ស្វាយរៀង ៖ ជាងសំណង់ចំនួន១៦ នាក់មកពីខេត្តព្រៃវែង និងខេត្តស្វាយរៀង បានចូលរួមនៅក្នុងការប្រកួតជុំជម្រុះថ្នាក់តំបន់ នៃកម្មវិធីប្រកួតជាងសំណង់របស់ក្រុមហ៊ុន អេសស៊ីជី (SCG) កាលពីពេលថ្មីៗ ហើយក្នុងនោះ ជ័យលាភី ដែលជាប់វគ្គជម្រុះ មានសិទ្ធិចូលរួមការប្រកួតថ្នាក់ជាតិ ដែលនឹងរៀបចំនៅចុងឆ្នាំនេះ។
បេក្ខជនត្រូវបានបែងចែកជា៨ក្រុម ដែលមួយក្រុមមានគ្នាពីរនាក់ ដោយត្រូវប្រកួតលើផ្នែកបូកស៊ីម៉ង់ត៍។ ការប្រកួតនេះ បានធ្វើឡើងនៅឯដេប៉ូសំណង់ អៀង ង៉ែត ដែលជាតំណាងចែកចាយរបស់ក្រុមហ៊ុនអេសស៊ីជីប្រចាំខេត្តស្វាយរៀង។
លោកស្រី អៀង គឹមឡាយ តំណាងដេប៉ូសំណង់ អៀង ង៉ែត បានថ្លែងថា “ខ្ញុំគិតថា ការរៀបចំឲ្យមានការប្រកួតជាងសំណង់នេះ គឺវាល្អមែនទែន ពីព្រោះកម្មវិធីនេះបង្កើតឡើងដោយការសហការគ្នារវាងក្រុមហ៊ុនអេសស៊ីជី និងក្រសួងការងារ ដើម្បីជួយពង្រឹងសមត្ថភាពរបស់ជាងនៅក្នុងប្រទេសកម្ពុជា។ ហើយខ្ញុំគិតថា ពួកគាត់នឹងអាចរកប្រាក់ចំណូលបានច្រើនជាងមុន ដោយសារថ្វីដៃរបស់គាត់ហ្នឹង ហើយនិងទំនុកចិត្តរបស់ម្ចាស់ផ្ទះ”។
លោក ពង់ថាណា ដេវីតាយ៉ាផន (Pongdhana Dejvittayaporn) នាយកផ្នែកលក់ និងទីផ្សាររបស់ក្រុមហ៊ុន អេសស៊ីជី បានមានប្រសាសន៍ថា “បន្ទាប់ពីបានសង្កេតឃើញការប្រកួតពីមួយលើកទៅ មួយលើក យើងបានពិនិត្យឃើញថា ទឹកដៃ ល្បឿន និងគុណភាពការងាររបស់ជាងសំណង់ទាំងនេះគឺប្រពៃខ្លាំងណាស់ ហើយនេះជាតឹកតាងបង្ហាញឲ្យឃើញពីលទ្ធផលវិជ្ជមានដែលកើតចេញពីវគ្គបណ្ដុះបណ្ដាលរបស់យើង។ ដោយសារតែជំនាញមានការកើនឡើងដូច្នេះ ខ្ញុំរំពឹងថា ជាងសំណង់ទាំងនេះនឹងអាចរកប្រាក់ចំណូលបានកាន់តែច្រើនទៅថ្ងៃអនាគត”។ លោកបានបន្ថែមថា “ការរីកចម្រើននូវជំនាញរបស់ជាងសំណង់ គួបផ្សំនឹងផលិតផល និងសម្ភារសំណង់ថ្មីៗ ដែលកំពុងដាក់លក់នៅលើទីផ្សារបច្ចុប្បន្ន ជាពិសេសគឺផលិតផល និងសម្ភារសំណង់ដែលមានគុណភាពពីអេសស៊ីជី នឹងធានាបានថា បទដ្ឋាន និងគុណភាពសំណង់នៅក្នុងប្រទេសកម្ពុជានឹងបន្តកើនឡើងជាប់ជានិច្ច”។
រាល់បេក្ខជនដែលចូលរួមសុទ្ធតែទទួលបានវិញ្ញាបនប័ត្រពីកម្មវិធីបណ្ដុះបណ្ដាល ហើយក្រុមដែលទទួលជ័យជំនះសម្រាប់ការប្រកួតវគ្គផ្ដាច់ព្រ័ត្រនឹងទទួលបានរង្វាន់ជាទឹកប្រាក់២លានរៀល និងបានចូលរួមក្នុងដំណើរទស្សនកិច្ចអប់រំទៅកាន់ប្រទេសថៃ ដែលរៀបចំដោយក្រុមហ៊ុនអេសស៊ីជីផងដែរ។ ជ័យលាភីក្នុងការប្រកួតក្នុងខេត្តស្វាយរៀង គឺបានទៅក្រុមលោក ព្រំ ភ័ក្ត្រ និងលោកតេត គង់ ដែលមកពីខេត្តព្រៃវែង។
លោកព្រំ ភ័ក្ត្រ បានថ្លែងថា “ខ្ញុំមានអារម្មណ៍សប្បាយដោយសារ ក្រុមហ៊ុនអេសស៊ីជី បានផ្ដល់ជ័យជំនះឲ្យ។ ខ្ញុំគិតថា លំបាកដែរ ប៉ុន្តែថ្ងៃនេះខ្ញុំក៏បានខំប្រឹង ហើយក៏បានជ័យជំនះនៅក្នុងថ្ងៃនេះ។ ថ្ងៃខាងមុខ ខ្ញុំសង្ឃឹមថា ខ្ញុំនឹងអាចយកឈ្នះនៅពេលប្រកួតជាមួយនឹងខេត្តផ្សេងៗទៀត។ ថ្ងៃខាងមុខខ្ញុំសង្ឃឹមថា ការងារនឹងលូតរីកចម្រើន ខ្ញុំនឹងអាចមានការងារធ្វើបន្តពីមួយកន្លែងទៅមួយកន្លែងបាន ហើយជួយឲ្យជីវភាពរបស់ខ្ញុំអាចធូរស្រាលជាងនេះទៅទៀត”។
បន្ថែមលើការប្រកួត និងការបណ្ដុះបណ្ដាលជាងសំណង់ ក្រុមហ៊ុនអេសស៊ីជី ក៏បានដាក់ឲ្យប្រើប្រាស់នូវសេវាកម្មផ្គូផ្គងជាងសំណង់ ដែលជួយឲ្យម្ចាស់លំនៅដ្ឋាន និងម្ចាស់គម្រោងអាចស្វែងរកជាងសំណង់បានកាន់តែងាយស្រួលជាងមុន តាមរយៈការទូរស័ព្ទទៅកាន់ការិយាល័យព័ត៌មានរបស់អេសស៊ីជី លេខ ០៩៥-៩៩៩-៥០០ ឬចុះឈ្មោះនៅលើគេហទំព័ររបស់អេសស៊ីជី kh.scgbuildingmaterials.com/contractor-matching៕
Source: Kampuchea Thmey Daily
0 Comments