt និងសហការី ដែលបានអញ្ជើញមកក្រសួងនាព្រឹកនេះបំណងស្វែងយល់បន្ថែមពីសក្តានុពលលើវិស័យកសិកម្មនាពេលបច្ចុប្បន្ន។ នាឱកាសនេះ លោក រដ្ឋមន្ត្រីបានជម្រាបជូនភ្ញៀវដោយសង្ខេបពីអនុវិស័យមួយចំនួនដែលមានសក្តានុពលសម្រាប់ធ្វើការវិនិយោគក្នុងនោះមាន ផលិតកម្មស្រូវ ពោត ដំឡូងមី ស្វាយ ស្វាយចន្ទី ចេក កៅស៊ូ វារីវប្បកម្មទឹកសាបនិងសមុទ្រ និងផលិតកម្មសត្វផងដែរ។ល។ ដែលអនុវិស័យទាំងនោះទាមទារធ្វើការវិនិយោគទាំងលើការងារផលិតកម្ម ដើម្បីបង្កើនផលិតភាពផលិតកម្ម គុណភាព និងសុវត្ថិភាព តាមរយៈការអនុវត្តបច្ចេកវិទ្យាកសិកម្មទំនើប និងការអនុវត្តកសិកម្មតាមកិច្ចសន្យា និងការងារកែច្នៃជាផលិតផលពាក់កណ្តាលសម្រេច ឬផលិតផលសម្រេចតែម្តងដែលអាចធ្វើការប្រកួតប្រជែងទាំងទីផ្សារក្នុងស្រុក និងទីផ្សារអន្តរជាតិ ដែលនេះគឺជាប្រសាសន៍ណែនាំរបស់សម្តេចតេជោនាជំនួបកាលពីថ្ងៃម្សិលមិញផងដែរ។
លោករដ្ឋមន្ត្រីក៏បានបញ្ជាក់ជូនភ្ញៀវផងដែរថា ដោយយល់ឃើញពីតម្រូវការចាំបាច់ក្នុងការនាំចេញកសិផល បច្ចុប្បន្នរាជរដ្ឋាភិបាលបានដាក់ចេញនូវផែនការយុទ្ធសាស្ត្រ និងគោលនយោបាយគាំទ្រសហគ្រាសខ្នាតតូច និងមធ្យម និងអភិវឌ្ឍលើហេដ្ឋារចនាសម្ព័ន្ធសំខាន់ៗជាអាទិ៍៖ ផ្លូវគមនាគមន៍ កំពង់ផែរទឹងជ្រៅ ព្រលានយន្តហោះ ការផ្តត់ផ្គង់អគ្គិសនី។ល។ ដោយឡែក ក្រសួងបាននិងកំពុងជំរុញការអភិវឌ្ឍធនធានមនុស្ស ដើម្បីជួយជំរុញវិស័យកែច្នៃ វេចខ្ចប់ឲ្យមានការរីកចម្រើនដើម្បីធ្វើការនាំចេញកសិផលនាពេលអនាគត។
ដើម្បីឲ្យកិច្ចសហប្រតិបត្តិការរវាងភាគីទាំងពីរបានប្រព្រឹត្តទៅដោយរលូន លោករដ្ឋមន្ត្រីបានណៃនាំដល់អង្គភាពជំនាញធ្វើការសហការជាមួយសមាជិកក្រុមប្រឹក្សាធុរកិច្ចសហរដ្ឋអាមេរិក-អាស៊ាន ឲ្យបានខ្ជាប់ខ្ជូន និងមានប្រសិទ្ធភាព មិនត្រឹមតែប៉ុណ្ណោះ ក្រសួងនឹងរង់ចាំផ្តល់កិច្ចសហការឲ្យអស់ពីលទ្ធភាព។ លោករដ្ឋរដ្ឋមន្ត្រីក៏បានឯកភាពលើសំណើរបស់ក្រុមប្រឹក្សាធុរកិច្ចសហរដ្ឋអាមេរិក-អាស៊ាន ក្នុងការរៀបចំកិច្ចប្រជុំជាមួយក្រុមហ៊ុនសហរដ្ឋអាមេរិកមួយចំនួនទៀតដែលមានបំណងមកវិនិយោគលើវិស័យកសិកម្មនៅកម្ពុជានាពេលឆាប់ៗខាងមុខនេះ៕
Source: Kampuchea Thmey Daily
0 Comments