ភ្នំពេញ ៖ គិតត្រឹមខែសីហា ២០១៨ សមតុល្យប្រាក់បញ្ញើសន្សំរបស់ហត្ថាកសិករ មានចំនួនជាង ៤២០ លានដុល្លារអាមេរិក ជាមួយនឹងចំនួនអតិថិជន ប្រាក់បញ្ញើសន្សំជាង ២៣០,០០០ នាក់ ផលប័ត្រឥណទានសរុបមាន ចំនួនប្រមាណ ៦៨៣ លានដុល្លារអាមេរិក ដោយមានអតិថិជនចំនួន ជាង១៣០,០០០ នាក់។ ទ្រព្យសកម្មសរុប របស់ហត្ថាកសិករមានចំនួន៨៤៣លានដុល្លារអាមេរិក។
ដោយមានការជឿទុកចិត្ត និងគាំទ្រច្រើនពីអតិថិជន ហត្ថាកសិករ លីមីតធីត ដែលជាគ្រឹះស្ថានមីក្រូហិរញ្ញវត្ថុឈានមុខមួយនៅកម្ពុជា បានប្រកាសដាក់ លក់ជាផ្លូវការនូវផលិតផលសន្សំផលច្រើន ដើម្បីបំពេញតាមតម្រូវការដែលចេះតែកើនឡើងជាលំដាប់របស់អតិថិជន។
នៅក្នុងសន្និសីទបើកលក់ផលិតផលថ្មីដែលបានធ្វើឡើងកាលពីល្ងាចថ្ងៃទី២ ខែតុលា ឆ្នាំ២០១៨នៅទីតាំងហត្ថាកសិករ លីមីតធីតសាខាផ្សារអំពៅ លោក ម៉ិច សុខមេត្រី ដែលជាអគ្គនាយកអភិវឌ្ឍអាជីវកម្មនៃគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត បានមានប្រសាសន៍ថា “ដោយយើងសង្កេតឃើញថា ផលិតសន្សំដែលកំពុងដាក់លក់នៅលើទីផ្សារភាគច្រើនផ្តល់នូវអត្រាការប្រាក់ទាប ធ្វើអោយអតិថិនជនមិនទទួលបានអត្ថប្រយោជន៍ច្រើននោះទេក្នុងការសន្សំប្រាក់នៅធនាគារ ឫគ្រឹះស្ថានហិរញ្ញវត្ថុ តែបើអតិថិជនចង់បាន ផលិតផលដែលផ្តល់អត្រាការប្រាក់ខ្ពស់វិញ គឺអតិថិជននឹងមិនអាចដកប្រាក់នោះមកប្រើបានទេក្នុងកំឡុងពេលដាក់នោះ គឺគាត់ត្រូវរក្សាប្រាក់នោះទុករហូតដល់កាលកំណត់ទើបអាចដកយកមកប្រើប្រាស់បាន ដូច្នេះធ្វើអោយគាត់មានការពិបាកក្នុងការដកប្រាក់មកប្រើប្រាស់តាមតម្រូវការណាស់។ យើងសង្ឃឹមថាផលិតផលសន្សំផលច្រើនដែលយើងដាក់លក់នៅពេលនេះពិតជាអាចដោះស្រាយនូវបញ្ហាដែលអតិថិជនបាននឹងកំពុងជួបប្រទះទាំងនេះបាន”។
អតិថិជននៃ ផលិតផលសន្សំផលច្រើនអាចទទួលបានអត្រាការប្រាក់ខ្ពស់លើសពីគណនីសន្សំនានានៅលើទីផ្សារទាំងអស់ ហើយអតិថិជន ក៏អាចដកប្រាក់សន្សំទាំងនោះយ៉ាងងាយស្រួលតាមបណ្តាសាខាហត្ថាកសិករទាំង១៧៨ការិយាល័យទូរទាំងប្រទេស បណ្តាញអេធីអឹមទូទាំងប្រទេស និងអតិថិជនក៏អាចធ្វើការផ្ទេរប្រាក់បានជាមួយនឹងផលិតផលសន្សំផលច្រើននេះដែរ។សម្រាប់ឱកាសដាក់លក់លើកដំបូងនេះ ហត្ថាកសិករនឹងផ្តល់ជូន អត្រាការប្រាក់រហូតដល់ទៅ ៥.៥% ក្នុងមួយឆ្នាំ សំរាប់ការបើកគណនីនេះ។
លោកឧកញ៉ា ហួត អៀងតុង ប្រធានអគ្គនាយកនៃគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត បានមានប្រសាសន៍ថា "ហត្ថាកសិករ លីមីតធីត តែងតែយកចិត្តទុក ដាក់ខ្ពស់ និង បង្កើតនូវផលិតផលថ្មីៗបន្ថែមទៀតដើម្បីបំពេញតម្រូវការរបស់អតិថិជន ក៏ដូចជា គាំទ្រដល់ការរីកចម្រើនរបស់អតិថិជន និងអាជីវកម្មរបស់ពួកគាត់ ជាក់ស្តែងដូចជាផលិតផល សន្សំផលច្រើនជាឧទាហរណ៍ស្រាប់”។ ជាមួយនឹងផលិតផលសន្សំផលច្រើន អតិថិជនក៏ទទួលបានអត្ថប្រយោជន៍មួយចំនួនបន្ថែមទៀតដូចជា ទទួលបានសៀវភៅធនាគារលើកដំបូងដោយឥតគិតថ្លៃ ព្រមទាំងមិនគិតកម្រៃសេវាទៅលើការចុះឈ្មោះ និងការថែរក្សាកាតអេធីអឹមសម្រាប់ឆ្នាំដំបូង។ សម្រាប់អតិថិជនដែលចាប់អារម្មណ៍ចំពោះការសន្សំតាមរយៈផលិតផលសន្សំផលច្រើននេះ លោកអ្នកអាចទាក់ទងទៅគ្រប់ការិយាល័យរបស់ហត្ថាកសិករទាំងអស់ដែលនៅក្បែរលោកអ្នក ឬក៏ទាក់ទងមកលេខទូរស័ព្ទ៖023 999 266 ៕
Source: Kampuchea Thmey Daily
0 Comments