មិត្តរួមថ្នាក់ម្នាក់របស់អ្នកដែលត្រូវបានតែងតាំងជាចៅក្រមតុលាការកំពូលដោយលោកប្រធានាធិបតី Donald Trump បាននិយាយកាលពីថ្ងៃចន្ទថា លោក Brett Kavanaugh គឺជាអ្នកចូលចិត្តផឹកស្រា។
សេចក្តីអត្ថាធិប្បាយនេះបានធ្វើឡើងប៉ុន្មានថ្ងៃបន្ទាប់ពី FBI បានបើកការស៊ើបអង្កេតមួយតាមសំណើរបស់ព្រឹទ្ធសភាចូលទៅក្នុងការចោទប្រកាន់ពីសំណាក់ស្ត្រី៣នាក់ដែលថា លោក Kavanaugh បានស្រវឹងហើយរំលោភបំពានផ្លូវភេទពួកគេឬប្រព្រឹត្តអំពើហឹង្សាផ្លូវភេទខណៈពេលដែលពួកគេជានិស្សិតនៅក្នុងទសវត្សរ៍ឆ្នាំ១៩៨០។
លោក Chad Ludington បានប្រាប់អ្នកយកព័ត៌មានថា “ខ្ញុំអាចនិយាយយ៉ាងច្បាស់ថា ចំពោះការបដិសេធនូវលទ្ធភាពដែលថាគាត់មិនដែលផឹកស្រាឬផឹកក្នុងកម្រិតទាប លោក Brett មិនបាននិយាយការពិតទេ”។
សាស្ត្រាចារ្យសាកលវិទ្យាល័យ North Carolina State University រូបនេះដែលបាននិយាយថាគាត់បានទាក់ទងទៅ FBI ជាមួយព័ត៌មានរបស់គាត់បានចង្អុលបង្ហាញនៅក្នុងសេចក្តីថ្លែងការណ៍កាលពីថ្ងៃអាទិត្យថា លោក Kavanaugh គឺ “ពូកែរករឿងនិងឈ្លានពាន” នៅពេលគាត់ផឹក។
មុននេះ លោក Trump បានការពារការជ្រើសរើសរបស់គាត់ប៉ុន្តែបានសារភាពថា ចៅក្រមតុលាការឧទ្ធរណ៍មាន “ការលំបាកតិចតួច” ជាមួយគ្រឿងស្រវឹង។ លោកប្រធានាធិបតីបាននិយាយថា “ខ្ញុំមានការភ្ញាក់ផ្អើលចំពោះការនិយាយអំពីការពិតដែលថាគាត់ចូលចិត្តស្រាបៀរ”។
លោកក៏បានចោទសួរផងដែរថាហេតុអ្វីបានជាអ្នកស៊ើបអង្កេតត្រូវការពិនិត្យមើលកំណត់ត្រាវិទ្យាល័យរបស់លោក Kavanaugh ។ លោក Trump បានថ្លែងថា “ខ្ញុំគិតថាវាអយុត្តិធម៌ណាស់ក្នុងការបង្កើតរឿងបែបនេះ”។
នៅក្នុងសវនាការវិសាមញ្ញកាលពីថ្ងៃព្រហស្បតិ៍ លោក Kavanaugh បានបដិសេធយ៉ាងខ្លាំងចំពោះការចោទប្រកាន់ពីការរំលោភបំពានផ្លូវភេទហើយក៏បានប្រឆាំងយ៉ាងខ្លាំងផងដែរចំពោះការលើកឡើងដែលថា គាត់មានបញ្ហាផឹកនៅពេលនោះ។
កាសែត New York Times ក៏បានរាយការណ៍ផងដែរថា លោក Kavanaugh ត្រូវបានចោទសួរប៉ុន្តែមិនត្រូវបានចោទប្រកាន់ពីសំណាក់ប៉ូលិសទេបន្ទាប់ពីការប្រយុទ្ធគ្នានៅក្នុងបារកាលពីឆ្នាំ១៩៨៥ក្នុងទីក្រុង New Haven នៃរដ្ឋ Connecticut ។
បណ្តាញព័ត៌មានអាមេរិកបានរាយការណ៍ថា FBI បានចាប់ផ្តើមការសម្ភាសន៍របស់ពួកគេជាមួយលោក Mark Judge ដែលជាអតីតមិត្តភក្តិដ៏ល្អបំផុតរបស់លោក Kavanaugh និងជាបុគ្គលសំខាន់នៅក្នុងការចោទប្រកាន់ប្រព្រឹត្តមិនត្រឹមត្រូវដោយលោកស្រី Christine Blasey Ford ៕ AFP
Source: Kampuchea Thmey Daily
0 Comments