ជនជាតិអាហ្វហ្គានីស្ថាន កំពុងប្រឈមនឹងអំពើហិង្សាសម្លាប់មនុស្សខ្លាំងជាងមុននៅថ្ងៃសៅរ៍ ខណៈការបោះឆ្នោតបានចាប់ផ្តើមនៅក្នុងការបោះឆ្នោតនីតិបញ្ញត្តិពន្យារពេលដ៏យូរដែលក្រុមតាលីបង់ប្តេជ្ញាវាយប្រហារ។
មណ្ឌលបោះឆ្នោតបានបើកនៅម៉ោង៧ព្រឹកនៅទូទាំងប្រទេសដែលហែកហួរដោយសង្គ្រាមមួយនេះខណៈកងកម្លាំងសន្តិសុខ៥៤,០០០នាក់ត្រូវបានដាក់ពង្រាយដើម្បីការពារពួកគេ។
ប៉ុន្តែមានការព្រួយបារម្ភថា ការសម្លាប់មេប៉ូលិសដ៏មានអំណាចមួយរូបនៅភាគខាងត្បូងប្រទេសអាហ្វហ្គានីស្ថានកាលពីថ្ងៃព្រហស្បតិ៍នឹងបំភ័យអ្នកបោះឆ្នោតជាច្រើននាក់។
ការបោះឆ្នោតត្រូវបានពន្យារពេលនៅក្នុងខេត្ត Kandahar រហូតដល់ថ្ងៃទី២៧ខែតុលាបន្ទាប់ពីការវាយប្រហាររបស់ពួកតាលីបង់លើកិច្ចប្រជុំសន្តិសុខអាមេរិក - អាហ្វហ្គានីស្ថានមួយបានសម្លាប់មនុស្សបីនាក់រួមទាំងលោកឧត្តមសេនីយ៍ Abdul Raziq ផងដែរ។
លោកឧត្តមសេនីយ៍ Scott Miller ដែលជាមេបញ្ជាការជាន់ខ្ពស់អាមេរិកនិងអង្គការណាតូប្រចាំ ប្រទេសអាហ្វហ្គានីស្ថានបានគេចផុតពីការបាញ់ប្រហារប៉ុន្តែមនុស្ស១៣នាក់ទៀតរងរបួស។
គណៈកម្មការរៀបចំការបោះឆ្នោតឯករាជ្យ (IEC) កាលពីថ្ងៃសុក្របានជំរុញឲ្យអ្នកបោះឆ្នោតចេញទៅបោះឆ្នោតហើយបានអំពាវនាវដល់អ្នកដទៃមិនឲ្យជ្រៀតជ្រែកក្នុងដំណើរការនេះ។
ប្រមុខ IEC លោក Abdul Badi Sayyad បានប្រាប់ក្រុមអ្នកយកព័ត៌មានថា “ពួកគេគួរតែគោរពភាពមិនលំអៀងនៅក្នុងការបោះឆ្នោតដើម្បីឲ្យយើងមានការបោះឆ្នោតមួយប្រកបដោយតម្លាភាព មិនលំអៀងនិងយុត្តិធម៌នៅក្នុងប្រទេសអាហ្វហ្គានីស្ថាន”។
ប្រជាជនជិត៩លាននាក់បានចុះឈ្មោះបោះឆ្នោតនៅក្នុងការបោះឆ្នោតសភាដែលពន្យាពេលជាងបីឆ្នាំហើយជាលើកទីបីចាប់តាំងពីការដួលរលំនៃពួកតាលីបង់ក្នុងឆ្នាំ២០០១។
ប៉ុន្តែការគំរាមកំហែងនៃការវាយប្រហារនិងការរំពឹងទុកអំពីការលួចបន្លំដ៏ធំត្រូវបានគេគិតទុកថានឹងរារាំងអ្នកបោះឆ្នោតមិនឲ្យបង្ហាញខ្លួននៅមណ្ឌលបោះឆ្នោតជាង៥,០០០កន្លែង។
គួរបញ្ជាក់ថា រហូតមកដល់ពេលនេះ បេក្ខជនយ៉ាងតិច១០នាក់ក្នុងចំណោមជាង២,៥០០នាក់ដែលចូលរួមប្រជែងក្នុងការបោះឆ្នោតសភាជាន់ទាបគឺត្រូវបានសម្លាប់៕ AFP
Source: Kampuchea Thmey Daily
0 Comments