មន្ត្រីម្នាក់បាននិយាយកាលពីថ្ងៃចន្ទថា នាវាចម្បាំងចិនមួយគ្រឿងបានធ្វើដំណើរក្នុងរយៈចម្ងាយប៉ុន្មានយ៉ាដពីនាវាចម្បាំងអាមេរិកមួយគ្រឿងដែលជាហេតុបង្ខំឲ្យនាវានេះត្រូវផ្លាស់ប្តូរទិសដៅនៅក្នុងការជួបប្រទះ “គ្មានសុវត្ថិភាពនិងគ្មានជំនាញ” មួយខណៈដែលនាវាអាមេរិកកំពុងស្ថិតនៅក្នុងដែនទឹកដែលមានជម្លោះក្នុងសមុទ្រចិនខាងត្បូង។
នាវាពិឃាតនាំផ្លូវមីស៊ីល USS Decatur កំពុងអនុវត្តនូវអ្វីដែលយោធាហៅថា “ប្រតិបត្តិការសេរីភាពនៃការធ្វើនាវាចរណ៍” កាលពីថ្ងៃអាទិត្យនៅពេលដែលវាបានឆ្លងកាត់ក្នុងរយៈចម្ងាយ១២ម៉ាយល៍នៃថ្មប៉ប្រះទឹក Gaven និង Johnson នៅក្នុងប្រជុំកោះ Spratly ដាច់ស្រយាល។
អ្នកនាំពាក្យកងនាវាចរណ៍អាមេរិកនៅតំបន់ប៉ាស៊ីហ្វិកលោក Nate Christensen បាននិយាយថា ក្នុងអំឡុងប្រតិបត្តិការនោះ នាវាពិឃាតចិនឈ្មោះ Luyang បានទៅជិតនាវា USS Decatur នៅក្នុងការជួបប្រទះមិនមានសុវត្ថិភាពនិងគ្មានជំនាញនៅក្នុងតំបន់ជុំវិញថ្មប៉ប្រះទឹក Gaven នៃសមុទ្រចិនខាងត្បូង។
លោកបានបន្ថែមថា បន្ទាប់មក នាវាចិនបានធ្វើសមយុទ្ធឈ្លានពានកាន់តែច្រើនឡើងៗហើយបានព្រមានថា នាវា Decatur ត្រូវចាកចេញពីតំបន់នោះ។ នាវាពិឃាតចិនបានទៅដល់ក្បែរក្បាលរបស់នាវា Decatur ហើយបន្ទាប់មកនាវា Decatur បានប្តូរទិសដើម្បីទប់ស្កាត់ការបុកគ្នា។
ទំនាក់ទំនងរវាងអាមេរិកនិងចិនត្រូវជាប់គាំងលើកម្រិតជាច្រើនចាប់តាំងពីលោក Donald Trump បានក្លាយជាប្រធានាធិបតីនៅក្នុងឆ្នាំ២០១៧មក។
សង្គ្រាមពាណិជ្ជកម្មដែលចាប់ផ្តើមដោយលោក Trump បានធ្វើឲ្យទីក្រុងប៉េកាំងខឹងសម្បាដូចដែលការអនុញ្ញាតរបស់គាត់ក្នុងការលក់អាវុធចំនួន១.៣ពាន់លានដុល្លារទៅឲ្យកោះតៃវ៉ាន់ដែរដែលប្រទេសចិនចាត់ទុកថាជាខេត្តរឹងចចេសមួយ។
ក្រុងវ៉ាស៊ីនតោនកាលពីសប្តាហ៍មុនបានអនុម័តច្បាប់ពន្ធថ្មីប្រឆាំងនឹងប្រទេសចិនដែលគ្របដណ្ដប់លើការនាំចូលរបស់ខ្លួនក្នុងចំនួនទឹកប្រាក់២០០ពាន់លានដុល្លារ។
ប្រទេសចិនបានចាត់វិធានការសងសឹកជាបន្តបន្ទាប់រួមទាំងការលុបចោលដំណើរទស្សនកិច្ចទៅកំពង់ផែក្រុងហុងកុងតាមការគ្រោងទុករបស់នាវាអាមេរិកនិងលុបចោលកិច្ចប្រជុំមួយរវាងប្រមុខកងនាវាចរចិននិងសមភាគីអាមេរិករបស់លោកផងដែរ៕ AFP
Source: Kampuchea Thmey Daily
0 Comments