ប្រទេសកូរ៉េខាងជើងបានព្រមានក្រុងវ៉ាស៊ីនតោនតាមរយៈប្រព័ន្ធផ្សព្វផ្សាយរដ្ឋរបស់ខ្លួននៅថ្ងៃអង្គារថា ការប្រកាសបញ្ចប់សង្គ្រាមកូរ៉េមិនគួរត្រូវបានមើលឃើញថាជាប់ទាក់ទងនឹងកិច្ចពិភាក្សារំសាយអាវុធនុយក្លេអ៊ែរទេ។
ទីភ្នាក់ងារព័ត៌មានផ្លូវការរបស់កូរ៉េខាងជើងបានចេញសេចក្តីអត្ថាធិប្បាយមួយដោយអះអាងថា ទីក្រុងព្យុងយ៉ាងបានចាត់វិធានការយ៉ាងសំខាន់ដើម្បីបញ្ចប់ទំនាក់ទំនងអមិត្តរវាងប្រទេសទាំងពីរប៉ុន្តែបាននិយាយថា អាមេរិកកំពុងព្យាយាមបង្ក្រាបវាតាមរយៈការដាក់ទណ្ឌកម្ម។
អ្នកអត្ថាធិប្បាយបាននិយាយថា សេចក្តីប្រកាសមួយជំនួសឲ្យបទឈប់បាញ់ដែលមានអាយុ កាល៦៥ឆ្នាំដើម្បីបញ្ចប់សង្គ្រាមជាផ្លូវការគឺមិនគ្រាន់តែជាអំណោយមួយពីបុរសម្នាក់ទៅមនុស្សម្នាក់ទៀតទេហើយវាក៏មិនអាចប្រើជាការចរចាមួយក្នុងការធ្វើឲ្យកូរ៉េខាងជើងរំសាយអាវុធនុយក្លេអ៊ែរដែរ។
ការអត្ថាធិប្បាយនេះបានសំដៅទៅអ្នកដែលគាំទ្រគោលនយោបាយសហរដ្ឋអាមេរិកក្នុងការរក្សាសម្ពាធនិងការដាក់ទណ្ឌកម្មអតិបរមាលើប្រទេសកូរ៉េខាងជើងរហូតទាល់តែខ្លួនធ្វើការផ្លាស់ប្តូរយ៉ាងច្បាស់លាស់និងសំខាន់ក្នុងការរំសាយអាវុធនុយក្លេអ៊ែរ។
រដ្ឋមន្ត្រីការបរទេសអាមេរិកលោក Mike Pompeo ត្រូវបានគេរំពឹងថានឹងធ្វើដំណើរទៅកាន់ទីក្រុងព្យុងយ៉ាងក្នុងពេលឆាប់ៗនេះដើម្បីព្យាយាមស្តារដំណើរការចរចាឡើងវិញនិងរៀបចំកិច្ចប្រជុំកំពូលលើកទី២រវាងលោកប្រធានាធិបតី ដូណាល់ ត្រាំនិងមេដឹកនាំ គីម ជុងអ៊ុន។
សេចក្តីអត្ថាធិប្បាយនេះបានគាំទ្រសុន្ទរកថារបស់រដ្ឋមន្ត្រីការបរទេសកូរ៉េខាងជើងលោក Ri Yong Ho កាលពីសប្តាហ៍មុននៅអង្គការសហប្រជាជាតិដែលក្នុងនោះលោកបានអះអាងថា កូរ៉េខាងជើងត្រៀមខ្លួនអនុវត្តកិច្ចព្រមព្រៀងរវាងលោកត្រាំនិងលោកគីមដែលបានធ្វើឡើងក្នុងកិច្ចប្រជុំកំពូលលើកដំបូងរបស់ពួកគេនៅក្នុងប្រទេសសិង្ហបុរីកាលពីខែមិថុនាប៉ុន្តែក៏បានចោទប្រកាន់ទីក្រុងវ៉ាស៊ីនតោនផងដែរអំពីការមិនបានបង្ហាញនូវឆន្ទៈរបស់ខ្លួនដើម្បីបន្ធូរបន្ថយភាពតានតឹងនិងកសាងនូវជំនឿទុកចិត្តលើគ្នាទៅវិញទៅមក៕ AP
Source: Kampuchea Thmey Daily
0 Comments